༉ འབྲུག་གི་བློན་ཆེན་བགྲེསཔ་ ཌོག་ཊར་ བློ་གྲོས་ཚེ་རིང་དེ་ དགེ་ལེགས་ཕུག་དྲན་ཤེས་ཁྲོམ་གྱི་ སྤྱི་ཁྱབ་སྦེ་ བསྐོ་བཞག་འབད་ཡོདཔ་ཨིན་པས།
མི་དབང་མངའ་བདག་རིན་པོ་ཆེ་མཆོག་གིས་ སྤྱི་ལོ་༢༠༢༤ ཟླ་༡༠པའི་ཚེས་༡ ལུ་ སྤ་རོ་ དུང་དཀར་རྫོང་ནང་ འབྲུག་གསར་བཏོད་གྲོས་འཛོམས་ འགོ་འབྱེད་འབད་བའི་སྐབས་ དགེ་ལེགས་ཕུག་དྲན་ཤེས་ཁྲོམ་གྱི་ མདོ་ཆེན་བཀོད་ཚོགས་ཀྱིས་ གྲོས་འདེབས་ཕུལ་མི་དང་བསྟུན་ བསྐོ་བཞག་གནང་ཡོདཔ་ཨིན་པས།
སྤྱི་ཁྱབ་ཌོག་ཊར་ བློ་གྲོས་ཚེ་རིང་གིས་ ཁོ་རའི་ འགན་ཁུར་གསརཔ་དང་འཁྲིལཝ་ད་ དགེ་ལེགས་ཕུག་དྲན་ཤེས་ཁྲོམ་དང་འབྲེལ་བའི་ ཐབས་བྱུས་ཀྱི་ ནང་འཁོད་ལག་ལེན་ འགོ་ཁྲིད་འབད་ནི་ཨིནམ་བཞིན་དུ་ ཡུན་བརྟན་གོང་འཕེལ་གྱི་དོན་ལུ་ འབྲུག་པའི་བརྩི་མཐོང་དང་ མི་དབང་མངའ་བདག་རིན་པོ་ཆེ་མཆོག་གི་ འཆར་སྣང་དང་བསྟུན་ གོང་འཕེལ་གཏང་དགོཔ་ཨིན་པས།
ཁོ་གིས་ ནང་འཁོད་ལག་ལེན་ཚུ་ ལྟ་རྟོག་འབད་ནི་ཨིན་པའི་ཁར་ རྒྱལ་ཡོངས་ཀྱི་ གཙོ་རིམ་ཚུ་ མཉམ་སྡེབ་འབད་ནིའི་དོན་ལུ་ གཞུང་དང་ འབྲེལ་གཏོགས་འབད་མི་ དེ་ལས་ བཀོད་ཚོགས་དང་གཅིག་ཁར་ མཉམ་འབྲེལ་འབད་ནི་ཨིན་པས།
བཀོད་ཁྱབ་གཙོ་འཛིན་ མཱུན་ལི་འོང་ ལིའུ་དང་གཅིག་ཁར་ ལཱ་འབད་ཐོག་ལས་ སྤྱི་ཁྱབ་ཌོག་ཊར་ བློ་གྲོས་ཚེ་རིང་གིས་ སྲིད་བྱུས་དང་ གཞི་རྟེན་མཁོ་ཆས་ལས་འགུལ་ དེ་ལས་ ས་གནས་ཀྱི་ལཱ་ཚུ་ འགོ་འདྲེན་འཐབ་ནི་ལུ་ གཙོ་བོར་བཏོན་ནི་ཨིནམ་ད་ ཁོ་གི་འགན་ཁུར་དེ་གིས་ ཁྲོམ་སྡེའི་གོང་འཕེལ་དེ་ ས་གནས་ཀྱི་དགོས་མཁོ་དང་ རྒྱལ་སྤྱིའི་གནས་ཚད་ཚུ་ནང་ ཚོད་འཛིན་འབད་ནི་ཨིནམ་ལས་ འབྲུག་གི་ངོ་རྟགས་དང་ ཁྲོམ་གྱི་གནས་སྟངས་ ཡར་དྲག་གཏང་ནིའི་ནང་ དྲན་ཤེས་དང་ ཡུན་བརྟན་ཁྲོམ་སྡེ་གོང་འཕེལ་དོན་ལུ་ དཔེ་སྟོན་ཅིག་སྦེ་ ངེས་བརྟན་འབད་ནི་ཨིན་པས།
ཁོ་ར་ ནང་འཁོད་དབང་འཛིན་ གཙོ་ཅན་ཅིག་ཨིནམ་ལས་ གོང་འཕེལ་གྱི་གནས་སྟངས་ཚུ་ ཡུན་བརྟན་བཟོ་ནི་གི་ འཆར་གཞི་ཚུ་བརྩམ་ནི་ཨིནམ་བཞིན་དུ་ ཁོ་གིས་ ཐད་ཀར་དུ་ མདོ་ཆེན་ཚོགས་ཆུང་ལུ་ སྙན་ཞུ་འབད་དགོཔ་ཨིན་པའི་གནས་ཚུལ།
བཙན་སྐྱོགས་དབང་འདུས།