༉ རྒྱལ་ཡོངས་ཚོགས་སྡེ་གིས་ འབྲུག་གཞུང་དང་ ཀུ་ཝེཊ་གི་བར་ན་ མཁའ་འགྲུལ་ཞབས་ཏོག་གི་ གན་རྒྱ་ཆ་འཇོག་འབད་ཡོདཔ་ཨིན་པས།
གན་རྒྱ་དེ་ཡང་ དཔལ་འབྱོར་ཚོགས་ཆུང་གིས་ གསལ་ཞུ་འབད་ཡོདཔ་བཞིན་དུ་ ཚོགས་ཁང་ནང་ འཐུས་མི་༢༢ ཀྱིས་ ངོས་ལེན་འབད་དེ་ མང་མོས་ཐོག་ལས་ ཆ་འཇོག་འབད་ཡོདཔ་ཨིན་པས།
གན་རྒྱ་དེ་ དུས་ཅི་ སྤྱི་ཟླ་༡༢ པའི་ཚེས་༦ ལས་ བསྟར་སྤྱོད་འབད་ནི་ཨིན་པས།
གྲོས་བསྡུར་སྐབས་ ཚོགས་ཆུང་གི་ཁྲི་འཛིན་འོགམ་ བསོད་ནམས་བསྟན་འཛིན་གྱིས་ གན་རྒྱ་དེ་གིས་ འབྲུག་དང་ ཀུ་ཝེཊ་བར་ན་ མཐུད་སྦྲེལ་འབད་ནི་ལུ་ ལྷན་ཐབས་འབྱུང་ཚུགས་ནི་དང་ ལྟ་བཤལ་གྱི་གོ་སྐབས་གསརཔ་ ལཱ་གཡོག་བཟོ་ནི་ དེ་ལས་ མཁའ་འགྲུལ་ལས་སྣ་ཡར་སེང་འབད་དེ་ འོང་འབབ་ཡར་དྲག་གཏང་ཚུགས་ནི་ཨིན་པས།
དེ་མ་ཚད་ འགྲུལ་པ་ཚུ་ རྒྱུན་འགྲུལ་འཐབ་ནི་ལུ་ གདམ་ཁ་དང་ དོ་འགྲན་ཅན་གྱི་ མཁའ་འགྲུལ་དོ་འགྲན་འབད་ཚུགས་ནི་ཨིན་པས།
དར་དཀར་ནང་གི་འཐུས་མི་ བི་རེན་ཌ་ ཅི་མོ་རི་ཡ་གིས་ གན་རྒྱ་དེ་ལུ་ ངོས་ལེན་འབད་ཡོདཔ་ད་ མི་དབང་མཆོག་གིས་ འཛམ་གླིང་དང་ སྐྱེལ་འདྲེན་ལྟེ་བ་ཅིག་ བཟོ་ནི་ལུ་དམིགས་ཏེ་ དགེ་ལེགས་ཕུག་དྲན་ཤེས་ཁྲོམ་ གཞི་བཙུགས་འབད་ནི་གི་ ཐུགས་ཀྱི་དགོངས་བཞེད་དང་བསྟུན་ ཨིན་མས་ཟེར་ཨིན་པས།
གན་རྒྱ་དེ་གིས་ འབྲུག་ལུ་ གནམ་གྲུ་ལེ་ཤ་ འཕུར་འགྲུལ་འབད་ཚུགས་ནི་ལུ་ ལྷན་ཐབས་འབད་ཚུགས་ཟེར་ འཐུས་མི་གིས་ཞུ་ཡི།
འབྲུག་གིས་ གན་རྒྱ་གུ་ མཚན་རྟགས་དེ་ཡང་ ཀུ་ཝེཊ་ལུ་སྦེ་ དུས་ཅི་ སྤྱི་ཟླ་༡ པའི་ཚེས་༩ ལུ་ བཀོད་ཡོདཔ་བཞིན་དུ་ ཟླ་༦ པའི་ནང་ ཆ་འཇོག་གི་དོན་ལུ་ རྒྱལ་ཡོངས་ཚོགས་འདུའི་ ཚོགས་ཐེངས་དང་པའི་ནང་ཕུལ་ཏེ་ བསྐྱར་ཞིབ་འབད་བའི་ལས་ ཆ་འཇོག་གི་ བསྐྱར་ཞིབ་ཚོགས་ཁང་ལུ་ ཕུལ་ཡོདཔ་ཨིན་པས།
ཚོགས་ཆུང་གི་ཁྲི་འཛིན་ བསམ་གྲུབ་ལྗོངས་མཁར་གྱི་འཐུས་མི་ ཚེ་དབང་རིན་ཆེན་གྱིས་ ཞུ་མིའི་ནང་ གན་རྒྱ་ལུ་ རྒྱལ་སྤྱི་མཁའ་འགྲུལ་ཚོགས་སྡེ་གིས་བཟོ་མི་ གནས་ཚད་དང་འཁྲིལ་ཏེ་ ཅི་ཀ་གོ་ཆིངས་ཡིག་དང་མཐུན་འབྲེལ་གྱི་ གཞི་བཀོད་ཡོད་ཟེར་ཨིན་པས།
གན་རྒྱ་ལུ་ འཐུས་མི་མང་ཤོས་ཅིག་གིས་ ངོས་ལེན་འབད་ཡོད་རུང་ འཐུས་མི་ལ་ལོ་ཅིག་གིས་ དེ་དང་འབྲེལ་བའི་ གདོང་ལེན་གྱི་ ཚ་གྱང་ཡོད་ལུགས་ཚུ་ བཤདཔ་ཨིན་པས།
བཀྲིས་སྒང་གི་འཐུས་མི་ བསོད་ནམས་སྟོབས་རྒྱས་ཀྱིས་ གན་རྒྱ་ལུ་བརྟེན་ དངོས་སུ་བྱུང་པའི་ ཁེ་ཕན་བཤད་མི་དེ་ཡང་ འབྲུག་གིས་ ཧེ་མ་ལས་ རྒྱལ་ཁབ་༨ དང་གཅིག་ཁར་ མཁའ་འགྲུལ་ཞབས་ཏོག་གན་ཡིག་གུ་ མཚན་རྟགས་བཀོད་དེ་ཡོད་མི་གིས་ མཐུད་སྦྲེལ་དང་ ལྟ་བཤལ་ ཡང་ཅིན་ དཔལ་འབྱོར་ཡར་དྲག་གཏང་ནི་ལུ་ དེ་ཅིག་ར་ གོང་འཕེལ་འགྱོ་ མ་ཚུགས་མི་ལུ་བརྟེན་ཨིན་པས།
ཁོ་གིས་ ཞུ་མིའི་ནང་ སྤྱི་ལོ་༡༩༨༣ ལུ་ ཀུ་ཝིཊ་དང་ གན་ཡིག་གུ་ མཚན་རྟགས་བཀོད་མི་དེ་གིས་ འབྲུག་ལུ་ ཁེ་ཕན་དེ་ཅིག་ར་ འབྱུང་མ་ཚུགས་པས་ཟེར་ཨིན་པས།
འཐུས་མི་གཞན་ཚུ་གིས་ འབྲུག་མི་མཁའ་འགྲུལ་དང་ དོ་འགྲན་ཡར་སེང་དང་ སྤ་རོ་དང་ དགེ་ལེགས་ཕུག་རྒྱལ་སྤྱི་གནམ་གྲུ་ནང་ གནམ་གཤོང་ཚད་ཚད་གཅིག་ལས་བརྒལ་མེད་ དེ་ལས་ མཁའ་འགྲུལ་ལུ་བརྟེན་ རང་བཞིན་གནས་སྟངས་ལུ་ གནོད་པ་བྱུང་ཉེན་གྱི་ ཚ་གྱང་ཡོད་ལུགས་ཚུ་ ཞུ་ཡོད་པའི་གནས་ཚུལ།
ཨོ་རྒྱན་རྡོ་རྗེ།