༉ ཁ་ཙ་ རྒྱལ་ཡོངས་རྩིས་དཔྱད་བཀོད་འཛིན་གྱིས་ དཔེ་སྐྲུན་འབད་མི་ མཐའ་འཁོར་རྩིས་དཔྱད་གནས་སྡུད་༢༠༢༤ ཅན་མ་དང་འཁྲིལཝ་ད་ འདས་པའི་ལོ་ནང་ འབྲུག་གི་ གློག་ཤུགས་ཕྱིར་བཙོང་བརྒྱ་ཆ་༢༨.༩༥ མར་བབས་སོང་ཡོད་རུང་ ས་སྣུམ་པེ་ཊཱོལ་དང་ ཌི་ཟིལ་ནང་འདྲེན་གྱི་ཐད་ཁར་ བརྒྱ་ཆ་༤༥.༥༧ ཡར་སེང་ཡོདཔ་ཨིན་པས།
འབྲུག་གིས་ གློག་ཤུགས་གི་ག་ཝཱཌ་ ཧ་ཝརསི་(ཇི་ཌབ་ལུ་ཨེཆི་)༥,༡༣༤.༨༤ ཕྱིར་བཙོང་འབད་མི་དེ་གིས་ འོང་འབབ་དངུལ་ཀྲམ་ས་ཡ་༡༧.༧༩ བཟོ་ཡོདཔ་ད་ དེ་ཡང་ ཧེ་མའི་ལོ་ནང་ དངུལ་ཀྲམ་ཐེར་འབུམ་༢༢,༦༦ གནས་པའི་ ཇི་ཌབ་ལུ་ཨེཆི་༧,༢༤༠.༢༡ དང་ཕྱདཔ་ད་ མར་བབས་སོང་ཡོདཔ་ཨིན་པས།
འདས་པའི་ལོ་ནང་ སྤྱིར་བཏང་གློག་ཤུགས་ཐོན་སྐྱེད་བསྡོམས་ ཇི་ཌབ་ལུ་ཨེཆི་༡༠,༥༣༥.༦ འབདཝ་ད་ བརྒྱ་ཆ་༢.༠༣ མར་བབས་སོང་ཡོདཔ་ཨིན་པས།
ཕྱིར་བཙོང་མར་བབས་འགྱོ་མི་དེ་ཡང་ གཙོ་བོ་ར་ བཟོ་གྲྭའི་མཁོ་འདོད་ལུ་བརྟེན་ ནང་འཁོད་བེད་སྤྱོད་ ཡར་སེང་འགྱོ་ནི་དེ་གིས་ཨིན་པས།
སྙན་ཞུའི་ནང་ བཟོ་གྲྭ་ལས་སྡེ་གིས་ གློག་ཤུགས་བེད་སྤྱོད་ནང་ བརྒྱ་ཆ་༧༧,༥༣ ཡར་སེང་སོང་ཡོད་པའི་ གསལ་བཀོད་འབད་མི་དེ་གིས་ ནང་འཁོད་བེད་སྤྱོད་བསྡོམས་བརྒྱ་ཆ་༩༣.༨༣ ལུ་ལྷོད་ཡོདཔ་ད་ ཕྱོགས་གཅིག་གི་ཁ་ཐུག་ལས་ ཁྱིམ་གུང་བེད་སྤྱོད་དེ་ བརྒྱ་ཆ་༣༢.༣༣ འབདཝ་ད་ མར་བབས་སོང་ཡོདཔ་ཨིན་པས།
བཟོ་སྐྲུན་ལས་སྡེ་གིས་ གློག་ཤུགས་བེད་སྤྱོད་མཐོ་ཤོས་དེ་ བརྒྱ་ཆ་༦༤,༩༠༤ ལུ་ ཐོ་བཀོད་འབད་ཡོདཔ་ད་ དེ་གི་ཤུལ་ལས་ བཟོ་སྐྲུན་ནང་བརྒྱ་ཆ་༩.༢ ཨིནམ་ད་ མི་སྡེ་དང་ ངོ་རྐྱང་ཞབས་ཏོག་ཚུ་ནང་བརྒྱ་ཆ་༩.༤༧ དང་ གཞན་གྱི་གྲས་ལས་ ས་གཏེར་དང་རྡོ་གཏེར་ནང་ བརྒྱ་ཆ་༥.༣༦ ཨིན་པས།
སྤྱིར་བཏང་རྒྱལ་ཁབ་ཀྱིས་ གློག་ཤུགས་ཕྱིར་བཙོང་འཐབ་ཨིན་རུང་ དཀོན་པའི་དུས་ཚོད་ལུ་ དངུལ་ཀྲམ་ཐེར་འབུམ་༢.༩༧ གནས་པའི་ གློག་ཤུགས་ཇི་ཌབ་ལུ་ཨེཆི་༦༢༢ འབདཝ་ད་ ནང་འདྲེན་བརྒྱ་ཆ་༡༥༡.༥ ཡར་སེང་ཡོདཔ་ཨིན་པས།
འབྲུག་གི་ནུས་ཤུགས་དེ་ གློག་ཤུགས་ལུ་ར་ གཙོ་བོར་བརྟེན་སྡོདཔ་ཨིན་རུང་ ས་སྣུམ་ཡང་ རྒྱ་ཆེ་དྲགས་སྦེ་ར་ ནང་འདྲེན་འབད་དོ་ཡོདཔ་ད་ རྒྱ་གར་ལས་ ས་སྣུམ་ནང་འདྲེན་འབད་མི་དེ་ གློག་ཤུགས་འགྲུལ་འཁོར་ཚུ་གི་ གོང་ཚད་སྤྲོད་ཚུགསཔ་སྦེ་ མ་འགྱོ་ཚུན་ འཕྲོ་མཐུད་དེ་ར་ ཡར་སེང་འགྱོ་ནི་ཨིན་པས།
འདས་པའི་ལོ་ནང་ ས་སྣུམ་གྱི་ནང་འདྲེན་ ཀི་ལོ་ལི་ཊར་(ཀེ་ཨེལ་)༢༡༠,༡༤༧.༢ ལུ་ ལྷོད་ཡོདཔ་ད་ དེ་ཡང་ གཙོ་བོ་ར་ སྣུམ་འཁོར་ཚུ་གི་ ལག་ལེན་དོན་ལུ་ཨིན་པས།
པེ་ཊཱོལ་ནང་འདྲེན་ དངུལ་ཀྲམ་ཐེར་འབུམ་༣.༣༩ འབདཝ་ད་ བརྒྱ་ཆ་༥༢.༠༨ ལུ་ ཡར་སེང་སོང་ཡོདཔ་ད་ ཌི་ཟིལ་ནང་འདྲེན་དེ་
དངུལ་ཀྲམ་ཐེར་འབུམ་༡༠འབདཝ་ད་ བརྒྱ་ཆ་༤༣.༣༨ ལུ་ ཡར་སེང་སོང་ཡོད་པའི་གནས་ཚུལ།
བཙན་སྐྱོགས་དབང་འདུས།
