༉ སྒོ་ནོར་ལས་ཁུངས་དང་ བདེ་སྲུངཔ་ཚུ་གིས་ མཉམ་འབྲེལ་ཐོག་ལས་ འཆོལ་ནད་བཀག་ཐབས་དོན་ལས་ གསར་སྤང་ལུ་ རོ་ཁྱི་དང་ བྱི་ལི་ཚུ་ ཤ་བཏོག་དོ་ཡོདཔ་ཨིན་པས།
ཉིན་གྲངས་༩ གི་ རྒྱལ་ཡོངས་རོ་ཁྱི་གྲངས་འབོར་འཛིན་སྐྱོང་དང་ འཆོལ་ནད་བཀག་འཛིན་ལས་རིམ་དེ་ དགེ་ལེགས་ཕུག་དྲན་ཤེས་ཁྲོམ་ནང་ འཆོལ་ནད་མེདཔབཟོ་ནི་དང་ རྒྱལ་ཡོངས་འཆོལ་ནད་ཚད་འཛིན་དོན་ལུ་ འཇོན་ཚད་གསརཔ་ཅིག་བཟོ་ནིའི་ དམིགས་གཏད་བསྐྱེད་དེ་ ཡོདཔ་ཨིན་པས།
སྤྱི་ཟླ་༡ པའི་ཚེས་༢༢ ལུ་ མཇུག་བསྡུ་མི་ འཆོལ་ནད་བཀག་ཐབས་ལས་རིམ་ནང་ སྒོ་ནོར་ལས་བྱེདཔ་༦༥ དང་ བདེ་སྲུངཔ་༨༩ དེད་གཡོགཔ་༡༩ བརྩིས་ཏེ་ འགོ་དཔོན་༡༧༣ དེ་ཅིག་ རོ་ཁྱིའི་གྱངས་ཁ་དང་འཁྲིལ་ཏེ་ རྒེད་འོག་༡༢ ལུ་ བགོ་བཀྲམ་འབད་ཡོདཔ་ཨིན་པས།
འདས་པའི་རྒྱལ་ཡོངས་ལས་རིམ་ནང་ གསོ་ཁྱི་༡,༢༣༤ ཤ་བཏོགས་ཡོདཔ་ད་ གསར་སྤང་ལུ་ གསོ་ཁྱི་ཡོངས་བསྡོམས་༡,༨༣༤ ཡོད་མི་ལས་༥༨༧ འབདཝ་ད་ བརྒྱ་ཆ་༣༢ དང་ བྱི་ལི་༣,༦༤༠ ཤ་མ་བཏོག་པར་ ལུས་ཡོདཔ་ཨིན་པས།
ད་རེས་ སོ་ཁྱི་༣༩༩ དང་ བྱི་ལི་༢,༤༧༢ ཤ་བཏོགས་པའི་ཁར་ གསོ་ཁྱི་༩༠༤ དང་ བྱི་ལི་༢,༧༩༨ ནོར་༡,༥༥༩ ར་༧༠༨ ལུག་༡༨༤ དེ་ལས་ རྟ་༥ ལུ་ སྨན་ཁབ་བཙུགས་ཡོདཔ་ཨིན་པས།
དགེ་ལེགས་ཕུག་དྲན་ཤེས་ཁྲོམ་གྱི་ འཆོལ་ནད་མེདཔ་བཟོ་མི་སྡེ་ཚན་གྱི་ འགོ་ཁྲིདཔ་ ཌོག་ཊར་ཀུན་ལེགས་རྡོ་རྗེ་གིས་ སླབ་མིའི་ནང་ དགེ་ལེགས་ཕུག་དྲན་ཤེས་ཁྲོམ་ཚེོགས་ཀྱི་ བདག་སྐྱོང་དང་ ཁྲོམ་སྡེ་ དེ་ལས་ ས་གནས་གཞུང་གི་རྒྱབ་སྐྱོར་ལུ་བརྟེན་ གསོ་ཁྱི་ཚུ་ ཤ་བཏོག་པར་འོང་མི་དེ་ རྒྱ་ཆེ་དྲགས་སྦེ་ར་ ཡར་སེང་སོང་ཡི་ཟེར་ཨིན་པས།
ཁོ་གིས་འབད་བ་ཅིན་ གསོ་ཁྱིའི་ཇོ་བདག་ཚུ་འབད་སར་ སོང་ཞིནམ་ལས་ ག་དེ་མང་མང་ ཤ་བཏོག་ནི་ལུ་ རྩ་འགེངས་ཡི་ཟེར་ཨིནམ་ད་ གསོ་ཁྱི་ཚུ་ག་ར་ ཐོ་བཀོད་འབད་དེ་ གཏན་འཇགས་ཐོག་ལས་ ངོས་འཛིན་འབད་ནི་ལུ་ འཕྲུལ་ཆས་བཙུགས་དགོ་པའི་ཁར་ གཤག་བཅོས་དང་ སྨན་ཁབ་བཙུགས་དགོཔ་ཨིན་པས།
ཤ་མ་བཏོག་པའི་གསོ་ཁྱི་ཚུ་ རིགས་བརྒྱུད་ཀྱི་དོན་ལུ་ ལོགས་སུ་སྦེ་ ཐོ་བཀོད་འབད་དགོཔ་ད་ གསོ་ཁྱི་ཐོ་བཀོད་ཀརཊི་ནང་ སྨན་བཙུགས་པའི་ཁ་གསལ་དང་ ཤུལ་མའི་སྨན་ཁབ་ཀྱི་ཚེས་གྲངས་ཚུ་ ཚུད་དགོཔ་བཞིན་དུ་ དེ་ཚུ་ཡང་ སྒོ་ནོར་འཕྲོད་བསྟེན་གྱི་ ལམ་ལུགས་བཙུགས་ཏེ་ ཡོདཔ་ཨིན་པས།
དགེ་ལེགས་ཕུག་དྲན་ཤེས་ཁྲོམ་ནང་ འཆོལ་ནད་མེདཔ་བཟོ་ནི་ལུ་ གསོ་ཁྱི་དང་ བྱི་ལི་ དེ་ལས་ འཆོལ་ནད་འཐོབ་ནི་གི་ ཉེན་ཁ་ཡོད་པའི་སེམས་ཅན་ཚུ་ སྨན་ཁབ་བཙུགས་དགོཔ་ད་ ས་མཚམས་ཕྱི་ཁ་ལས་ ཀི་ལོ་མི་ཊར་༡ གི་ས་ཁར་ཡོད་པའི་ སྒོ་ནོར་སེམས་ཅན་ཚུ་ཡང་ སྨན་ཁབ་བཙུགས་ནི་གི་ ལས་རིམ་ཡོད་ཟེར་ ཌོག་ཊར་ཀུན་ལེགས་རྡོ་རྗེ་གིས་ བཤདཔ་ཨིན་པས།
ཤ་བཏོག་དང་ སྨན་ཁབ་ མི་མང་བརྡ་སྤྲོད་ མི་སྡེ་འབྲེལ་གཏོགས་ དེ་ལས་ གསོ་ཁྱི་ཚུ་གི་ ཇོ་བདག་གིས་ ངོས་ལེན་གྱི་ཕན་ནུས་ཚུ་ གཏན་འཇགས་ཐོག་ལས་ དབྱེ་ཞིབ་འབད་ནིའི་དོན་ལུ་ དབྱེ་ཞིབ་དང་ ལྟ་རྟོག་ཆ་ཚང་ཅིག་ བཟོ་སྟེ་ཡོདཔ་ཨིན་པས།
ཤ་བཏོག་ནི་དང་ སྨན་ཁབ་ལས་རིམ་གྱིས་ འཆོལ་ནད་མར་ཕབ་དང་ འཕྲོད་བསྟེན་དང་འབྲེལ་བའི་ དཀའ་ངལ་ཚུ་བསལ་ཏེ་ ཉེན་སྲུང་ཡར་དྲག་སོང་ཡོདཔ་ཨིན་པས།
གཞུང་གིས་ ལོ་བསྟར་འཆོལ་ནད་བཀག་ཐབས་ཀྱི་ ལས་རིམ་ནང་ ཟད་འགྲོ་དངུལ་ཀྲམ་ས་ཡ་༩༣ བཏང་དོ་ཡོདཔ་ཨིན་པས།
ཌོག་ཊར་ཀུན་ལེགས་རྡོ་རྗེ་གིས་ སླབ་མིའི་ནང་ ཤ་བཏོག་ལས་རིམ་གྱིས་ སྤྱང་ཁྱི་ཚད་འཛིན་དང་ སེམས་ཅན་དང་འབྲེལ་བའི་ནད་གཞི་ཚུ་ མར་ཕབ་ཐོག་ ཉེན་སྲུང་ལྷན་ཐབས་འབད་ཚུགས་ཟེར་ཨིན་པས།
ཁོ་གིས་འབད་བ་ཅིན་ གནད་དོན་སྣ་ཚོགས་ཐོག་ལས་ འཆོལ་ནད་འཐོབ་ནི་ལས་ བཀག་ཐབས་ལུ་ མི་མང་བརྡ་སྤྲོད་དང་ ཤེས་ཡོན་བརྡ་སྤེལ་ཚུ་ གཏན་འཇགས་ཐོག་ལས་ འགོའ་དྲེན་འཐབ་དོ་ཟེར་ཨིན་པས།
གསོ་ཁྱི་དང་ འཆོལ་ནད་འབྲེལ་བའི་ སྒོ་ནོར་སེམས་ཅན་ཚུ་ འཆོལ་ནད་ལས་ བཀག་ཐབས་ངེས་བརྟན་བཟོ་ཐབས་ལུ་ ལོ་བསྟར་འཆོལ་ནད་བཀག་ཐབས་ཀྱི་ སྨན་ཁབ་ལས་རིམ་དེ་ འགོ་འདྲེན་འཐབ་དོ་ཡོདཔ་བཞིན་དུ་ མི་སེར་ཚུ་ལུ་ སྨན་ཁབ་ཚུ་ཡང་ རིན་མེད་སྟོང་པ་སྦེ་ བྱིན་དོ་ཡོདཔ་ཨིན་པས།
ཐབས་ལམ་ཚུ་ ཕན་ནུས་ཅན་ཅིག་སྦེ་བཏོན་པ་ཅིན་ འཆོལ་ནད་དེ་ བཀག་ཐབས་འབད་ཚུགས་ནི་ཨིན་རུང་ ནད་གཞི་དེ་ འཐོབ་པ་ཅིན་ ཤི་རྐྱེན་བྱུང་དོ་ཡོདཔ་ཨིན་པས།
ཌོག་ཊར་ཀུན་ལེགས་རྡོ་རྗེ་གིས་ སླབ་མིའི་ནང་ སྤྱང་ཁྱི་གི་ གྱངས་ཁ་འཛིན་སྐྱོང་འཐབ་སྟེ་ འཆོལ་ནད་ཀྱི་ སྨན་ཁབ་བཙུགས་ནི་ལུ་ ངེས་བརྟན་འབད་དོ་ཡོདཔ་ལས་ འཆོལ་ནད་དེ་ མི་ཚུ་གིས་ འཐོབ་ནི་ལས་ བཀག་ཐབས་འབད་ཚུགས་ཟེར་ཨིན་པས།
རོ་ཁྱི་གིས་ སོ་བཏབ་ནི་དེ་ མི་རློབས་༧༨༢,༤༥༥ ལུ་ གཞི་བཞག་སྟེ་ ལོ་བསྟར་བཞིན་དུ་ མི་རློབས་༡༠༠,༠༠༠ ལུ་ རོ་ཁྱི་༨༩༥ ལས་༧༠ དེ་ཅིག་ལུ་ མར་བབས་སོང་སྟེ་ཡོདཔ་ཨིན་པས།
མི་ཚུ་ལུ་ བརྒྱ་ཆ་༩༩ དེ་ཅིག་ རོ་ཁྱི་གིས་ སོ་བཏབ་མི་ལུ་བརྟེན་ འཆོལ་ནད་ཐོབ་དོ་ཡོདཔ་ཨིན་པས།
གསོ་ཁྱི་དང་ སྤྱང་ཁྱི།
འདས་པའི་རྒྱལ་ཡོངས་ལས་རིམ་ནང་ གསར་སྤང་ལུ་ སྤྱང་ཁྱི་༡,༠༠༠ དེ་ཅིག་ ཤ་བཏོག་སྟེ་ རྣམ་ཅོ་གུ་ ངོ་རྟགས་བཀལ་ཡོདཔ་ཨིན་པས།
ན་ཧིང་ སྤྱི་ཟླ་༩ པའི་ནང་ གཞུང་ལམ་བདའ་སྟེ་ཡོད་པའི་ རོ་ཁྱི་༣༦༠ དེ་ཅིག་ ཤེས་ལྕམ་ཐང་ལུ་ སྤོ་སོར་འབད་བའི་ཤུལ་ལས་ དགའ་སྐྱིད་གླིང་རྒེད་འོག་ གེ་ཏིམ་ཁ་ལུ་ གཞུང་ས་ཨེ་ཀར་༢ ཡོད་མི་ནང་ སྤོ་སོར་འབད་ཡོདཔ་ཨིན་པས།
གསོ་སྐྱོང་ཁང་ནང་བཞག་པའི་སྐབས་ རོ་ཁྱི་རེ་གིས་ ཉིན་བསྟར་ཟད་འགྲོ་དངུལ་ཀྲམ་༢༢ དང་༢༥ བར་ན་ གནས་ནིའི་ ཚོད་རྩིས་བཏོན་ཡོདཔ་བཞིན་དུ་ དཱལ་དང་ ཤ་ དེ་ལས་ ལྟོ་ཚུ་བྱིན་དོ་ཡོདཔ་ཨིན་པས།
འགོ་དཔོན་ཚུ་གིས་ བཤད་མིའི་ནང་ ད་ལས་ཕར་ རོ་ཁྱིའི་ཇོ་བདག་ཚུ་གིས་ འབག་དགོཔ་སྦེ་ སླབ་སྟེ་ཡོད་རུང་ ས་གནས་གཞན་ཁར་ སྤོ་སོར་འབད་ཚར་ཞིནམ་ལས་ ཇོ་བདག་ཚུ་གིས་ རོ་ཁྱི་ཚུ་ ཁོང་རའི་ གསོ་ཁྱི་ཨིནམ་སྦེ་ སླབ་སྟེ་འོང་པ་ཅིན་ ཉེས་ཆད་དང་ ཉེ་ས་བྱ་ཚུ་ བཀལ་ནི་ཨིནམ་བཞིན་དུ་ གསོ་ཁྱི་ཚུ་ཡང་ སྤྱང་འཁྱམས་སྡོད་བཅུག་ནི་ མི་འོང་ཟེར་ཨིན་པས།
རང་སོའི་གསོ་ཁྱི་ཚུ་ ཐོ་བཀོད་དང་ སྨན་ཁབ་ དེ་ལས་ ཤ་བཏོག་སྟེ་ ས་གནས་མི་ཚུ་གིས་ འགན་ཁུར་འབག་པ་ཅིན་ དགེ་ལེགས་ཕུག་དྲན་ཤེས་ཁྲོམ་ནང་ འཆོལ་ནད་མེདཔ་བཟོ་ནིའི་ དམིགས་ཡུལ་འགྲུབ་ཚུགས་ཟེར་ཨིན་པས།
གསར་སྤང་དེ་ ས་མཚམས་ཁར་ཡོདཔ་ལས་ འཆོལ་ནད་ཁྱབ་སྤེལ་འགྱོ་ནིའི་ ཉེན་ཁ་ཡོདཔ་ད་ ཉིན་བསྟར་བཞིན་དུ་ ཤ་མ་བཏོག་པའི་ རོ་ཁྱི་༢ དང་༣ དེ་རེ་ བཟུང་དོ་ཡོདཔ་ཨིན་པས།
གསོ་ཁྱི་གི་ ཇོ་བདག་ཅིག་གིས་ སླབ་མིའི་ནང་ རོ་ཁྱི་ཚུ་ག་ར་ གསོ་སྐྱོང་ཁང་ནང་བཞག་པ་ཅིན་ འཆོལ་ནད་ལས་ བཀག་ཐབས་འབད་ཚུགས་པའི་ཁར་ ས་མཚམས་ཕྱི་ཁའི་ སྤྱང་ཁྱི་ཚུ་ཡང་ ནང་ན་འཛུལ་མ་བཅུག་པ་ཅིན་ ཉེན་སྲུང་དང་ལྡནམ་སྦེ་ འགྱོ་ནི་མས་ཟེར་ཨིན་པས།
འགོ་དཔོན་ཅིག་གིས་ སླབ་མིའི་ནང་ གལ་སྲིད་ ས་མཚམས་ཕྱི་ཁའི་ སྤྱང་ཁྱི་ཚུ་ ནང་ན་འཛུལ་མ་བཅུག་པར་བཞག་པ་ཅིན་ ལོ་༦ གི་ནང་འཁོད་ལུ་ རོ་ཁྱིའི་གྲངས་འབོར་ཚད་འཛིན་འབད་ཚུགས་ཟེར་ཨིན་པས།
འཛམ་གླིང་གསོ་བའི་ཚོགས་སྡེ་དང་ རྒྱལ་སྤྱི་བཟའ་འཐུང་དང་སོ་ནམ་ལས་ཚོགས་ འཛམ་གླིང་སེམས་ཅན་འཕྲོད་བསྟེན་ལ་སོགས་པ་ཚུ་གིས་ རྒྱལ་ཁབ་ནང་ སྤྱི་ལོ་༢༠༣༠ འི་ནང་འཁོད་ལུ་ འཆོལ་ནད་མེདཔ་བཟོ་ནི་ལུ་ རྒྱབ་སྐྱོར་འབད་ཡོདཔ་ཨིན་པས།
ལྷོ་ཡེ་ཤེ་ཡ་ལུང་ཕྱོགས་ནང་ རྒྱལ་ཁབ་༩ ལུ་ འཆོལ་ནད་དར་ཁྱབ་སོང་མི་ཚུ་ཡང་ བང་ལ་དེཤི་དང་ འབྲུག་ ཀོ་རི་ཡ་ རྒྱ་གར་ ཨིན་ཌོ་ནི་ཤི་ཡ་ མེ་ཡན་མར་ ནེ་པཱལ་ ཤྲི་ལངྐ་ དེ་ལས་ ཐའི་ལེནཌི་ཚུ་ ཨིན་པའི་གནས་ཚུལ།

ཨོ་རྒྱན་རྡོ་རྗེ།

Advertisement