༉ རྒྱལ་ཁབ་ནང་ ཤེས་རིག་སོར་སྒྱུར་གྱི་ ཆ་ཤས་བཟུམ་ཅིག་སྦེ་ ཤེས་རིག་དང་རིག་རྩལ་གོང་འཕེལ་ལྷན་ཁག་གིས་ སློབ་རིམ་༩ པ་ལས་༡༢ པ་ཚུན་གྱི་དོན་ལུ་ རྫོང་ཁའི་ཆོས་ཚན་ བསྐྱར་བཟོ་འབད་ཡོདཔ་ཨིན་པས།
ཨིན་རུང་ སློབ་རིམ་༩ པ་དང་༡༡ པ་རྐྱངམ་གཅིག་གིས་ ད་ལྟོ་ བསྐྱར་བཟོ་འབད་མི་ཆོས་ཚན་ཚུ་ ལྷབ་དོ་ཡོདཔ་བཞིན་དུ་ སློབ་རིམ་༡༠ པ་དང་༡༢ པའི་དོན་ལུ་ སང་ཕོད་ཀྱི་ལོ་ནང་ དང་ལེན་འབད་ནི་ཨིན་པས།
རྫོང་ཁའི་ཆོས་ཚན་དེ་ དེང་སང་གི་མཁོ་འདོད་དང་ སྤུས་ཚད་ཡར་དྲག་གཏང་ནིའི་དོན་ལུ་ ལྷན་ཁག་གིས་ སྤྱི་ལོ་༢༠༢༡ ལུ་ ཆོས་ཚན་གནས་ཚད་ཀྱི་ བསྐྱར་ཞིབ་འབད་ཡོདཔ་ཨིན་པས།
བསྐྱར་ཞིབ་སྙན་ཞུ་དང་འཁྲིལཝ་ད་ སློབ་ཕྲུག་ཚུ་གིས་ རིག་རྩལ་སྣ་ཚོགས་འཐོབ་ནི་ལུ་ ཆ་རོགས་འབད་ནིའི་དོན་ལས་ བརྩི་མཐོང་ཅན་གྱི་ སྲུང་རྩོམ་དང་ སྙན་ངག་ཚུ་ ལྷན་འདེབས་ཐོག་ལས་ རྫོང་ཁའི་ཆོས་ཚན་དེ་ གནས་ཚད་ཅན་བཟོ་ནི་དང་ ཡར་དྲག་གཏང་ནི་ལུ་ རྒྱབ་སྣོན་འབད་ཡོདཔ་ཨིན་པས།
དེ་མ་ཚད་ རྫོང་ཁའི་ཆོས་ཚན་ནང་ ཆོས་སྐད་དང་ བསྐྱར་ཞིབ་ནང་དོན་ དེ་ལས་ འཕྲུལ་རིག་གཞིར་བཞག་གི་ ལྷབ་སྦྱང་འབད་ནི་ཚུ་ བཙུགས་ཡོདཔ་ད་ ཨིང་ལིཤ་ཆོས་ཚན་བཟུམ་མེན་པར་ རྫོང་ཁའི་ཆོས་ཚན་ནང་ ལམ་སྲོལ་གཞི་རྩ་ཚུ་ཡང་ བཀོད་བསྒྲིགས་འབད་ཡོདཔ་ཨིན་པས།
ཆོས་ཚན་བསྐྱར་ཞིབ་ཀྱི་ དམིགས་དོན་དེ་ཡང་ རྫོང་ཁ་དེ་ སྤྲོ་བ་ཆེ་ཏོག་ཏོ་དང་ བརྩི་མཐོང་ཤེས་ཡོན་དང་འབྲེལ་ ལམ་སྲོལ་ཉམས་སྲུང་འབད་ནིའི་དོན་ལུ་ཨིན་པས།
རྫོང་ཁའི་ཆོས་ཚན་གྱི་གྲངས་སུ་ རྩོམ་རིག་དང་ རྣམ་ཐར་ ཡིག་སྡེབ་ ཆོས་སྐད་ དེ་ལས་ བརྡ་གཞུང་ཚུ་ཡོདཔ་ཨིན་པས།
ཆོས་ཚན་གསརཔ་དང་འཁྲིལཝ་ད་ སློབ་རིམ་༩ པའི་ སློབ་ཕྲུག་ཚུ་གིས་ ཡིག་སྡེབ་དང་ འབྲི་རྩོམ་ རྣམ་ཐར་ གཏང་ཡིག་ དེ་ལས་ རྒྱལ་སྲས་ལག་ལེན་ཚུ་ ཆོས་སྐད་དང་ རྫོང་ཁ་༢ ཆའི་ནང་ ལྷབ་དོ་ཡོདཔ་ཨིན་པས།
རྣམ་ཐར་ཚུ་གི་གྲས་ལས་ སློབ་རིམ་༩ པ་དང་༡༠ པའི་ སློབ་ཕྲུག་ཚུ་ལུ་ ཡོངས་གྲགས་ཅན་གྱི་ འགྲོ་བ་བཟང་མོའི་རྣམ་ཐར་ སྟོན་དོ་ཡོདཔ་ཨིན་པས།
སློབ་རིམ་༡༡ པ་དང་༡༢ པའི་ སློབ་ཕྲུག་ཚུ་གིས་ འབྲི་རྩོམ་དང་ བཤེས་སྤྲིངས་ དེ་ལས་ ཨ་ཞེ་སྣང་སའི་རྣམ་ཐར་ཚུ་ ལྷབ་དགོཔ་ཨིན་པས།
སློབ་དཔོན་ལ་ལུ་ཅིག་གིས་ སློབ་ཕྲུག་ཚུ་ལུ་ ཆོས་སྐད་དང་ གཞན་སྐད་ཡིག་གི་ གཞི་རྟེན་ཤེས་ཡོན་ཚུ་མེད་ནི་དེ་གིས་ སློབ་སྟོན་འབདཝ་ད་ ལཱ་ཁག་རྐྱབ་དོ་ཡོད་པའི་ སྙན་ཞུ་འབད་ཡོདཔ་ཨིན་པས།
དེ་བཟུམ་སྦེ་ སློབ་དཔོན་ལ་ལུ་ཅིག་གིས་འབད་བ་ཅིན་ བསྐྱར་ཞིབ་ཚོགས་ཆུང་གིས་ དོན་སྨིན་ཅན་གྱི་ ཤེས་རིག་སོར་སྒྱུར་འབདཝ་ད་ བསམ་ལན་མངམ་བསྡུ་ལེན་འབད་ནིའི་དོན་ལུ་ གྲོས་བསྟུན་མངམ་འབད་དགོཔ་འདུག་ཟེར་ བསམ་འཆར་བཀོད་པའི་གནས་ཚུལ།
བཙན་སྐྱོགས་དབང་འདུས།