༉ བློན་ཆེན་ཡིག་ཚང་གིས་ གནས་ཚུལ་གསར་བཏོན་འབད་མི་དང་འཁྲིལཝ་ད་ བློན་ཆེན་ཚེ་རིང་སྟོབས་རྒྱས་མཆོག་གིས་ སྤྱི་ཟླ་༦ པའི་ཚེས་༢༥ ལས་༢༨ ཚུན་ ཐའེ་ལེནཌི་ལུ་ གཞུང་འབྲེལ་གྱི་ གཟིགས་སྐོར་གནང་ནི་ཨིནམ་ད་ དེ་ཡང་ ཐའི་ལེནཌི་གི་ བློན་ཆེན་སི་རིཊ་ཐཱ་ ཐ་བི་སིན་གྱིས་ མགྲོན་བརྡ་ཕུལ་ནི་དང་བསྟུན་ཨིན་པས།
བློན་ཆེན་གྱི་ཕྱག་ཞུ་སྟེ་ ཁོ་རའི་གནས་ཚང་ ཨམ་བཀྲིས་སྒྲོལ་མ་དང་ ཕྱི་འབྲེལ་དང་ཕྱིར་ཚོང་བློན་པོ་ ཌི་ཨེན་དུང་གེལ་ ནང་སྲིད་བློན་པོ་ཚེ་རིང་ དེ་ལས་ གཞུང་གི་ཆེ་མཐོའི་འགོ་དཔོན་ཚུ་ འགྱོ་ནི་ཨིན་པས།
གཟིགས་སྐོར་གྱི་སྐབས་ལུ་ བློན་ཆེན་གྱིས་ ཐའེ་ལེནཌི་གི་ མི་དབང་རྒྱལཔོ་དང་ རྒྱལ་བཙུན་རྣམ་༢ ཀྱི་ སྐུ་མདུན་ལུ་བཅར་ནི་ཨིནམ་མ་ཚད་ བློན་ཆེན་ཐ་བི་སིན་དང་ ཐའི་གཞུང་གི་ ཆེ་མཐོའི་དབུ་ཁྲིདཔ་ཚུ་དང་གཅིག་ཁར་ འཕྱད་ནིའི་ལས་རིམ་ཡོདཔ་ཨིན་པས།
བློན་ཆེན་གྱིས་ རྒྱལ་ཁབ་༢ ཀྱི་བར་ནའི་ ལྟ་བཤལ་མཉམ་འབྲེལ་ གོང་འཕེལ་གཏང་ནི་དང་ ཚོང་འབྲེལ་རྒྱ་སྐྱེད་འབད་ནི་ རྩེད་རིགས་ནང་ མཉམ་འབྲེལ་འབད་ནི་ དེ་ལས་ བཀག་ཆ་མེད་པའི་ཚེང་འབྲེལ་གྱི་ གསུང་གྲོས་ཚུ་གནང་ནི་ཨིན་པས།
འདི་བཟུམ་སྦེ་ བློན་ཆེན་གྱིས་ ཅུ་ལ་ལོང་ཀཱོན་གཙུག་ལག་སློབ་སྡེའི་ནང་ ཁྱད་འཕགས་དབུ་ཁྲིད་ཀྱི་ དོན་ཚན་ཐོག་ལུ་ གསུང་བཤད་གནང་ནི་ཨིནམ་མ་ཚད་ འབྲུག་ལུ་ ལྟ་བཤལ་གོང་འཕེལ་གཏང་ནིའི་དོན་ལས་ ཐའི་ལྟ་བཤལ་ལག་ལེན་པ་དང་ ལྟ་བཤལ་ངོ་ཚབ་ དེ་ལས་ མཁའ་འགྲུལ་ལག་ལེན་པ་ཚུ་གི་དོན་ལུ་ བསུ་སྟོན་ལས་རིམ་ཅིག་ འགོ་འདྲེན་འཐབ་ནི་ཨིན་པས།
གཟིགས་སྐོར་དེ་ཡང་ རྒྱལ་ཁབ་༢ ཀྱི་བར་ན་ ཡུན་རིང་གི་ ཕན་ཚུན་མཐུན་ལམ་ཡོད་མི་དང་ ལྷག་པར་དུ་ མཐུན་ལམ་རྩ་བརྟན་བཟོ་ནིའི་དོན་ལུ་ ཨིན་པའི་གནས་ཚུལ།
བཙན་སྐྱོགས་དབང་འདུས།