༉ ནངས་པ་ལས་ གནམ་དགུན་གྱི་ སྤྱི་ཚོགས་འགོ་བཙུགསཔ་དང་འབྲེལ་ རྒྱལ་ཡོངས་ཚོགས་སྡེ་གིས་ དཔྱད་ཡིག་༥ དང་ སྲིད་བྱུས་བསྐྱར་ཞིབ་སྙན་ཞུ་༦ དེ་ལས་ གན་རྒྱ་༡ གུ་ གསུང་གྲོས་གནང་ནི་ཨིན་པས།
རྒྱལ་ཡོངས་ཚོགས་སྡེའི་ ཚོགས་ཐེངས་༣༤ པའི་ནང་ གསུང་གྲོས་གནང་ནི་གི་ དཔྱད་ཡིག་ཚུ་ཡང་ འབྲུག་གི་ཅ་ཆས་དང་ཞབས་ཏོག་ཁྲལ་གྱི་འཕྲི་སྣོན་དཔྱད་ཡིག་༢༠༢༤ ཅན་མ་དང་ འབྲུག་གི་ནོར་ཁྲལ་དགོངས་ཡངས་ཀྱི་དཔྱད་ཡིག་ འབྲུག་གི་གཉེན་འབྲེལ་འཕྲི་སྣོན་དཔྱད་ཡིག་ འབྲུག་གི་གདམ་ཁ་ཅན་གྱི་འཁོན་འདུམ་འཕྲི་སྣོན་དཔྱད་ཡིག་ དེ་ལས་ འབྲུག་གི་རྒྱལ་ཡོངས་ཚོགས་འདུའི་འཕྲི་སྣོན་དཔྱད་ཚུ་ཨིན་པས།
རྒྱལ་ཡོངས་ཚོགས་སྡེ་གིས་ ཚོགས་ཐེངས་༣༣ པའི་ གྲོས་ཆོད་དང་ལེན་སྙན་ཞུ་དང་ འབྲུག་རྒྱལ་ཁབ་ནང་ ལྟ་བཤལ་གྱི་གནས་སྟངས་གུ་ བར་མཚམས་ཀྱི་སྙན་ཞུ་ དེ་ལས་ ཤེས་རིག་དང་འབྲེལ་བའི་ཁྲིམས་ལུགས་ཀྱི་ བསྐྱར་ཞིབ་སྙན་ཞུའི་གུ་ གྲོས་བསྡུར་འབད་ནི་ཨིན་པས།
གཏན་འཇགས་ཚོགས་ཁང་གིས་ གྲོང་གསེབ་སྐྱིན་འགྲུལ་གྱི་བསྐྱར་ཞིབ་སྙན་ཞུ་དང་ འབྲུག་གི་བརྡ་བརྒྱུད་ཀྱི་གནས་སྟངས་བསྐྱར་ཞིབ་ ལོ་བསྟར་ངན་ལྷད་བཀག་སྡོམ་ལྷན་ཚོགས་ཀི་སྙན་ཞུ་༢༠༢༣-༢༠༢༤ ཅན་མ་ བསྐྱར་ཞིབ་སྙན་ཞུ་ཚུ་ལུ་ཡང་ གསུང་གྲོས་གནང་ནི་ཨིན་པས།
བསྐྱར་ཞིབ་ཚོགས་ཁང་གིས་ བཀོད་མིའི་ནང་ ཚོགས་བཞུགས་ནང་ དཔལ་ལྡན་འབྲུག་གཞུང་དང་ ཀུ་ཝིཊ་གཞུང་གི་བར་ན་ མཁའ་འགྲུལ་ཞབས་ཏོག་གི་གན་རྒྱ་གུ་ གསུང་གྲོས་གནང་ནི་གི་ གྲོས་ཆོད་བྱུང་སྟེ་ ཡོད་ཟེར་ཨིན་པས།
སྤྱི་ཚོགས་ལྷན་བཞུགས་ནང་ དམངས་རྩིས་ཚོགས་ཆུང་གིས་ སྤྱི་ལོ་༢༠༢༤ ལོའི་ རྒྱལ་ཁམས་ས་གཏར་ལས་འཛིན་ཚད་ཀྱི ལས་སྤྱོད་དང་ འབྲེལ་བའི་ ལས་འབྲེལ་རྩིས་ཞིབ་ སྙན་ཞུའི་བསྐྱར་ཞིབ་སྙན་ཞུ་ གསལ་ཞུ་འབད་དེ་ གྲོས་གནང་ནི་ཨིན་པས།
རྒྱལ་ཡོངས་ཚོགས་སྡེ་དེ་ སྤྱི་ཟླ་༡༢ པའི་ཚེས་༡༠ ལུ་ མཇུག་བསྡུ་གནང་ནི་ཨིན་པའི་གནས་ཚུལ།
ཨོ་རྒྱན་རྡོ་རྗེ།