༉ གནམ་བྱཱར་གྱི་ དུས་ཚོད་འགོ་བཙུགས་མི་ལུ་བརྟེན་ ང་བཅས་ལུ་ གདོང་ལེན་འབྱུང་ནི་ཨིནམ་ལས་ འཕྲལ་མགྱོགས་ར་ ཐག་བཅད་དགོ་པའི་ ཐབས་བྱུས་དང་ འཕྲལ་མཁོ་ཚུ་ དྭངས་གསལ་སྦེ་ མངོན་གསལ་མིན་འདུག།
གནམ་བྱཱར་དེ་ དམིགས་བསལ་གྱི་ ཚབས་ཆེན་འབྱུང་ཉེན་ཨིན་མི་དེ་ཡང་ ཆུ་རུད་དང་ ས་རུད་ དེ་ལས་ རྐྱེན་ངན་གཞན་ཚུ་གི་ ཉེན་ཁ་ཡོད་ནི་དེ་གིས་ ཧེ་མ་ལས་ ཉེན་བརྡ་འབདཝ་ཨིན་མས།
དང་པ་ར་ ཉེན་བརྡའི་ལམ་ལུགས་ཚུ་ ཡར་དྲག་གཏང་དགོཔ་དེ་ ཁག་ཆེ་ཤོས་ཅིག་ཨིནམ་ལས་ ལམ་ལུགས་དེ་ རང་བཞིན་གྱི་རྐྱེན་ངན་ཚུ་ལས་ ཉེན་སྲུང་འབད་ནིའི་ ཐབས་ལམ་དང་པ་ ཨིན་མི་ལུ་བརྟེན་ གྲ་སྒྲིག་དང་ ཕྱིར་འཐོན་འབད་ནི་ལུ་ ག་ནི་བ་གལ་ཆེ་བའི་ དུས་ཚོད་བྱིན་ཚུགསཔ་ལས་ གནས་སྡུད་གཏན་གཏན་དང་ དུས་ཚོད་ཁར་ ཐོབ་ཚུགས་ནིའི་དོན་ལུ་ རྒྱལ་སྤྱི་གངས་རི་གོང་འཕེལ་ལྟེ་བ་བཟུམ་གྱི་ ལུང་ཕྱོགས་དང་ རྒྱལ་སྤྱིའི་ལས་སྡེ་ཚུ་དང་ མཉམ་འབྲེལ་འབད་དགོཔ་ཁག་ཆེ།
གོང་འཕེལ་ཅན་གྱི་འཕྲུལ་རིག་ཚུ་ནང་ མ་རྩ་བཙུགས་ཏེ་ བརྒྱུད་འབྲེལ་གྱི་ ཡོངས་འབྲེལ་སྒྲིང་སྒྲི་བཟོ་སྟེ་ ཉེན་ཁ་ཅན་གྱི་ མི་སྡེ་ཚུ་ལུ་ ཉེན་སྲུང་དང་ལྡནམ་སྦེ་ སྡོད་དགོ་པའི་ བརྡ་དོན་བྱིན་ཚུགས།
གཞི་རྟེན་མཐུན་རྐྱེན་གྱི་ གནས་སྟངས་ཚུ་ འཕྲལ་མཁོའི་དོན་ལུ་ གཙོ་བོར་བཏོན་དགོཔ་ གལ་གནད་ཅིག་ཨིནམ་བཞིན་དུ་ ང་བཅས་རའི་ལམ་དང་ ཟམ་ དེ་ལས་ མི་མང་གི་སྒྲིང་ཁྱིམ་ཚུ་ གནམ་བྱཱར་གྱི་དུས་ཚོད་ཁར་ ཚོད་དཔག་འབད་མ་ཚུགས་པའི་ གནས་སྟངས་ཚབས་ཆེན་དེ་ ཉེན་སྐྱོབས་འབད་ནིའི་ ཐབས་བྱུས་བཏོན་དགོ།
ཉེན་ཁ་ཅན་གྱི་ ས་ཁོངས་ཚུ་ནང་ གལ་ཆེ་བའི་ གཞི་རྟེན་མཐུན་རྐྱེན་ སྒྲིང་སྒྲི་བཟོ་མི་གིས་ མིའི་ཚེ་སྲོག་སྲུང་སྐྱོབ་འབད་ནི་ རྐྱངམ་གཅིག་མེན་པར་ རྐྱེན་ངན་བྱུང་པའི་སྐབས་དང་ དེ་གི་ཤུལ་ལས་ གལ་ཆེ་བའི་ཞབས་ཏོག་ཚུ་ འཕྲོ་མཐུད་དེ་ར་ བྱིན་ཚུགས་ནི་མས།
མི་སྡེའི་དོན་ལུ་ དུས་ནམ་ར་འབད་རུང་ གྲ་སྒྲིག་སྦེ་ སྡོད་ནི་དེ་ བརྗེད་མ་ཚུགས་པའི་ ལམ་ལུགས་ཅིག་ཨིནམ་ལས་ མི་སེར་ཚུ་ལུ་ རྐྱེན་ངན་ནང་ ཕན་ནུས་ཅན་སྦེ་ གདོང་ལེན་འབད་ཚུགས་པའི་ ཤེས་ཡོན་དང་ རིག་རྩལ་ དབང་ཆ་བྱིན་ནི་དེ་ཡང་ གལ་ཆེ་བས།
རྒྱལ་ཁབ་ནང་འཁོད་ལུ་ མི་སྡེ་གོ་བརྡའི་ལས་རིམ་ཚུ་ གོ་རིམ་བཞིན་དུ་ འགོ་འདྲེན་འཐབ་སྟེ་ ཉེན་ཁའི་སྐོར་ལས་ ཤེས་ཡོན་བྱིན་ཏེ་ དེ་ཚུ་མར་ཕབ་འབད་དོན་ལུ་ ཐབས་ཤེས་བཏོན་དགོ།
ས་གནས་ཀྱི་ མི་སྡེ་ཚུ་ལུ་འབད་རུང་ གློ་བུར་རྐྱེན་ངན་འཛིན་སྐྱོང་ནང་ གདོང་ལེན་གྱི་སྦྱོང་བརྡར་བྱིན་ནི་དང་ རྐྱེན་ངན་འཛིན་སྐྱོང་ཚོགས་ཆུང་ གཞི་བཙུགས་འབད་མི་གིས་ ཉེན་ཁ་བྱུང་པའི་སྐབས་ དེ་འཕྲོ་ལས་ ལཱ་འབད་ཚུགས་པའི་ གྲ་སྒྲིག་ཡོདཔ་བཟོ་ཚུགས།
འདི་དང་འབྲེལ་ གློ་བུར་གྱི་ གདོང་ལེན་འཆར་གཞི་བཟོ་སྟེ་ དུས་རྒྱུན་དུ་ དུས་མཐུན་བཟོ་ནི་དེ་ཡང་ ཁག་ཆེ་ནི་མས།
འདི་བཟུམ་གྱི་ འཆར་གཞི་དེ་ ལུང་ཕྱོགས་རེ་རེ་བཞིན་ནང་ དམིགས་བསལ་གྱི་ དགོས་མཁོ་དང་ ཉེན་ཁ་ཚུ་ བསལ་ཐབས་ལུ་ སྡེ་ཚན་ཚུ་ འཇོན་ཐངས་ཅན་སྦེ་ གྲ་སྒྲིག་འབད་དེ་ གློ་བུར་གྱི་གནས་སྟངས་ ག་ཅི་བཟུམ་ཅི་བཟུམ་ཐོན་རུང་ གདོང་ལེན་འབད་ཚུགས་པའི་ སྦྱོང་བརྡར་ཡོདཔ་སྦེ་དགོཔ་འདུག།
དེ་ཚུ་ ཕན་ནུས་ཅན་སྦེ་ རྒྱུན་སྐྱོང་དང་ ལག་ལེན་འཐབ་ནི་གི་དོན་ལུ་ མཐུན་རྐྱེན་ལངམ་སྦེ་ བགོ་བཀྲམ་འབད་དགོ་པའི་ཁར་ གློ་བུར་གྱི་སྡོད་ཁྱིམ་ཚུ་ བཟོ་སྐྲུན་འབད་དེ་ སྤོ་བཤུད་འབད་མི་ མི་ངོ་དང་ བཟའ་ཚང་ཚུ་ལུ་ རྒྱབ་སྐྱོར་འབད་དོན་ལུ་ དགོས་མཁོའི་ཅ་ཆས་ཚུ་ བཀྲམ་སྤེལ་འབད་དགོ།
གནམ་གཤིས་གནས་སྟངས་ལུ་ མཐུན་འགྱུར་གྱི་ཐབས་ཤེས་ཚུ་ཡང་ གནམ་གཤིས་ཀྱི་ བྱུང་རིམ་ཚུ་ལུ་ གཞི་བཀོད་འབད་དེ་ འབད་དགོ་ནི་དང་ ཡུན་བརྟན་སོ་ནམ་ལམ་ལུགས་ཀྱིས་ གནས་སྟངས་སྐྱོ་དྲགས་ཚུ་ ལེགས་སྒྱུར་འབད་ཚུགས་ནི་མས།
ནགས་ཚལ་བསྐྱར་བཟོ་དང་ ས་གཞི་ཉམས་སྲུང་འབད་ནི་ལུ་ ཡར་དྲག་གཏང་པ་ཅིན་ མཐའ་འཁོར་གནས་སྟངས་ སྒྲིང་སྒྲི་བཟོ་ནི་དང་ ས་རུད་དང་ ཆུ་རུད་ཀྱི་ཉེན་ཁ་ མར་ཕབ་འབད་ནི་ལུ་ ཕན་ཐོགས་སྦོམ་ར་འབྱུང་འོང་།
དེ་འབདཝ་ལས་ ཕན་ཚུན་གནས་སྟངས་དང་བསྟུན་པའི་ བྱ་སྒོའི་རིམ་པ་ཚུ་ སྒྲིག་སྟེ་འབད་བ་ཅིན་ རྒྱལ་ཁབ་ཀྱི་གནས་སྟངས་དེ་ ཡར་དྲག་མ་གཏོགས་ སྐྱོ་དྲག་མི་འགྱོ་ནི་མས།

Advertisement