༉ རྒྱལ་ཁབ་ནང་འཁོད་ཀྱི་ བཟོ་གྲྭ་དང་ཚོང་ལས་ཆུང་བ་ཚུ་གིས་ ཕྱི་ཁའི་མཁས་མཆོག་ཚུ་བརྩིས་ཏེ་ རིག་རྩལ་ཅན་ཚུ་ གསར་བཙུགས་འབད་ནི་ལུ་ ལཱ་ཁག་རྐྱབ་དོ་ཡོདཔ་ད་ དེ་ཡང་ འབབ་ཁུངས་ཁྲལ་གྱི་བཅའ་ཡིག་དང་སྒྲིག་གཞི་༢༠༠༡ གི་འོག་ལུ་ དངུལ་ཕོགས་ཀྱི་མཐོ་ཚད་ བཟོ་མི་ལུ་བརྟེན་ཨིན་པས།
དངུལ་ཕོགས་མཐོ་ཚད་དེ་གིས་ ལས་སྡེའི་སྦོམ་ཆུང་དང་འཁྲིལ་ཏེ་ ཟླ་རིམ་དངུལ་ཕོགས་ཀྱི་ ཚད་གཞི་བཟོ་བའི་ཁར་ གྲུབ་འབྲས་མཐོ་དྲགས་ཡོད་མི་ ཁྱད་རིགཔ་ཚུ་ལུ་བརྟེན་སྡོད་མི་ ཚོང་ལས་ཚུ་གི་དོན་ལུ་ དཀའ་ངལ་སྦོམ་ཤོས་ཅིག་ཨིན་པས།
ད་ལྟོའི་ ཁྲལ་གྱི་སྒྲིག་གཞི་འོག་ལུ་ གསལ་བཀོད་ཚད་གཞི་ལས་མཐོ་བའི་ དངུལ་ཕོགས་ཚུ་ཡང་ བཟོ་གྲྭ་ཆེ་བའི་དོན་ལུ་ དངུལ་ཀྲམ་༧༠,༠༠༠ དང་ བཟོ་གྲྭ་བར་མའི་དོན་ལུ་ དངུལ་ཀྲམ་༦༠,༠༠༠ བཟོ་གྲྭ་ཆུང་བའི་དོན་ལུ་ དངུལ་ཀྲམ་༤༠,༠༠༠ དེ་ལས་ ནང་བཟོ་ཚུ་གི་དོན་ལུ་ དངུལ་ཀྲམ་༣༠,༠༠༠ ཨིནམ་ད་ དེ་ཡང་ ཚོང་འབྲེལ་ཟད་འགྲོ་བཟུམ་ཅིག་སྦེ་ མ་བཏོགས་པར་ཡོདཔ་ཨིན་པས།
མཐོ་ཚད་འདི་ལས་བརྒལ་མི་ ལས་སྡེ་ཚུ་ ཁྲལ་གྱི་བརྟག་ཞིབ་སྐབས་ ཉེས་ཆེད་ཚུ་ ཕོག་དོ་ཡོདཔ་ལས་ ལཱ་གཡོག་གི་ཚོང་འབྲེལ་ནང་ ལས་སྡེ་ཚུ་ དོ་འགྲན་འབད་ནི་ལུ་ ལཱ་ཁག་རྐྱབ་ཨིན་པས།
ཚོང་ལས་ཆུང་བའི་ ཇོ་བདག་ཅིག་གིས་ སླབ་མིའི་ནང་ ལས་སྡེའི་སྦོམ་ཆུང་ལུ་ གཞི་བཞག་སྟེ་ དངུལ་ཕོགས་མཐོ་ཚད་བཟོ་བའི་སྐོར་ལས་ ཤེས་རྟོགས་མེད་ཟེར་ཨིནམ་ད་ ཁོ་གི་ དམིགས་ཡུལ་དེ་ར་ མ་དངུལ་རྒྱུན་བརྟན་དང་ ལཱ་གཡོག་ཡིད་ཚིམ་ཨིནམ་ད་ དེ་ཡང་ ཐོན་སྐྱེད་དང་ གཏན་བཞག་གི་དོན་ལུ་ གལ་གནད་ཆེ་ཟེར་ཨིན་པས།
ཁོ་གིས་ སླབ་མིའི་ནང་ ཁྲལ་བཏབ་པའི་སྐབས་ལུ་ མཐོ་ཚད་ལས་བརྒལ་མི་ དངུལ་ཕོགས་ཚུ་གི་ཐད་ཁར་ ཁྲལ་ཐེབས་དང་ ཉེས་ཆེད་ཚུ་ ཕོག་ཟེར་སླབ་མས་ཟེར་ཨིནམ་ད་ ཐིམ་ཕུག་བཟུམ་མའི་ གོང་ཚད་མཐོ་བའི་ས་ཁོངས་ཚུ་ནང་ ཚོང་ལས་ཆུང་ཀུ་ཚུ་གི་དོན་ལུ་ གནས་སྟངས་འདི་ལུ་ རྒྱ་ཆེར་བལྟ་དགོཔ་འདུག་ཟེར་ཨིནམ་ད་ དེ་ཡང་ ག་འཆརཔ་ཟེར་བ་ཅིན་ ཚད་ལྡན་དངུལ་ཕོགས་མཐོ་ཚད་ཀྱིས་ འཚོ་བའི་གནས་སྟངས་ཀྱི་ ཟད་འགྲོ་ངོ་མ་དང་ མཐུན་མི་ཚུགས་པས་ཟེར་ཨིན་པས།
འབབ་ཁུངས་ཁྲལ་གྱི་བཅའ་ཡིག་དང་སྒྲིག་གཞི་༢༠༠༡ དང་འཁྲིལཝ་ད་ ཁེ་འཐུས་ཡོངས་བསྡོམས་དེ་ ཁེ་སང་ངེས་ཏིག་ལས་ ཉུང་མཐའ་བརྒྱ་ཆ་༡༠ དང་ ཡང་ཅིན་ ལས་བྱེདཔ་རེ་ལུ་ ཟླཝ་༣ གྱི་གཞི་རྟེན་དངུལ་ཕོགས་ ག་ཉུང་མི་དེ་ སྤྲོད་དགོཔ་སྦེ་ཨིན་པས།
དངུལ་རྩིས་ལྷན་ཁག་གི་ འགོ་དཔོན་ཅིག་གིས་ སླབ་མིའི་ནང་ ཇོ་བདག་དང་ མཉམ་རོགས་ངོ་མ་བཟུམ་མའི་ ཚོང་སྡེའི་གྲངས་སུ་མ་བཙུགས་མི་ཚུ་གི་དོན་ལུ་ དངུལ་ཕོགས་མཐོ་ཚད་དེ་ དྲང་བདེན་ཁྲལ་ཡར་དྲག་གཏང་ནི་དང་ ཁྲལ་ལས་ཟུར་ཐབས་ ཉུང་སུ་བཟོ་ནིའི་དོན་ལུ་ཨིན་པས།
ནང་བཟོ་ཅིག་གི་ ཇོ་བདག་གིས་ སླབ་མིའི་ནང་ ཁྲལ་ལས་ཟུར་ཐབས་འབད་མི་དེ་ ཁྲིམས་འགལ་ཉེས་སྤྱོད་ཨིན་ཟེར་ཨིནམ་ད་ འགན་འཁྲི་ཅན་གྱི་ ཚོང་སྡེ་གང་རུང་གིས་ ཁྲིམས་དང་འཁྲིལ་དགོ་ཟེར་ཨིན་པས།
རྒྱལ་ཡོངས་རྩིས་དཔྱད་བཀོད་འཛིན་གྱི་ ཟླཝ་༣ རེ་འབད་མི་ སྙན་ཞུ་༣ པམ་དང་འཁྲིལཝ་ད་ དུས་ཅི་ རྒྱལ་ཁབ་ནང་ བཟོ་གྲྭ་ཆེ་བ་༤༤༠ དང་ བཟོ་གྲྭ་བར་མ་༨༠༤ བཟོ་གྲྭ་ཆུང་བ་༡༨,༡༩༩ དེ་ལས་ ནང་བཟོ་༡༠,༧༥༤ ཡོདཔ་ད་ བཟོ་གྲྭ་ཆུང་བ་དང་ ནང་བཟོ་ཚུ་གི་གྲས་ལས་ ཐོན་སྐྱེད་དང་བཟོ་སྒྱུར་ལས་སྡེ་ནང་༣,༩༨༡ དང་ ཞབས་ཏོག་ལས་སྡེ་ནང་༢༤,༢༥༠ དེ་ལས་ བཟོ་སྐྲུན་ལས་སྡེ་ནང་༡,༩༧༠ ཡོད་པའི་གནས་ཚུལ།
བཙན་སྐྱོགས་དབང་འདུས།