༉ གསོ་བ་ལྷན་ཁག་གིས་ རྒྱལ་ཁབ་ནང་ ཁྱད་རིག་ལྡན་པའི་གསོ་བའི་མཁས་མཆོག་ལངམ་སྦེ་ མེད་པའི་དཀའ་ངལ་དེ་ རྫོང་ཁག་༢༠ གི་སྨན་ཁང་དང་ གཞི་རྟེན་སྨན་ཁང་ག་རའི་ནང་ འཕྲོ་མཐུད་དེ་ར་ བྱུང་དོ་ཡོདཔ་སྦེ་ཨིན་པས།
ལས་བྱེདཔ་ཚུ་ ཉུང་སུ་ཅིག་ལས་མེད་པའི་ གནད་དོན་ཡོད་པའི་གུ་ མཐའ་ཟུར་གྱི་སྨན་ཁང་ལྟེ་བ་ཚུ་ནང་ ཌོག་ཊར་དང་ སྨན་གཡོགམ་ འཕྲུལ་ལསཔ་ཚུ་ མེད་པའི་དཀའ་ངལ་དེ་ དམིགས་བསལ་ཅན་ཅིག་ཨིན་ཟེར་ཨིན་པས།
གསོ་བ་བློན་པོ་ རྟ་མགྲིན་དབང་ཕྱུག་གིས་ བཤད་མིའི་ནང་ གནད་དོན་ཁག་ལེ་ཤ་ཅིག་ལུ་བརྟེན་ ལས་བྱེདཔ་ལང་མ་ཚུགས་མི་དང་ ལས་བྱེདཔ་དགོངས་ཞུ་འབད་མི་ ངལ་གསོ་ནང་འགྱོ་མི་ སྨན་བཅོས་ཀྱི་ཤེས་ཡོན་སྦྱང་མི་ཚུ་གིས་ གདོང་ལེན་ཚུ་ བྱུང་ཡོདཔ་སྦེ་ཨིན་པས།
ད་ལྟོའི་ གནས་སྟངས་ནང་བཟུམ་ཅིག་འབད་བ་ཅིན་ གསོ་བའི་འཕྲོད་བསྟེན་ལྟེ་བ་༡༨༧ ཡོད་ས་ལས་༣༠ ནང་མ་གཏོགས་ གསོ་བའི་ཨམ་སྲུ་ལས་རོགསཔ་ ལང་མ་ཚུགས་པར་ཡོདཔ་ད་ དེ་ཡང་ མཐའ་ཟུར་གྱི་ས་ཁོངས་ཚུ་ནང་ ལས་བྱེད་བཏང་ནི་ལུ་ ལཱ་ཁག་ཡོདཔ་ད་ རྫོང་ཁག་ཚུ་ནང་ གསོ་བའི་ལས་བྱེདཔ་ཨམ་སྲུའི་གྱངས་ཁ་དེ་ དགོས་མཁོ་དང་བསྟུན་ བགོ་བཀྲམ་འབད་དོ་ཡོདཔ་སྦེ་ཨིན་པས།
གཞུང་གི་ཁ་ཐུག་ལས་ རྒེད་འོག་འཕྲོད་བསྟེན་ལྟེ་བ་ཚུ་ནང་ ཟླ་རིམ་གྱི་གཞི་རྟེན་ཐོག་ ཌོག་ཊར་རེ་བཏང་ནི་ཟེར་མི་དེ་ ལག་ལེན་འཐབ་དོ་ཡོདཔ་ད་ ལྷན་ཁག་གིས་ རྒེད་འོག་འཕྲོད་བསྟེན་ལྟེ་བ་ཚུ་ནང་ སྤྱིར་བཏང་ཌོག་ཊར་གཏང་ནིའི་ འཆར་གཞི་ཡོདཔ་ད་ དེ་ཡང་ མི་རློབས་དང་ ནདཔ་འོང་མི་ དེ་ལས་ ལཱ་གི་གནས་སྟངས་དང་བསྟུན་ ལྟར་སྤྱོད་འབད་ནི་ཨིན་ཟེར་ཨིན་པས།
རྒྱལ་ཡོངས་སྨན་སྤྱད་ཞབས་ཏོག་གིས་ ཌོག་ཊར་ཚུ་ རྫོང་ཁག་སྨན་ཁང་ལས་སྦེ་ རྒེད་འོག་ལྟེ་བ་ཚུ་ནང་ གཏང་ནིའི་ཐབས་ལམ་སྒྲིག་མི་དེ་ཡང་ ད་ལྟོ་ གསོ་བའི་ལས་རོགསཔ་ཚུ་གིས་ ལཱ་འབད་བཞིན་དུ་ཡོདཔ་ཨིན་པས།
ད་ལྟོ་ གསོ་བའི་མཐའ་སྐྱོང་ལྟེ་བ་ཚུ་ནང་ གསོ་བའི་ལས་རོགསཔ་གིས་ ལཱ་འབད་ཡོད་མི་ཚུ་ འཕྲོ་མཐུད་དེ་ར་ ཉིན་མ་དང་ ཕྱི་རུ་གཉིས་ཆ་ར་ནང་ ལཱ་འབད་ནིའི་འཆར་གཞི་ཡོདཔ་ཨིན་པས།
གསོ་བ་ལྷན་ཁག་གིས་ མ་འོངས་པའི་འཆར་ལོའི་ནང་ གསོ་བའི་འཕྲོད་བསྟེན་ཞབས་ཏོག་ ལེགས་ལྡན་ཐོབ་ཐབས་ལུ་ འགྲུལ་བསྐྱོད་སྨན་བཅོས་ལས་ཚན་ཚུ་ འགོ་བཙུགས་ནི་དང་ དེ་གིས་ ད་ལྟོ་ཡོད་པའི་ སྨན་བཅོས་ལས་རིམ་ཚུ་ལུ་ ལྷན་ཐབས་འབད་ཚུགས་ནི་ཨིན་པས།
ང་བཅས་ཀྱིས་ རྒེད་འོག་འཕྲོད་བསྟེན་ལྟེ་བ་ཚུ་ནང་ ཌོག་ཊར་གྱི་ལྟ་རྟོག་འབད་ཚུགསཔ་བཟོ་ནི་དང་ དེ་ཡང་ འགྲུལ་བསྐྱོད་སྨན་བཅོས་ལས་ཚན་དེ་ ལེགས་ཤོམ་སྦེ་ ལག་ལེན་འཐབ་ནི་ འགོ་བཙུགས་ཞིནམ་ལས་ འབད་ནི་ཨིན་ཟེར་ གསོ་བ་བློན་པོ་གིས་ བཤདཔ་ཨིན་པས།
རྫོང་ཁག་རེ་ནང་ སྤྱིར་བཏང་སྨན་བཅོས་མཁས་མཆོག་ཚུ་ བཏང་ནི་ཨིནམ་སྦེ་ འཆར་གཞི་ནང་ བཀོད་དེ་ཡོད་མི་ཚུ་ ཕྱིས་ཏེ་ལུས་ཡོདཔ་ཨིན་རུང་ སྨན་བཅོས་མཁས་མཆོག་ཚུ་ སྐོར་རྒྱབ་སྦེ་ གསོ་བའི་འཕྲོད་བསྟེན་ལྟེ་བ་ཚུ་ནང་ བཏང་དོ་ཡོདཔ་སྦེ་ཨིན་པས།
རྒྱལ་སྤྱི་དང་མཉམ་འབྲེལ་ཐོག་ལས་ གསོ་བའི་ཁས་བླངས་ལས་རིམ་དང་ རྒྱལ་སྤྱི་འཕྲོད་བསྟེན་ལས་རིམ་སྐབས་ ལས་བྱེདཔ་ལངམ་མེད་པའི་ གནད་དོན་སྐོར་ལས་ གསལ་སྟོན་འབད་ཡོདཔ་ཨིན་པས།
ལྷན་ཁག་གིས་ གསོ་བའི་མཁས་རིག་ཅན་ཚུ་ལུ་ ལྟ་རྟོག་འབད་བའི་བསྒང་ཡོདཔ་ད་ མཁས་རིག་ཅན་ཚུ་ལུ་ དངུལ་ཕོགས་ཀྱི་ཐོབ་ལམ་ཚུ་ཡང་ ལྟ་དོ་ཡོདཔ་ལས་ དེ་ཁར་ འཕྲུལ་ལསཔ་དང་ འཕྲུལ་རིག་པ་ སྨན་གཡོགམ་ ནང་པའི་གསོ་རིག་མཁས་མཆོག་ སྤྱིར་བཏང་གི་ཌོག་ཊར་ཚུ་ ཚུད་དེ་ཡོདཔ་ད་ འདི་བཟུམ་གྱི་ཐབས་བྱུས་དེ་གིས་ དགོངས་ཞུ་འབད་ནི་ལས་ བཀག་ཐབས་དང་ ཁྱད་རིག་ཅན་ཚུ་ལུ་ འཐུས་ཀྱི་ཐོབ་ལམ་ལེགས་ཤོམ་ཡོདཔ་བཟོ་ནིའི་ ལཱ་ཚུ་འབད་བའི་བསྒང་ཡོདཔ་ཨིན་པས།
གསོ་བ་ལྷན་ཁག་གིས་ གསོ་བའི་ཞབས་ཏོག་དང་ གནས་ཚད་དང་བསྟུན་ ཐབས་བྱུས་ཚུ་ བཏོན་དོ་ཡོདཔ་ད་ འཆར་གཞི་༡༣ པའི་ནང་ ང་བཅས་ཀྱིས་ ཌོག་ཊར་བཙུགས་ནི་ལུ་ ལྟ་རྟོག་འབད་ཐོག་ལས་ མི་སེར་གྱི་ རེ་བ་ཚུ་ བསྐང་ཚུགསཔ་འབད་ནི་ཨིན་ཟེར་ཨིན་པས།
ཕན་ཚུན་མཉམ་འབྲེལ་ཐོག་ལས་ ལྷན་ཁག་གིས་ སློབ་ཕྲུག་བུམོ་ཚུ་ལུ་ འཛུལ་ཞུགས་ཀྱི་གོ་སྐབས་ མང་སུ་བྱིན་ཐོག་ལས་ རྒེད་འོག་ག་རའི་ནང་ ཁྱབ་ཚུགསཔ་འབད་ནི་ལུ་ ལཱ་ཚུ་འབད་དོ་ཡོདཔ་ཨིན་པའི་གནས་ཚུལ།
ཚེ་རིང་དབང་འདུས།