ཕྱགས་སྙིགས་འཛིན་སྐྱོང་དང་འབྲེལ་བའི་ དཀའ་ངལ་སེལ་ཐབས།
༉ ཐིམ་ཕུག་ལུ་སྡོད་མི་ སྐྱེས་ལོ་༣༢ ལང་མི་ རྣམ་རྒྱལ་གྱིས་ མོ་རའི་ ཆ་རོགས་ཚུ་དང་གཅིག་ཁར་ ཁོང་རའི་མི་སྡེ་ནང་ ཨ་རྟག་ར་ ཕྱགས་སྙིགས་བསྡུ་བསྒྱོམ་འབད་དེ་ ལོ་༢ དེ་ཅིག་ ལང་ཡོདཔ་ཨིན་མས།
ཁོང་གིས་ ཧེ་མར་ བདུན་ཕྲག་༡ ནང་ ཕྱགས་སྙིགས་ཀེ་ཇི་༤༠ལྷགཔ་ཅིག་ བསྡུ་བསྒྱོམ་འབད་དོ་ཡོད་མི་དེ་ ད་རེས་འབདཝ་ད་ ཀེ་ཇི་༢༠༠དེ་ཅིག་ལུ་ ཡར་སེང་སོང་ཡོདཔ་ད་ ཐིམ་ཕུག་བཟུམ་མའི་ ཁྲོམ་སྡེའི་ས་ཁོངས་ཚུ་ནང་ ཕྱགས་སྙིགས་དང་འབྲེལ་བའི་དཀའ་ངལ་དེ་ ཚ་གྱང་ཆེ་བའི་ གཞི་གནད་ཅིག་ཨིན་མས།
ཐིམ་ཕུག་རྐྱངམ་གིས་ར་ ལོ་རེ་ནང་ ཕྱགས་སྙིགས་མེ་ཊིག་ཊཱོན་༡༨,༠༠༠དེ་ཅིག་ ཐོན་སྐྱེད་འབད་མི་ལུ་ལྟཝ་ད་ སྤྱི་ལོ་༢༠༢༤ གི་ནང་འཁོད་ ཉིནམ་རེ་ལུ་ ཕྱགས་སྙིགས་མེ་ཊིག་ཊཱོན་༦༨.༦ དེ་རེ་ འཐོན་ནི་ཨིནམ་ལས་ མཐའ་འཁོར་གནས་སྟངས་དང་ མི་མང་གི་འཕྲོད་བསྟེན་ དེ་ལས་ སྤྱིར་བཏང་མི་ཚེའི་སྤུས་ཚད་ལུ་ གདོང་ལེན་སྦོམ་སྦེ་ར་ འབྱུང་ནིའི་ཉེན་ཁ་འདུག།
རྣམ་རྒྱལ་དང་ མོ་རའི་ ཆ་རོགས་ཚུ་གིས་ ཁོང་རའི་མཐའ་འཁོར་ལས་ཕར་ ཕྱགས་སྙིགས་བསྡུ་བསྒྱོམ་འབད་ནི་ལུ་ བརྩོན་ཤུགས་བསྐྱེད་མི་དེ་ དཔེ་སྟོན་བཟུམ་ཅིག་ཨིནམ་ད་ གལ་སྲིད་ འབྲུག་མི་ག་ར་གིས་ ཕྱགས་སྙིགས་འཛིན་སྐྱོང་འཐབ་ནི་ལུ་ འདི་བཟུམ་མའི་ འབད་བརྩོན་བསྐྱེད་པ་ཅིན་ ང་བཅས་རའི་ མི་སྡེ་དང་ མཐའ་འཁོར་གནས་སྟངས་ལུ་ ཕྱགས་སྙིགས་དང་འབྲེལ་བའི་ གདོང་ལེན་བྱུང་མི་དེ་ མཉམ་རུབ་ཐོག་ལས་ སེལ་ཐབས་འབད་ཚུགས་ནི་ཨིན་མས།
ཕྱགས་སྙིགས་ཚུ་ བསྐྱར་ལོག་ལག་ལེན་འཐབ་ནི་དང་ ཡང་ཅིན་ བསྐྱར་བཟོ་འབད་ཚུགས་པ་ཅིན་ དང་པ་ ཕྱགས་སྙིགས་བཀོག་སའི་ས་ཁོངས་ཚུ་ནང་ ཕྱགས་སྙིགས་མ་ཤོང་པའི་ དཀའ་ངལ་མི་འབྱུང་ནི་དང་ གཉིས་པ་ཟེརཝ་ད་ མཐའ་འཁོར་གནས་སྟངས་དང་འབྲེལ་བའི་ གནོད་ཉེན་ཚུ་ སེལ་ཐབས་འབད་ཚུགས་པའི་ ཕན་ཁྱད་འདུག།
ཨིན་རུང་ ངོ་རྐྱང་གི་ བརྩོན་ཤུགས་རྐྱངམ་གཅིག་གིས་ ཕྱགས་སྙིགས་འཛིན་སྐྱོང་དང་འབྲེལ་བའི་ དཀའ་ངལ་དེ་ ཧྲིམ་བུམ་སྦེ་ར་ སེལ་ཐབས་འབད་མི་ཚུགས་ནི་ཨིནམ་ད་ གཞུང་དང་ གཞུང་མིན་ལས་སྡེ་ཚུ་གིས་ ཐབས་བྱུས་ཡོངས་རྫོགས་ཐོག་ལུ་ མཉམ་འབྲེལ་འབད་ནི་དེ་ཡང་ ཁག་ཆེ་དྲགས་ཅིག་ཨིན་མས།
ལྷག་པར་དུ་ ཕྱགས་སྙིགས་བསྡུ་བསྒྱོམ་འབད་ནི་དང་ ཕྱི་སེལ་རྐྱབ་ནི་ དེ་ལས་ བཀོག་སའི་ས་ཁོངས་ཚུ་གི་དོན་ལུ་ མ་རྩ་གཞི་བཙུགས་འབད་ནི་དེ་ དགོས་མཁོ་ཆེ་བའི་ཁར་ སྤྱིར་བཏང་མི་མང་གིས་ ཕྱགས་སྙིགས་འཛིན་སྐྱོང་གི་ འགན་འཁྲི་འབག་བཅུག་ནིའི་དོན་ལུ་ མི་སྡེ་ཚུ་ནང་ ཤེས་ཡོན་དང་ གོ་བརྡའི་ལས་རིམ་ཚུ་ དུས་དང་དུས་སུ་ འགོ་འདྲེན་འཐབ་པ་ཅིན་ ཕན་རླབས་འབྱུང་ཚུགས་ནི་ཨིན་མས།
དེ་ལས་ ཕྱགས་སྙིགས་ཚུ་ དོན་སྨིན་ཅན་སྦེ་ ལག་ལེན་འཐབ་ནིའི་དོན་ལུ་ ལུད་བཟོ་ནི་དང་ སྐྱེ་ལྡན་མེ་རླུང་བཟོ་ནིའི་དོན་ལུ་ ཐབས་རིག་དང་ འཕྲུལ་རིག་ཚུ་ གཞི་བཙུགས་འབད་བ་ཅིན་ ཕྱགས་སྙིགས་བཀོག་སའི་ས་ཁོངས་ནང་ ཕྱགས་སྙིགས་མ་ཤོང་པའི་ དཀའ་ངལ་མར་ཕབ་འབད་ཚུགས་ནི་ཨིན་མས།
འདི་བཟུམ་མའི་ ཡོངས་རྫོགས་ཐབས་ལམ་བཏོན་ཚུགས་པ་ཅིན་ ཕྱགས་སྙིགས་འཛིན་སྐྱོང་གི་ གདོང་ལེན་ཚུ་ གློ་བུར་དུ་ སེལ་ཐབས་འབད་ཚུགས་པའི་ཁར་ ཡུན་བརྟན་དམིགས་ཡུལ་ལུ་ ཕན་འདེབས་བྱུང་མི་དང་བསྟུན་ ང་བཅས་རའི་ མཐའ་འཁོར་ཉམས་སྲུང་དང་ རྒྱལ་ཡོངས་དགའ་སྐྱིད་དཔལ་འཛོམས་ཀྱི་ ལྟ་བ་དང་གཞི་རྩ་ལུ་ ལྷན་ཐབས་འབད་ཚུགས་ནི་ཨིན་མས།
གཞུང་གི་ངོ་ཚབ་ལས་སྡེ་དང་ ས་གནས་ཀྱི་དབང་འཛིན་ ཚོང་པ་ ཞི་བའི་མི་སྡེ་ལས་ཚོགས་ དེ་ལས་ ངོ་རྐྱང་ཚུ་གིས་ ཕྱགས་སྙིགས་འཛིན་སྐྱོང་དང་འབྲེལ་བའི་ དཀའ་ངལ་སེལ་ཐབས་འབད་ནིའི་དོན་ལུ་ གདོང་ཁར་འཐོན་ཏེ་ མཉམ་རུབ་ཐོག་ལས་ ཐབས་ལམ་ཚུ་བཏོན་ཏེ་ ངེས་བརྟན་ལག་ལེན་འཐབ་དགོཔ་འདུག།