༉ རྩི་རང་སྨད་ཀྱི་ གསེར་གྱི་ཐང་གཡུས་ཚན་དེ་ གནམ་གཤིས་ཚ་དྲོད་ལྡན་ཏོག་ཏོ་སྦེ་ཡོད་པའི་ བྱཱ་ཞིང་ནང་ སོ་ནམ་པ་ཚུ་གིས་ ལྕང་ལཱ་རྐྱབ་ནིའི་དོན་ལུ་ གྲ་སྒྲིག་འབད་དོ་ཡོདཔ་ཨིན་པས།
སྐྱེས་ལོ་༤༨ ལང་མི་ སོ་ནམ་པ་ ཉིམ་རྡོ་རྗེ་གིས་ གླང་དོ་ཅིག་སྦྱེལ་ཐོག་ལས་ གླང་སྐད་རྐྱབ་སྟེ་ འགྲོས་ཀྱིས་འབད་ གླང་རྨོ་དོ་ཡོདཔ་ཨིན་པས།
ལྷོ་ཕྱོགས་ཁ་ཐུག་ལུ་ ཆརཔ་ཕྱིས་སུ་སྦེ་རྐྱབ་སྟེ་ ད་ལྟོ་ ཁོང་གི་གཡུས་ཚན་ནང་འབད་རུང་ ཁོ་ར་ལྕང་ལཱ་གི་ ལཱ་བྱ་འཐབ་ནི་ལས་ འཛེམ་སྡོད་མ་ཚུགས་མི་དེ་ གཙོ་བོ་ར་ ཆུའི་ལས་འགུལ་གསརཔ་དེ་ལུ་བརྟེན་ཨིན་པས།
ཆུ་གཡུར་དེ་ མཇུག་བསྡུ་ནིའི་དུས་ཚོད་ལས་ ཟླཝ་༤ གི་ཧེ་མར་ བསལ་ཚར་ཡོདཔ་ད་ དེ་ཡང་ སྤྱི་ཟླ་༡༠ པའི་ནང་ལས་ ལཱ་ཚུ་མཇུག་བསྡུ་ནི་དེ་གིས་ ལྕང་ལཱ་རྐྱབ་ནིའི་ གོ་རིམ་དང་པའི་ནང་ ཚུད་མ་ཚུགས་པའི་ཁར་ ན་ཧིང་གི་ལོ་དང་ཕྱདཔ་ད་ དུས་ཅི་ ཉིནམ་༢༠ ཕྱིས་ཏེ་ལུས་སོ་ཡི་ཟེར་ ཉིམ་རྡོ་རྗེ་གིས་ བཤདཔ་ཨིན་པས།
ཁོ་གིས་ སྦོ་ལོགས་ཁར་ལས་ཕར་ ཤིང་ཐོག་འཚོ་མི་ཚུ་ལུ་ལྟ་ཞིནམ་ལས་ ཤིང་འབྲས་ཀྱི་ ཤིང་སྣ་ཚུ་ལུ་བལྟ་ཤིག་ ཤིང་ཐོག་སྣ་ཚོགས་འཚོ་དོ་ཡོདཔ་ད་ ང་བཅས་ལུ་ འདི་བཟུམ་གྱི་ ས་བཅུད་དང་ལྡན་སྦེ་ཡོདཔ་ལས་ ད་ལྟོ་ ལཱ་འབད་ནི་ལུ་ དུས་ཚོད་མ་ཕྱིས་ཟེར་ དབུགས་རིངམོ་བཏང་ཐོག་ལས་ ཁོ་ར་ ས་ཁར་སྡོདཔ་ཨིན་པས།
ཉིམ་རྡོ་རྗེ་གིས་ ཁོ་ལུ་ཡོད་པའི་ ཆུ་ཞིང་ཌེ་སི་མཱལ་༨༠ འབད་མི་དེ་ གླང་རྨོ་ནི་འགོ་བཙུགས་ཡོདཔ་ད་ ཁོ་གིས་ ཞིང་ནང་ལས་འཚོ་མི་ ཐོན་སྐྱེད་དེ་གིས་ ཁོ་རའི་ བཟའ་ཚང་ནང་མི་༦ ཡོད་མི་ལུ་ ལོ་༡ ལང་མི་ཚུགས་པས་ཟེར་ཨིན་པས།
གསེར་གྱི་ཐང་སྨད་ལུ་སྡོད་མི་ སོ་ནམ་པ་ བྷུ་ད་རམ་གྱིས་ཡང་ ལྕང་ལཱ་རྐྱབ་ནིའི་དོན་ལུ་ ཞིང་ཚུ་གྲ་སྒྲིག་འབད་དོ་ཡོདཔ་ཨིན་པས།
འགོ་བཙུགས་པའི་སྐབས་ལུ་ དུས་ཅི་ ཁོ་གིས་ ལྕང་ལཱ་རྐྱབ་ནིའི་འཆར་གཞི་མེད་རུང་ ཆུ་གཡུར་དེ་ ལྕང་ལཱ་མ་རན་པའི་ཧེ་མར་ བསལ་ཚུགས་ནི་དེ་གིས་ ཁོ་གིས་ཡང་ ལྕང་ལཱ་གི་དོན་ལུ་ ལཱ་བྱ་བཀྲམ་ཡི་ཟེར་ བྷུ་ད་རམ་གྱིས་བཤདཔ་ཨིན་པས།
སྐྱེས་ལོ་༣༨ ལང་མི་ སོ་ནམ་པ་ ཕུར་པ་གིས་ རྐངམ་འདམ་ནང་བཙུགས་སྦེ་ ལྕངམ་གི་དོན་ལུ་ གྲ་སྒྲིག་འབད་དོ་ཡོདཔ་ད་ ཕུར་པ་གིས་ ཆུ་གཡུར་རྙིངམ་ནང་ལས་ ཆུ་ལག་ལེན་འཐབ་དོ་ཡོད་རུང་ གཞན་མི་ཚུ་གིས་ ཆུ་གཡུར་གསརཔ་ནང་ལས་ར་ ལག་ལེན་འཐབ་དོ་ཡོདཔ་ཨིན་པས།
ངེ་གི་ཚ་གྱང་དེ་ དུས་ཅི་ ལྕང་ལཱ་རྐྱབ་མི་ཚུགས་ནི་མས་ཟེར་མནོ་སྟེ་ ཞིང་ཁར་ གེ་ཟ་དང་ སྐམ་ཐོག་ཚུ་བཏབ་ནིའི་ མནོ་བསམ་བཏང་ཡོད་པའི་ཁར་ དུས་ཅི་ཡང་ ནང་འདྲེན་འབད་མི་ ཆུམ་ལུ་བརྟེན་དགོ་ནི་མས་ཟེར་ མནོ་བསམ་བཏང་ སྡོད་ཅི་ཟེར་ཨིན་པས།
གསེར་གྱི་ཐང་སྨད་ཀྱི་ སོ་ནམ་པ་ལ་ལོ་ཅིག་གིས་ ཆུ་གཡུར་རྙིངམ་ནང་ལས་ ལག་ལེན་འཐབ་དོ་ཡོདཔ་ད་ དེ་ཡང་ འདས་པའི་ལོ་༥ འི་རིང་ ཆུ་གཡུར་ནང་ བརྟན་ཏོག་ཏོ་སྦེ་མ་འོངམ་ད་ ཆུ་རྐ་རྙིངམ་དེ་ ཧ་ལམ་སྐམ་འགྱོ་དོ་ཡོདཔ་སྦེ་ཨིན་པས།
ཁ་དམའ་སར་སྡོད་མི་ཚུ་ ཆུ་ལང་མ་ཚུགས་པའི་ ཚ་གྱང་ལང་དོ་ཡོད་རུང་ ཁ་མཐོ་སར་སྡོད་མི་ཚུ་ སང་ཕོད་ལས་ ལྕང་ལཱ་མངམ་རྐྱབ་ནི་ཨིནམ་བཞིན་དུ་ དེ་ཡང་ ཆུ་གཡུར་གྱི་རྐ་དེ་ གསེར་གྱི་ཐང་སྟོད་སྤྱི་འོག་ལས་ ཀི་ལོ་མི་ཊར་གསུམ་དེ་ཅིག་གི་ ས་གནས་ཁར་ཡོདཔ་ཨིན་པས།
ཧེ་མ་འབད་བ་ཅིན་ གུང་པ་རེ་གིས་ ཉིནམ་གཉིས་ལུ་ ཆུ་ཚར་རེ་ སྐོར་རྒྱབ་སྦེ་ ཐོབ་དོ་ཡོདཔ་ད་ དེ་ཡང་ རང་སོའི་གཡུས་སྒོ་ནང་ ཆུའི་སྐོར་རྒྱབ་བཟོ་ནི་དེ་གིས་ཨིན་པས།
རྒེད་འོག་ནང་ ཆུ་གཡུར་རྙིངམ་དེ་ཡང་ ཉམས་བཅོས་འབད་ནི་དོན་ལུ་ ཞུ་ཡིག་ཚུ་བཙུགས་ཏེ་ཡོདཔ་ལས་ དེ་གིས་ ཕན་ཐོགས་ནི་ཨིན་པས།
གསེར་གྱི་ཐང་སྟོད་ལུ་སྡོད་མི་ཚུ་ དུས་ཅི་ ལྕང་ལཱ་རྐྱབ་མི་ཚུགས་ནི་མས་ཟེར་ཨིན་པས།
གསེར་གྱི་ཐང་སྟོད་ལས་ ཚེས་བཅུ་གིས་ ཆུ་གཡུར་མཇུག་བསྡུ་ནི་ལུ་ བསྒུག་མ་སྡོད་པར་ ལཱ་འབད་ཡོདཔ་ད་ ཁོ་རའི་ ཁྱིམ་མཐའ་སྐོར་ཏེ་ གེ་ཟ་ཚུ་ འཛུགས་སྐྱོང་འབད་མི་གིས་ ད་ལྟོ་ རི་དྭགས་སེམས་ཅན་ལས་ སྲུང་ནི་ཚུ་འབད་དགོ་ནི་ཨིན་པས།
ཆུ་གཡུར་རྙིངམ་དེ་ ཆུ་རུད་ཀྱིས་ འཕྱགས་བདའ་ཞིནམ་ལས་ གསེར་གྱི་ཐང་རྒེད་འོག་དང་ རྩི་རང་རྫོང་ཁག་གིས་ དངུལ་ཀྲམ་ས་ཡ་༡༡ ཟད་འགྲོ་བཏང་ཐོག་ལས་ ཆུ་གཡུར་གསརཔ་བཏོན་ཡོདཔ་ད་ ལས་འགུལ་དེ་གིས་ ཁྱིམ་གུང་༣༤ ལུ་ ཕན་ཐོགས་བྱུང་བའི་ཁར་ བྱཱ་ཞིང་ཨེ་ཀར་༡༦༠ ཡོད་མི་ཚུ་ ལྕང་ལཱ་རྐྱབ་ཚུགས་ནི་ཨིན་པའི་གནས་ཚུལ།

ཚེ་རིང་དབང་འདུས།

Advertisement