༉ གཞུང་གིས་ སྡོད་ཁྱིམ་རྐྱབ་ནིའི་དོན་ལུ་ སྐྱེད་བརྒྱ་ཆ་༤ སྦེ་ སྐྱིན་འགྲུལ་བྱིན་ནིའི་ ཁས་བླངས་འབད་མི་དེ་ཡང་ སྡོད་ཁྱིམ་ཐོབ་སྤྱོད་འབད་ཚུགས་ནི་ལུ་དམིགས་ཏེ་ཨིནམ་ད་ ལས་རིམ་དེ་ཡང་ འཕྲལ་མགྱོགས་ར་ ལག་ལེན་འཐབ་ནི་ཨིན་པས།
དེ་ཡང་ རྒྱལ་ཡོངས་ཚོགས་འདུའི་ དྲི་བཀོད་ལས་རིམ་སྐབས་ པདྨ་དགའ་ཚལ་ ན་ནོང་-ཤུ་མར་གྱི་འཐུས་མི་ ཡེ་ཤེས་རྒྱ་མཚོ་གིས་ གཞུང་གིས་ སྐྱིན་འགྲུལ་གྱི་ སྐྱེད་ཕབ་བརྒྱ་ཆ་༤ བྱིན་ནིའི་ ཁས་བླངས་འབད་བའི་སྐོར་ལས་ དྲི་དཔྱད་འབད་བའི་ལན་གསལ་སྦེ་ དངུལ་རྩིས་བློན་པོ་ ལས་སྐྱིད་རྡོ་རྗེ་གིས་ ཞུ་ནུག།
དངུལ་རྩིས་བློན་པོ་གིས་ ཞུ་མིའི་ནང་ གྲོས་འཆར་དེ་ དཔལ་འབྱོར་ལྷག་ཐབས་འཆར་གཞི་གི་ ཡན་ལག་ཅིག་ཨིནམ་ད་ ད་རེས་ གཞུང་ལུ་ མ་དངུལ་མ་ལང་པའི་དཀའ་ངལ་ཚུ་ ཐོན་ཏེ་ཡོདཔ་བཞིན་དུ་ སྐྱེད་ཕབ་ཆག་དེ་གིས་ སྐྱིན་འགྲུལ་མ་དངུལ་ལུ་ ཚད་གཞི་ཅིག་ དགོ་ནི་མས་ཟེར་ཨིན་པས།
གཞུང་གིས་ མཐའ་དཔྱད་འབད་ནིའི་དོན་ལས་ རྒྱལ་གཞུང་དངུལ་ལས་དབང་འཛིན་དང་ དངུལ་འབྲུལ་གཙུག་སྡེ་ཚུ་དང་ གྲོས་བསྟུན་འབད་འོང་ཟེར་ དངུལ་རྩིས་བློན་པོ་གིས་ ཞུ་ཡི།
འཐུས་མི་ཡེ་ཤེས་རྒྱ་མཚོ་གིས་ དངུལ་རྩིས་བློན་པོ་ལུ་ སྡོད་ཁྱིམ་དང་ ཁང་ཚན་ཉོ་ནི་ དེ་ལས་ སྡོད་ཁྱིམ་རྐྱབ་ནིའི་དོན་ལས་ སྐྱིན་འགྲུལ་གནས་གོང་ཆ་ཚད་ ཡར་འཕར་གཏང་ནི་གི་ གཞུང་གི་ ཁས་བླངས་སྐོར་ལས་ དྲི་བཀོད་འབད་ནུག།
ད་རེས་ སྐྱིན་འགྲུལ་གནས་གོང་གྱི་ ཆ་ཚད་དེ་ བརྒྱ་ཆ་༧༠ ཡོདཔ་ད་ གཞུང་གིས་ རྒྱལ་གཞུང་དངུལ་ལས་དབང་འཛིན་དང་ གྲོས་བསྟུན་འབད་ཐོག་ལས་ ཆ་ཚད་དེ་ བརྒྱ་ཆ་༩༥ ལུ་ ཡར་སེང་འབད་ནི་སྦེ་ ཁས་བླངས་འབད་ཡོདཔ་ཨིན་པས།
ཡེ་ཤེས་རྒྱ་མཚོ་གིས་ ཞུ་མིའི་ནང་ གཞུང་གིས་ སྐྱིན་འགྲུལ་གནས་གོང་དེ་ བརྒྱ་ཆ་༩༥ ལུ་ ཡར་སེང་དང་ སྐྱེད་བརྒྱ་ཆ་༤ ལུ་མར་ཕབ་འབད་ནི་ དེ་ལས་ གླ་འཁོར་དང་ སྣུམ་འཁོར་ཆེ་བ་ཊཱག་ཚུ་ ཉོ་ནིའི་སྐྱིན་འགྲུལ་ བརྒྱ་ཆ་༥༠ ལས་༨༠ ལུ་ ཡར་སེང་འབད་ནི་སྦེ་ ཁས་བླངས་འབད་དེ་ ཡོད་ཟེར་ཨིན་པས།
དངུལ་རྩིས་བློན་པོ་གིས་ བསྒྱུར་བཅོས་ལུ་ གཞུང་གིས་ ངོས་ལེན་འབད་དེ་ཡོད་རུང་ དཔལ་འབྱོར་ལུ་ ཐོ་ཕོག་ནི་ ཉེན་ཁ་དང་ སྣུམ་འཁོར་མ་ཤོང་པའི་ དཀའ་ངལ་ཚུ་ སེལ་ཐབས་འབད་དགོཔ་འདུག་ཟེར་ཨིན་པས།
འཛམ་གླིང་ནང་ གློག་མེ་སྣུམ་འཁོར་གྱི་ གོང་ཚད་ཚུ་ མར་ཕབ་འགྱོ་དོ་ཡོདཔ་ལས་ འབྲུག་གི་དོན་ལུ་ ལེགས་ཤོམ་ཅིག་ཨིནམ་ད་ དེ་གིས་ ས་སྣུམ་ནང་འདྲེན་མར་ཕབ་འབད་དེ་ དཔལ་འབྱོར་ལུ་ ཁེ་ཕན་འབྱུང་ཚུགས་ནི་མས་ཟེར་ དངུལ་རྩིས་བློན་པོ་གིས་ཞུ་ཡི།
ད་རེས་ སྣུམ་འཁོར་ཆེ་བའི་ སྐྱིན་འགྲུལ་གནས་གོང་གི་ ཆ་ཚད་དེ་ བརྒྱ་ཆ་༥༠ དང་ གློག་ཤུགས་སྣུམ་འཁོར་དང་ བཱསི་གི་ཆ་ཚད་དེ་ བརྒྱ་ཆ་༧༠ དེ་ལས་ སྣུམ་འཁོར་གཞན་ཚུ་གི་ སྐྱིན་འགྲུལ་གྱི་གནས་གོང་གི་ ཆ་ཚད་དེ་ བརྒྱ་ཆ་༣༠ ཡོདཔ་ཨིན་པས།
ད་རེས་ གལ་སྲིད་ རྒྱལ་ཡོངས་ཟུར་ཕོགས་དང་འཚོ་རྟེན་མ་དངུལ་གྱི་ འཐུས་མི་ཅིག་དང་ ཡང་ཅིན་ ཞི་གཡོགཔ་ཅིག་གིས་ ལོ་བསྟར་སྐྱེད་བརྒྱ་ཆ་༨.༥ སྦེ་ ལོ་༥ གི་དོན་ལུ་ སྐྱིན་འགྲུལ་དངུལ་ཀྲམ་༥༠༠,༠༠༠ ལེན་པ་ཅིན་ ཟླ་རིམ་སྐྱིན་ཚབ་ དངུལ་ཀྲམ་༡༠,༣༠༠ བཏབ་མི་གིས་ ལོ་༥ འི་ནང་འཁོད་ལུ་ སྐྱིན་འགྲུལ་གྱི་ སྐྱེད་དངུལ་ཀྲམ་༡༡༥,༤༩༦ བཏབ་དོ་ཡོདཔ་ཨིན་པས།
ཨིན་རུང་ གལ་སྲིད་ ལོ་བསྟར་ སྐྱེད་ཀྱི་ཚད་གཞི་དེ་ བརྒྱ་ཆ་༤.༢༥ ལུ་ མར་ཕབ་འབད་བ་ཅིན་ སྐྱིན་འགྲུལ་དངུལ་ཀྲམ་༥༠༠,༠༠༠ གིས་ ཟླ་རིམ་སྐྱིད་ཚབ་ དངུལ་ཀྲམ་༩,༣༠༠ ལས་བརྒལ་ བཏབ་མི་དགོ་ཨིནམ་བཞིན་དུ་ ལོ་༥ འི་ནང་འཁོད་ལུ་ སྐྱེད་ཡོངས་བསྡོམས་ལས་ དངུལ་ཀྲམ་༥༥,༨༨༦ ལུ་ མར་ཕབ་འབད་ཚུགས་ནི་ཨིན་པས།
འདས་པའི་དྲི་བ་དྲིས་ལན་སྐབས་ དངུལ་འབྲེལ་གཙུག་སྡེའི་ འགོ་དཔོན་ཚུ་གིས་ བཀོད་མིའི་ནང་ གཞུང་ལས་ རྒྱབ་སྐྱོར་མེད་པ་ཅིན་ སྐྱེད་མར་ཕབ་འབད་ནི་ལུ་ འོས་འབབ་ཅིག་ མ་མཐོང་ཟེར་ཨིན་པས།
ཁོང་གིས་འབད་བ་ཅིན་ གལ་སྲིད་ གཞུང་ལས་ དངུལ་འབྲེལ་དང་འབྲེལ་བའི་ རྒྱབ་སྐྱོར་མེད་པ་ཅིན་ སྐྱེད་བརྒྱ་ཆ་༤ ལུ་ མར་ཕབ་འབད་ནི་ལུ་ ལཱ་ཁག་གཏང་འོང་ཟེར་ ཨིན་པའི་གནས་ཚུལ།
ཨོ་རྒྱན་རྡོ་རྗེ།