༉ སྤྱི་ལོ་༢༠༢༤ ལོའི་ འབྲུག་དབང་རྒྱལ་མདའ་རྩེད་འགྲན་བསྡུར་དེ་ ཐིམ་ཕུག་ལྕང་གླིང་མི་ཐང་གི་ མདའ་རྩེད་ཐང་ནང་སྦེ་ འགོ་བཙུགས་ཡོདཔ་བཞིན་དུ་ རྩེད་འགྲན་འདི་ནང་ རྒེད་འོག་༥༠ ལས་ སྡེ་ཚན་༥༨ ཀྱིས་ བཅའ་མར་གཏོགས་མི་དེ་ ད་ལྟོ་ཚུན་ མཐོ་ཤོས་ཅིག་ཨིན་པས།
རང་ལུགས་ཀྱི་ མདའ་རྩེད་འགྲན་བསྡུར་དེ་ སྤྱི་ཟླ་༡༡ པའི་ཚེས་༤ ལུ་ འགོ་བཙུགས་ཡོདཔ་ད་ འགྲན་བསྡུར་དེ་ སྤྱི་ཟླ་༢ པ་ཚུན་ འགོ་འདྲེན་འཐབ་ནི་ཨིན་པས།
དུས་ཅི་གི་འགྲན་བསྡུར་དེ་ གཞན་དང་མ་འདྲཝ་ཅིག་ཨིནམ་ད་ དེ་ཡང་ མདའ་རྩེདཔ་ཚུ་གིས་ རང་སོའི་གཡུས་ཚན་ཚུ་ནང་ གཅིག་མཐུན་བཟོ་ནི་དང་ ས་གནས་ཀྱི་རིག་རྩལ་ཚུ་ ཡར་དྲག་གཏང་ཚུགས་ནི་ཨིན་པས།
རྩེད་འགྲན་ཐེངས་༢ པ་དེ་ ཁ་ཙ་ འགོ་འདྲེན་འཐབ་ཡོདཔ་ད་ དེ་བསྒང་ དབྱེ་ཁག་ཀ་པའི་ནང་ བཀང་ལུང་སྡེ་ཚན་དང་ ཤུ་མར་སྡེ་ཚན་ དབྱེ་ཁག་ཁ་པའི་ནང་ ར་ལྡི་སྡེ་ཚན་དང་ བ་ལམ་སྡེ་ཚན་གྱི་བར་ན་ རྩེད་འགྲན་འབད་ཡོདཔ་ཨིན་རུང་ རྒྱལ་ཕམ་ཕྱེ་མ་ཚུགས་པས།
བཀང་ལུང་དང་ ཤུ་མར་གྱི་རྩེད་འགྲན་ནང་ སྡེ་ཚན་ཚུ་གིས་ འགོ་དང་པའི་ སྡེ་ཚན་༢ ཀྱི་བར་ན་ རྩེད་འགྲན་འབད་ཡོདཔ་ད་ བཀང་ལུང་གིས་ རྩེད་འགྲན་འགོ་དང་པ་དེ་ སྐུགས་༢༥-༢༡ སྦེ་ རྒྱལ་ཁ་ཐོབ་ཡོདཔ་ཨིན་རུང་ ཤུ་མར་གྱིས་ རྩེད་འགྲན་ཐེངས་༢ པའི་ནང་ སྐུགས་༡༨-༡༠ སྦེ་ རྒྱལ་ཁ་ཐོབ་ཡོདཔ་ད་ རྩེད་འགྲན་དེ་ ཕྱི་རུའི་ཆུ་ཚོད་ ༤:༣༠ ལུ་ མཚམས་འཇོག་འབད་ནུག།
ར་ལྡི་དང་ བ་ལམ་གྱི་ རྩེད་འགྲན་ནང་ ར་ལྡི་གིས་ འགོ་དང་པའི་ རྩེད་འགྲན་ནང་ སྐུགས་༢༥-༢༢ སྦེ་ རྒྱལ་ཁ་ཐོབ་ཡོདཔ་ཨིན་རུང་ བ་ལམ་གྱིས་ རྩེད་འགྲན་ཐེངས་༢ པའི་ནང་ སྐུགས་༡༦-༧ ཐོབ་སྟེ་ རྒྱལ་ཁ་ཐོབ་ཡོདཔ་ཨིན་པས།
ར་ལྡི་གི་འགོ་ཁྲིདཔ་ རྡོ་རྗེ་ཕུན་ཚོགས་ཀྱིས་ རྩེད་འགྲན་དེ་ སྔོན་བཤད་འབད་མ་ཚུགས་པའི་ རྩེད་འགྲན་ཅིག་ཨིནམ་སྦེ་ ངོས་ལེན་འབད་ཡོདཔ་ད་ ཁོ་རའི་ བྱད་ཕྱད་ཀྱི་ རིག་རྩལ་ལུ་ལྟ་སྟེ་ བསྟོད་པ་རྐྱབ་ཡོདཔ་ད་ ངེ་གི་སྡེ་ཚན་གྱིས་ རྒྱལ་ཁ་འཐོབ་ནིའི་ རེ་བ་ཡོད་རུང་ ཁ་རྗེ་དང་འཁྲིལ་དགོ་པས་ཟེར་ཨིན་པས།
བཀང་ལུང་གི་འགོ་ཁྲིདཔ་ ཀརྨ་གིས་ ཁོ་རའི་ སྡེ་ཚན་གྱི་ཉམས་མྱོང་ལུ་ བློ་གཏད་ཡོདཔ་མ་ཚད་ འདས་པའི་འགྲན་བསྡུར་ཚུ་ནང་ རྩེད་འགྲན་པ་ཚུ་གིས་ བཅའ་མར་གཏོགས་ཡོད་པའི་སྐོར་ལས་ གསལ་བཤད་འབད་ཡོདཔ་ད་ ཁོ་གིས་འབད་བ་ཅིན་ ང་བཅས་ར་ ལེགས་ཤོམ་སྦེ་ རྩེད་འགྲན་འབད་ནིའི་དོན་ལུ་ གདམ་ཁ་རྐྱབ་སྟེ་ཡོདཔ་ལས་ ང་བཅས་ཀྱི་ དོ་འགྲན་པ་ཚུ་ ཕམ་གཏང་ཚུགས་པའི་ དམིགས་གཏད་ཡོད་ཟེར་ཨིན་པས།
འབྲུག་རང་ལུགས་རྩེད་རིགས་ཚོགས་པ་གིས་ འགོ་འདྲེན་འཐབ་མི་ འབྲུག་རྒྱལ་ཡོངས་མདའ་རྩེད་འགྲན་བསྡུར་དེ་ སྤྱི་ལོ་༢༠༠༣ ལུ་ འབྲུག་གིས་ ཕྱི་ཁའི་དམག་ལས་ རྒྱལ་ཁ་ཐོབ་མི་དང་ མི་དབང་འབྲུག་རྒྱལ་༤ པ་མཆོག་ལུ་ གུས་བཏུད་ཞུ་ནིའི་དོན་ལུ་ འགོ་འདྲེན་འཐབ་དོ་ཡོདཔ་ཨིན་པས།
རྩེད་འགྲན་དེ་ ནོག་ཨའུཊི་གཞི་བཀོད་ལམ་ལུགས་ཐོག་ལུ་ཨིནམ་ལས་ ཚབ་མ་༢ བརྩིས་ཏེ་ སྡེ་ཚན་རེའི་ནང་ རྩེད་འགྲན་པ་༡༣ ཡོདཔ་ད་ སྡེ་ཚན་རེ་གིས་ འཛུལ་འཐུས་དངུལ་ཀྲམ་༡༥,༠༠༠ སྤྲོད་ཡོདཔ་ཨིན་པས།
དྭངས་གསལ་གྱི་དོན་ལུ་ བིག་ས་རྩེད་རིགས་ཚོགས་པ་གིས་ ཁོང་རའི་ རྒེད་འོག་ལས་ ངོ་ཚབ་འཐུས་མི་འབད་ནིའི་དོན་ལུ་ མི་ཁུངས་ངོ་སྤྲོད་ལག་ཁྱེར་ཐོག་ལས་ བདེན་དཔྱད་འབད་ཡོདཔ་ཨིན་པས།
སྤྱི་ཟླ་༡༡ པའི་ཚེས་༤ དང་༥ འི་བར་ན་ རྩེད་འགྲན་འབད་བའི་སྐབས་ མོང་སྒར་རྒེད་འོག་གིས་ སྟོད་ཝང་རྒེད་འོག་ལུ་ སྐུགས་༢༥-༠ དང་༢༥-༣ གྱི་ཐོག་ལས་ ཕམ་བཏང་ཡོདཔ་ད་ དེ་བཟུམ་སྦེ་ དར་དཀར་རྒེད་འོག་གིས་ ཆ་ལི་རྒེད་འོག་ལུ་ རྩེད་ཐེངས་༢ ནང་ སྐུགས་༢༥-༨ དང་༢༥-༢༠ སྦེ་ རྒྱལ་ཁ་ཐོབ་ཡོདཔ་ཨིན་པས།
མདའ་རྩེདཔ་ཚུ་གིས་ སླབ་མིའི་ནང་ རྩེད་འགྲན་ནང་ རྒེད་འོག་མ་འདྲཝ་ཚུ་ བཙུགས་མི་དེ་གིས་ བིག་ས་ཚོགས་པ་གིས་ ཐིམ་ཕུག་ལུ་ གཞི་བཙུགས་འབད་མི་ སྡེ་ཚན་སྒྲིང་སྒྲི་ཚུ་ལས་བརྒལ་ཏེ་ རང་ལུགས་ཀྱི་ མདའ་གཞུའི་རྩེད་འགྲན་ཚུ་ ཡར་དྲག་གཏང་ནི་ལུ་ ཁས་བླངས་ཡོད་པའི་ གསལ་སྟོན་འབདཝ་མས་ཟེར་ཨིན་པས།
རང་ལུགས་མདའ་གཞུའི་རྩེདམོ་གིས་ འབྲུག་གི་ལམ་སྲོལ་དང་ ཤུལ་བཞག་ དེ་ལས་ མི་སྡེ་གི་ འཚོ་བའི་གནས་སྟངས་ནང་ ག་དེམ་ཅིག་ གལ་ཆེཝ་ཨིན་ན་ གསལ་སྟོན་འབད་ཚུགས་པས་ཟེར་ མདའ་རྩེདཔ་ཅིག་གིས་ སླབ་ཡོད་པའི་གནས་ཚུལ།
བཙན་སྐྱོགས་དབང་འདུས།