༉ དུང་དཀར་སློབ་གྲྭ་ཆུང་བའི་ནང་ གཞི་རྟེན་མཐུན་རྐྱེན་ཚུ་ ལངམ་སྦེ་མེདཔ་ལས་ སློབ་ཕྲུག་དང་ སློབ་དཔོན་ དེ་ལས་ ཨ་ལུ་གཅེས་སྐྱོང་པ་ཚུ་ལུ་ དཀའ་ངལ་དང་ གདོང་ལེན་སྦོམ་སྦེ་ར་ བྱུང་དོ་ཡོདཔ་ཨིན་པས།
ཀུར་སྟོད་རྒེད་འོག་ནང་ དུང་དཀར་སློབ་གྲྭ་ཆུང་བ་༡ ལས་བརྒལ་ མེདཔ་ཨིན་པས།
རྫོང་ཁག་བདག་སྐྱོང་གིས་ ཞུ་བ་འབད་མི་དང་འཁྲིལ་ཏེ་ སློབ་གྲྭའི་ཉེ་འདབས་ལུ་ཡོད་པའི་ མི་དབང་འཇིགས་མེད་རྣམ་རྒྱལ་(རྒྱལ་བརྒྱུད་ཀྱི་མ་ཁྱིམ)གྱི་ རྒྱལ་རབས་དང་ རང་ལུགས་ཀྱི་གནས་ཉམས་སྲུང་འབད་ནིའི་དོན་ལུ་ སློབ་གྲྭ་དེ་ སྤོ་བཤུད་འབད་ཡོདཔ་ཨིན་རུང་ གྲུབ་འབྲས་དེ་ འཆར་གཞི་དང་འཁྲིལ་ཏེ་ འཐོན་མ་བཏུབ་ཨིན་པས།
ལས་འགུལ་གྱི་ ལས་སྣའི་གོ་རིམ་དང་པའི་ནང་ སློབ་ཁང་༨ དང་ སྡོད་ཁྱིམ་༣ ཐབ་ཚང་ སློབ་ཕྲུག་ཚུ་གི་ གཙང་སྦྲ་འཕྲོད་བསྟེན་ཁང་ དེ་ལས་ སྡོད་ཁང་ཚུ་རྐྱབ་པའི་སྐབས་ ཟད་འགྲོ་དངུལ་ཀྲམ་ས་ཡ་༦༣.༤༠༣ བཏང་ཡོད་རུང་ དགོས་མཁོ་ཅན་གྱི་མཐུན་རྐྱེན་ཚུ་ ཚངམ་སྦེ་མེདཔ་ལས་ འཕྲོ་མཐུད་དེ་ར་ དཀའ་ངལ་བྱུང་དོ་ཡོདཔ་ཨིན་པས།
ད་རེས་ བདག་སྐྱོང་ཁང་མིག་དང་ སློབ་ཕྲུག་ཚུ་ལྟོ་བཟའ་ས་ སློབ་དཔོན་ཚུ་གི་སྡོད་ཁྱིམ་ ཚན་རིག་བརྟག་དཔྱད་ཁང་ དེ་ལས་ དབུ་འཛིན་གྱི་སྡོད་ཁྱིམ་དང་ གཞི་རྟེན་མཐུན་རྐྱེན་གཙོ་བོ་ཚུ་ མཇུག་མ་བསྡུ་བར་ཡོདཔ་ཨིན་པས།
སློབ་དཔོན་ཚུ་གིས་ གསང་སྤྱོད་དེ་ ཉམས་བཅོས་འབད་ཐོག་ སྦ་སྒོར་རྐྱབ་སྟེ་ སློབ་གྲྭ་གི་ ལས་བྱེད་པའི་ ཡིག་ཚང་ཅིག་སྦེ་ ལག་ལེན་འཐབ་དོ་ཡོདཔ་ཨིན་པས།
སློབ་དཔོན་ཅིག་གིས་ སླབ་མིའི་ནང་ ཡིག་ཚང་དེ་ ལེགས་ཤོམ་མེདཔ་ལས་ སློབ་གྲྭའི་ ལཱ་འབད་ནི་དང་ ལཱ་གི་གྲུབ་འབྲས་ཚུ་ འཐོན་ནི་ལུ་ དཀའ་ངལ་དང་ གདོང་ལེན་ཚུ་ བྱུངམ་མས་ཟེར་ཨིན་པས།
ཨ་ལུ་གཅེས་སྐྱོང་པ་ཚུ་ཡང་ གནས་ཚད་ལྡན་པའི་ སྡོད་ཁྱིམ་དང་འབྲེལ་བའི་ མཐུན་རྐྱེན་མེདཔ་ལས་ སློབ་གྲྭའི་ཉལ་ཁྱིམ་ནང་ སྡོད་མི་ལུ་བརྟེན་ དཀའ་ངལ་ཚུ་ བྱུང་བཞིན་ཡོདཔ་ཨིན་པས།
གཞི་རྟེན་མཐུན་རྐྱེན་ ཡོངས་འབྲེལ་གྱི་ ཞབས་ཏོག་ལེགས་ཤོམ་དང་ ཀམ་པིའུ་ཊར་ཚད་གཅིག་ལས་བརྒལ་མེད་མི་ ཁྲོམ་ལམ་མེ་ ར་བ་ལ་སོགས་པ་ཚུ་ མེདཔ་ཨིན་པས།
ད་རེས་ སློབ་གྲྭའི་དཔེ་མཛོད་ཀྱི་ ཀི་དེབ་ཚུ་ཡང་ སྟེང་སྒོ་ལུ་ བཞག་སྟེ་ཡོདཔ་ལས་ སྒོ་ནོར་སེམས་ཅན་ཚུ་གིས་ མེདཔ་གཏང་ནིའི་ ཉེན་ཁ་ཡོདཔ་ཨིན་པས།
དུང་དཀར་ཚོགས་པ་ བཀྲ་ཤིས་རྒྱ་མཚོ་གིས་ ཀུར་སྟོད་སློབ་གྲྭ་ནང་ གཞི་རྟེན་མཁོ་ཆས་ཚུ་ ལངམ་སྦེ་མེདཔ་ལས་ སློབ་ཕྲུག་དང་ སློབ་དཔོན་ཚུ་ལུ་ དཀའ་ངལ་བྱུང་ཡོད་པའི་ ཚ་གྱང་ཡོད་ལུགས་ཚུ་ བཤདཔ་ཨིན་པས།
ཁོ་གིས་འབད་བ་ཅིན་ སློབ་གྲྭའི་གནད་དོན་ཚུ་ སེལ་ཐབས་འབད་ནིའི་དོན་ལུ་ གཞུང་ལས་ར་ རྒྱབ་སྐྱོར་གནང་དགོཔ་ འདུག་ཟེར་ཨིན་པས།
སློབ་ཕྲུག་ཚུ་གི་ ཕམ་དང་ ས་གནས་ཀྱི་མི་སེར་ཚུ་གིས་ གནས་སྐབས་ཀྱི་ བཞེས་སྒོ་འབད་སའི་ ཁང་མིག་ཅིག་ རྐྱབ་ཡོད་རུང་ དཀའ་ངལ་དེ་ བསལ་ཐབས་མ་ཚུགས་པར་ ཡོདཔ་ཨིན་པས།
རྫོང་ཁག་ཤེས་རིག་ལས་ཚན་གྱིས་ ཤེས་རིག་དང་རིག་རྩལ་གོང་འཕེལ་ལྷན་ཁག་ལུ་ མཐུན་རྐྱེན་ཁ་སྐོང་དགོ་པའི་ ཞུ་བ་འབད་རུང་ རྩིས་ལོ་༢༠༢༤_༢༥ གི་དོན་ལུ་ ལྷག་ལུས་མཐུན་རྐྱེན་ཚུ་ རྐྱབ་ནིའི་དོན་ལུ་ ཆ་འཇོག་མ་འབད་བར་ཡོདཔ་ལས་ མཐུན་རྐྱེན་ཚུ་ མ་བྱིན་ཚུན་ཚོད་ སློབ་གྲྭའི་ནང་ དཀའ་ངལ་བྱུང་བཞིན་དུ་ སྡོད་ནི་ཨིན་པས།
སློབ་དཔོན་ཅིག་གིས་ སླབ་མིའི་ནང་ གདོང་ལེན་བྱུང་རུང་ ཤུལ་མའི་ལོ་ངོ་༡ དང་༢ ཀྱི་ནང་འཁོད་ལུ་ བཟོ་སྐྲུན་གྱི་ལཱ་ འགོ་བཙུགས་ཚུགས་པའི་ རེ་བ་བསྐྱེད་དེ་ ཡོད་ཟེར་ཨིན་པས།
ད་རེས་ནངས་པར་ སློབ་གྲྭ་དེ་གིས་ ཀུར་སྟོད་རྒེད་འོག་གི་ སྤྱི་འོག་༥ དང་ སྒང་ཟུར་རྒེད་འོག་གི་ སྤྱི་འོག་༡ ལས་ སློབ་ཕྲུག་༩༦ ལུ་ ཞབས་ཏོག་བྱིན་དོ་ཡོདཔ་ཨིན་པས།
སྤྱི་འོག་ཅིག་གི་ ཉེ་འདབས་ལུ་ བསྟན་སྲུང་དམག་སྡེའི་ བྱང་སེང་ཅིག་ གཞི་བཙུགས་འབད་མི་དང་བསྟུན་ སློབ་ཕྲུག་འཛུལ་ཞུགས་ཀྱི་ གྱངས་ཁ་ཡར་སེང་འགྱོ་ནི་ཨིནམ་ལས་ གཞི་རྟེན་མཐུན་རྐྱེན་ཚུ་ ལངམ་སྦེ་དགོཔ་ཨིན་པས།
ཤེས་རིག་ལྷན་ཁག་གི་ འགོ་དཔོན་ཅིག་གིས་ ཡུན་འགྱངས་ལུས་མི་ལུ་ ངོས་ལེན་འབད་ཐོག་ལས་ སླབ་མིའི་ནང་ གནད་དོན་དེ་ཡང་ ཀོ་བིཌ་-༡༩ ལུ་ མ་དངུལ་ཚུ་ ལོག་སྤྱོད་འབད་མི་ལུ་བརྟེན་ ཨིན་ཟེར་ཨིན་པས།
ཁོ་གིས་འབད་བ་ཅིན་ འཆར་གཞི་ ༡༣ པའི་ནང་ སློབ་གྲྭའི་མཐུན་རྐྱེན་ཚུ་ ཡར་དྲག་གཏང་ནི་ལུ་ ཁས་བླངས་འབད་ཡོདཔ་བཞིན་དུ་ ལྷན་ཁག་གིས་ སློབ་གྲྭ་ཚུ་ནང་ དགོས་མཁོ་ཅན་གྱི་མཐུན་རྐྱེན་ བཞེས་སྒོ་འབད་སར་དང་ གསང་སྤྱོད་ སློབ་ཁང་ དེ་ལས་ རྩེད་རིགས་མཐུན་རྐྱེན་དང་ གྲོང་གསེབ་ཀྱི་ སློབ་དཔོན་ཚུ་གི་ སྡོད་ཁྱིམ་ཚུ་ གཙོ་རིམ་བཟུང་སྟེ་ ཡོད་ཟེར་ཨིན་པས།
སློབ་གྲྭ་ནང་ བགོ་བཀྲམ་འབད་མི་ མཐུན་རྐྱེན་ཚུ་ ཁུངས་ལྡན་སྦེ་ ལག་ལེན་འཐབ་ནི་དང་ རྒྱལ་ཁབ་ནང་ཡོད་མི་ སློབ་གྲྭ་༥༦༧ ཚུ་ ཚབས་ཅན་གྱི་ གནད་དོན་ཚུ་ཡང་ སེལ་ཐབས་འབད་ནིའི་ འཆར་གཞི་ཡོདཔ་ཨིན་པས།
དུང་དཀར་སློབ་གྲྭ་དེ་ རྫོང་ཁག་བདག་སྐྱོང་ལས་ ཀི་ལོ་མི་ཊར་༥༠ གི་ས་ཁར་ཡོདཔ་ལས་ གདོང་ལེན་སྦོམ་སྦེ་ར་ བྱུང་དོ་ཡོདཔ་ཨིན་པས།
སློབ་གྲྭའི་ ལས་སྣ་ཚུ་ བར་ཆད་མེད་པར་ རྒྱུན་སྐྱོང་འཐབ་ནི་ལུ་ གནས་སྐབས་ཀྱི་ཐབས་ཤེས་ཚུ་ བཏོན་ཡོད་རུང་ མི་སྡེ་དང་ སློབ་དཔོན་ཚུ་གིས་ སློབ་ཕྲུག་ཚུ་གི་ ཤེས་ཡོན་སྦྱང་སའི་གནས་སྟངས་ ལེགས་ཤོམ་བཟོ་ཐབས་ལུ་ མཐུན་རྐྱེན་རྐྱབ་མ་ཚར་ཡོད་མི་ཚུ་ལུ་ གཙོ་རིམ་བཟུང་སྟེ་ གང་མགྱོགས་མཇུག་བསྡུ་དགོཔ་སྦེ་ གཞུང་ལུ་ ཡང་བསྐྱར་ཞུ་བ་འབད་དེ་ ཡོད་པའི་གནས་ཚུལ།
བཅོ་ལྔ་ལྷམོ་དང་ ཨ་ནི་ཤ་རའེ།