༉ སྤྱི་ཟླ་༤ པའི་ཚེས་༣༠ གི་ ཕྱི་རུའི་ཆུ་ཚོད་༥:༣༠ དེ་ཅིག་ཁར་ སྤུ་ན་ཁ་ ལེགས་བཤད་འབྱུང་གནས་བཤད་གྲྭའི་ ལེགས་སྦྱར་བ་ རིན་ཆེན་རྣམ་རྒྱལ་དང་ ཨམ་དབང་མོ་གིས་ བ་ཟམ་གྱི་ཉེ་འདབས་ལས་ རྒྱ་གར་གྱི་ཏི་རུ་ རུ་པི་༡༡༠,༠༠༠ བཙུགས་ཡོད་པའི་ བེག་གནགཔོ་ཅིག་ ཐོབ་ཡོདཔ་ཨིན་པས།
དེ་མ་ཚད་ བེག་ནང་ རྒྱ་གར་གྱི་ ལམ་ཡིག་དང་ ཅ་ཆས་གཞན་ཚུ་ཡང་ ཡོདཔ་ཨིན་པས།
རིན་ཆེན་རྣམ་རྒྱལ་གྱི་ བཟའ་ཚང་དེ་ ལེགས་བཤད་འབྱུང་གནས་བཤད་གྲྭ་ནང་ ཁོ་འཕྱད་པར་སོང་ཡོདཔ་ད་ ཕྱི་རུ་ རྐང་སྟོང་སྦེ་འོངམ་ད་ ཟམ་གྱི་ཉེ་འདབས་ལུ་ པར་བཏབ་པའི་སྐབས་ བེག་ཅིག་མཐོང་ཡོདཔ་ད་ དེ་བསྒང་ སྣང་དག་ཆེནམོ་ཅིག་ མ་བསྐྱེད་པར་ སྡོད་ཡོདཔ་ཨིན་པས།
ལེགས་སྦྱར་བ་གི་ ཨའི་དབང་མོ་གིས་སླབ་སྟེ་ བེག་འཐུ་སྟེ་ བྱིན་མི་དེ་ཡང་ མི་ཚུ་གིས་ མནོ་བསམ་ག་ནི་ཡང་ མ་གཏང་པར་ ཆུ་ནང་བཀོག་བཀོཝ་འོང་ཟེར་ མནོ་ཡི་ཟེར་ཨིན་པས།
བེག་འཐུ་དེ་ ལྗིད་ཅན་ཅིག་སྦེ་ མཐོང་ཡོདཔ་བཞིན་དུ་ སློབ་གྲྭའི་བེག་ཅིག་ འོང་ནི་མས་ཟེར་ ཁ་ཕྱེས་ལྟཝ་ད་ ནང་ན་ཏི་རུ་དང་ ལམ་ཡིག་ཚུ་ མཐོང་ཡོདཔ་ཨིན་པས།
དེ་ལས་ ཁོང་ཆ་ཁྱབ་ཀྱིས་ ཁྲིམས་སྲུང་འགག་པ་ལུ་ རྩིས་སྤྲོད་འབད་ནི་སྦེ་ ཐག་བཅད་ཡོདཔ་ད་ ཁྲིམས་སྲུང་འགག་པའི་ འགོ་དཔོན་ཅིག་ཨིན་མི་ རིན་ཆེན་རྣམ་རྒྱལ་གྱི་ ཉེ་སྤུན་གྱིས་ སྤུ་ན་ཁ་གི་ ཁྲིམས་སྲུང་འགག་པའི་ འགོ་དཔོན་ཅིག་ལུ་ བརྒྱུད་འཕྲིན་བཏང་ཡོདཔ་ཨིན་པས།
རིན་ཆེན་རྣམ་རྒྱལ་དང་ ཁོ་རའི་ཉེ་སྤུན་གྱིས་ བེག་དེ་ ཁྲིམས་སྲུང་འགག་སྡེའི་ནང་ འབག་འགྱོ་བའི་སྐབས་ རྒྱ་གར་གྱི་ ལྟ་བཤལཔ་དང་ ཁོ་རའི་ བཟའ་ཚང་འཐུས་མི་༤ ཕྱད་ཡོདཔ་ཨིན་པས།
འདས་པའི་ལོ་ཚུ་ནང་ ཁྲིམས་སྲུང་འགག་པ་ལུ་ མི་སྡེ་བརྡ་བརྒྱུད་ཚུ་ནང་ བྱང་སྟོར་ཤོར་ཏེ་ ལོག་ཐོབ་པའི་གནད་དོན་༧ སྙན་ཞུ་འབད་ཡོདཔ་བཞིན་དུ་ བྱང་སྟོར་ཤོར་བའི་ དངུལ་ཀྲམ་༢༥༡,༥༧༧ དང་ ཅ་ཆས་ཚུ་ ལོག་བྱིན་ཡོདཔ་ཨིན་པས།
བེག་གི་ཇོ་བདག་ ས་ཊིཤ་ བཱ་བུ་གིས་ མི་མང་དང་ ཁྲིམས་སྲུང་འགག་པ་ཚུ་ལུ་ དགའ་ཚོར་བསྐྱེད་ཡོདཔ་བཞིན་དུ་ འབྲུག་འདི་ མིང་གནས་དང་འཁྲིལ་ཏེ་ཡོད་པའི་ཁར་ མི་སེར་ཚུ་གི་ བསམ་བཟའ་ལུ་བལྟ་སྟེ་ ངལ་རངས་བྱུང་ཡི་ཟེར་ཨིན་པས།
དུས་ཅི་ སྤྱི་ཟླ་༣ པའི་ཚེས་༡༤ ལུ་ ཕུན་ཚོགས་གླིང་སློབ་གྲྭ་ཆུང་བའི་ སློབ་རིམ་༦ པའི་སློབ་ཕྲུག་ ཀུན་མཚོ་ཆོས་སྐྱིད་རྒྱལ་མཚན་མོ་ར་ རྐང་སྟོང་འགྱོ་བའི་ལམ་ཁར་ ཕུན་ཚོགས་གླིང་ དོན་གཅོད་ཡིག་ཚང་གི་ ཉེ་འདབས་ལས་ དངུལ་ཀྲམ་༣༠,༢༠༠ ཐོབ་མི་དེ་ ཇོ་བདག་ལུ་ ལོག་སྤྲོད་ཡོདཔ་ཨིན་པས།
ཀུན་མཚོ་གིས་ སླབ་མིའི་ནང་ མོ་རའི་ཁྱིམ་དང་ རྒྱ་གར་གྱི་ཡིག་ཚང་གི་ ཉེ་འདབས་ལས་ ཆུ་ཤོག་བེག་ཅིག་ཐོབ་ཡོདཔ་བཞིན་དུ་ མི་རྒན་ཤོས་དང་ དཀའ་ངལ་ཅན་གྱི་ མི་ངོམ་ཚུ་གི་འོང་ནི་མས་ མནོ་བསམ་བཏང་སྟེ་ ཁྲིམས་སྲུང་འགག་པ་ལུ་ རྩིས་སྤྲོད་འབད་ཡི་ཟེར་ཨིན་པས།
ཟླཝ་དག་པ་ཅིག་གི་རྒྱབ་ལས་ ཀུན་མཚོ་ལུ་ བརྒྱུད་འཕྲིན་ལྷོད་ཡོདཔ་བཞིན་དུ་ ཁྲིམས་སྲུང་འགག་པ་གིས་ དངུལ་དེ་ ཇོ་བདག་ལུ་ སྤྲོད་ཡོདཔ་ཨིན་པས།
ཀུན་མཚོ་གི་ཨ་པ་ ཟླ་བ་རྒྱལ་མཚན་གྱིས་ སླབ་མིའི་ནང་ ཁོ་རའི་བུམོ་གི་ དྲན་བདེན་ལུ་བལྟ་སྟེ་ ངལ་རངས་བྱུང་ཡི་ཟེར་ཨིནམ་ད་ སྐྱེས་ལོ་༡༢ ལུ་ མོ་རའི་བུམོ་གིས་ ན་གཞོན་གཞན་ཚུ་ལུ་ མིག་དཔེ་བཟང་པོ་ཅིག་ སྟོན་ཚུགས་ཅི་ཟེར་ཨིན་པས།
འདི་བཟུམ་སྦེ་ གླ་འཁོར་དེད་གཡོགཔ་ཅིག་གིས་ འགྲུལ་པ་ཅིག་གི་ལུས་མི་ དངུལ་ཀྲམ་༥༢,༣༧༧ དང་ བི་ས་ཀཱཊི་ དེ་ལས་ ཅ་ལ་གཞན་ཚུ་ཡོད་མི་ དངུལ་ཁུག་ཅིག་ཡང་ ལོག་བྱིན་ཡོད་པའི་གནས་ཚུལ།
ཨོ་རྒྱན་རྡོ་རྗེ།