༉ ལོ་༦ གི་རིང་ ཚལ་ལུ་ཕྱིར་ཚོང་འཐབ་མི་ ཨོ་རྒྱན་གྲུ་པ་གིས་ ཚོང་འབྲེལ་ཡུན་བརྟན་བཟོ་ནི་དང་ ས་གནས་ཀྱི་དཔལ་འབྱོར་ལུ་ ལྷན་ཐབས་འབད་ནིའི་དོན་ལས་ ཚལ་ལུའི་དོ་ཁང་དང་འབྲེལ་བའི་ དཀའ་ངལ་ཚུ་ ཐོན་བཞིན་དུ་ཡོདཔ་ཨིན་པས།
ཚལ་ལུའི་ཕྱིར་ཚོང་ དུས་ཚོད་ཨ་རྟག་ར་ བསམ་གྲུབ་ལྗོངས་མཁར་གྱི་ ཚལ་ལུ་ཕྱིར་ཚོང་པ་གཞན་༤ གིས་ཡང་ ཚལ་ལུ་ཕྱི་སེལ་དང་ སྐྱེལ་འདྲེན་བདེ་སྒྲིག་འབད་ནི་ལུ་ གནས་སྐབས་ཀྱི་ དོ་རྐྱབ་དགོཔ་ཐོན་ཡོདཔ་ལས་ ཟད་འགྲོ་ལྕིད་དྲགས་གནས་དོ་ཡོདཔ་ཨིན་པས།
གནད་དོན་དེ་ལུ་བརྟེན་ ཚལ་ལུ་ཕྱིར་ཚོང་པ་ཚུ་གིས་ གཞུང་ལུ་ གཏན་འཇགས་དོ་ཁང་ཅིག་ རྐྱབ་དགོ་པའི་ ཞུ་བ་འབད་ཡོདཔ་ད་ མཐུན་རྐྱེན་དེ་གིས་ ཚལ་ལུ་ཕྱིར་ཚོང་ ཡར་དྲག་གཏང་ནི་དང་ གནས་སྐབས་ཀྱི་ཁྱིམ་ཚུ་ཡང་ རྐྱབ་དགོཔ་མི་འཐོན་ནི་མས་ཟེར་ ཚལ་ལུ་ཕྱིར་ཚོང་པ་ཚུ་གིས་ བཤདཔ་ཨིན་པས།
ལོ་བསྟར་བཞིན་དུ་ ཕྱིར་ཚོང་པ་རེ་གིས་ གནས་སྐབས་དོ་ཁང་རྐྱབ་ནི་ལུ་ ཅ་ཆས་སྤག་ཤིང་དང་ གུར་ཉོ་ནི་ལུ་ དངུལ་ཀྲམ་༢༠༠,༠༠༠ ཟད་འགྲོ་བཏང་དོ་ཡོད་པའི་ཁར་ ཁྲོམ་སྡེ་གི་ ས་གླར་སྤྱོད་འཐུས་ ད་རུང་ དངུལ་ཀྲམ་༢༦,༠༠༠ དེ་རེ་ སྤྲོད་དགོཔ་ཨིན་པས།
དེ་མ་ཚད་ ཚལ་ལུ་ཕྱིར་ཚོང་འཐབ་ཚར་བའི་ཤུལ་ལས་ དོ་ཁང་བརྡལ་གཏང་དགོཔ་བྱུང་མི་དེ་གིས་ཡང་ ཟད་འགྲོ་ཐེབས་གནས་དོ་ཡོདཔ་ཨིན་པས།
ཡུ་ཌི་ཀོ་ཏ་ཕྱིར་ཚོང་གི་ཇོ་བདག་ ཨོ་རྒྱན་གྲུ་པ་གིས་ སླབ་མིའི་ནང་ ཚལ་ལུའི་ཕྱིར་ཚོང་གི་ དུས་ཚོད་ཨ་རྟག་ར་ དངུལ་འབྲེལ་དང་ དོ་ཁང་གི་དཀའ་ངལ་ཚུ་ བྱུང་དོ་ཡོདཔ་ད་ གལ་སྲིད་ གཞུང་གིས་ གཏན་འཇགས་ཀྱི་ དོ་ཁང་ཅིག་ རྐྱབ་གནང་པ་ཅིན་ གདོང་ལེན་ཚུ་ སེལ་ཐབས་འབད་ནི་ཨིནམ་མ་ཚད་ ཕྱིར་ཚོང་གི་ བྱ་སྒོའི་ལམ་ལུགས་ཚུ་ཡང་ ཡར་དྲག་འགྱོ་ནི་མས་ཟེར་ཨིན་པས།
དུས་ཚོད་དང་བསྟུན་ དོ་ཁང་རྐྱབ་མི་གིས་ ཚལ་ལུ་དང་ ལོ་ཐོག་གཞན་ཚུ་གི་ སྤུས་ཚད་ལུ་ཡང་ ཐོ་ཕོག་དོ་ཡོདཔ་ད་ ཕྱིར་ཚོང་པ་ཚུ་གིས་ བཤད་མིའི་ནང་ དོ་ཁང་ལེགས་ཤོམ་ཅིག་མེདཔ་ལས་ ཚལ་ལུ་ཕྱི་སེལ་དང་ སྐྱེལ་འདྲེན་དང་འབྲེལ་བའི་དཀའ་ངལ་ཚུ་ བྱུང་ཡོདཔ་ཨིན་པས།
ཕྱིར་ཚོང་འཐབ་མི་ཚུ་གིས་ སླབ་མིའི་ནང་ གཏན་འཇགས་ཀྱི་ དོ་ཁང་ཅིག་ཡོད་པ་ཅིན་ གདོང་ལེན་ལེ་ཤ་ཅིག་ར་ བསལ་ཚུགས་ནི་དང་ ཚལ་ལུ་བསག་བཞག་སའི་གནས་སྟངས་ བརྟན་ཏོག་ཏོ་བཟོ་ཚུགས་ནི་མ་ཚད་ དངུལ་ཐོག་ ཀེ་བ་དང་ ས་སྒ་ ཨ་ལཱན་ཅི་ ཚོད་བསྲེ་ལ་སོགས་པ་ཚུ་ ལེགས་ཤོམ་སྦེ་ ཉམས་སྲུང་འབད་བཞག་ཚུགས་ནི་ ཨིན་མས་ཟེར་ཨིན་པས།
སྒོམ་དར་ལས་ རི་གཡང་ཕྱིར་ཚོང་གི་ཇོ་བདག་ རིན་ཆེན་རྡོ་རྗེ་གིས་ སླབ་མིའི་ནང་ གཏན་འཇགས་དོ་ཁང་གིས་ གསོག་འཇོག་དང་ ཉམས་སྲུང་གི་གནད་དོན་ཚུ་ བསལ་ཚུགས་ནི་ཨིནམ་མ་ཚད་ མི་སྡེ་དཔལ་འབྱོར་ལུ་ ལྷན་ཐབས་འབད་དེ་ ཟད་འགྲོ་ཚུ་ཡང་ མར་ཕབ་འབད་ཚུགས་ནི་མས་ཟེར་ཨིན་པས།
ཕྱིར་ཚོང་འཐབ་མི་ཚུ་གིས་ སླབ་མིའི་ནང་ ཨ་ལཱན་ཅི་ཕྱིར་ཚོང་འཐབ་ཐོག་ལས་ རྒྱལ་ཁབ་ནང་ འོང་འབབ་བཟོ་དོ་ཡོདཔ་ལས་ གཞུང་གིས་ མཐུན་རྐྱེན་ཚུ་ ལེགས་བཅོས་འབད་དགོཔ་འདུག་ཟེར་ཨིན་པས།
སོ་ནམ་འགོ་དཔོན་ཅིག་གིས་ སླབ་མིའི་ནང་ སོ་ནམ་པ་ཚུ་གི་དོན་ལུ་ ཕྱིར་ཚོང་གི་ གོ་སྐབས་ཡར་འཕར་གཏང་ནི་ལུ་ གཞི་རྟེན་མཐུན་རྐྱེན་ཚུ་ ཡར་དྲག་གཏང་དགོཔ་འདུག་ཟེར་ཨིན་པས།
ཁོ་གིས་འབད་བ་ཅིན་ གལ་སྲིད་གནད་དོན་དེ་ སེལ་ཐབས་འབད་བ་ཅིན་ ཕྱིར་ཚོང་གི་ ཚོང་འབྲེལ་གཞི་སྒྱུར་སྦོམ་སྦེ་ར་ འགྱོ་ནི་མས་ཟེར་ཨིན་པས།
གཏན་འཇགས་ཀྱི་ དོ་ཁང་ཅིག་དགོ་པའི་སྐོར་ལས་ རྫོང་ཁག་དང་ འབྲེལ་ཡོད་ལས་སྡེ་ཚུ་གི་བར་ན་ གྲོས་བསྟུན་ཞལ་འཛོམས་ཅིག་ཡང་ འཚོགས་ཡོད་རུང་ ཕྱིར་ཚོང་པ་ཚུ་གིས་ གཏན་འཇགས་ཀྱི་དོ་ཁང་ཅིག་ མ་རྐྱབ་ཚུན་ གནས་སྐབས་ཀྱི་མཐུན་རྐྱེན་དེ་ར་ ལག་ལེན་འཐབ་དགོ་ནི་མས་ཟེར་ ཨིན་པའི་གནས་ཚུལ།
ཨོ་རྒྱན་རྡོ་རྗེ།