༉ ཁ་ཙ་ སྤྱི་ཚོགས་དང་ སྒེར་སྡེའི་བར་ན་ མཉམ་འབྲེལ་སྒྲིང་སྒྲི་དང་ ཚོང་འབྲེལ་བསམ་འཆར་ཚུ་ ཁྲིམས་བཟོའི་བྱ་རིམ་ནང་ བཙུགས་ཐོག་ལས་ སྤྱི་ཚོགས་ཀྱིས་ སྤྱི་ཚོགས་-སྒེར་སྡེ་ལས་མཉམ་འབྲེལ་ ཐབས་བྱུས་འགོ་འབྱེད་འབད་ཡོདཔ་ཨིན་པས།
ཐབས་བྱུས་དེ་ཡང་ བརྡ་སྤྲོད་ལམ་དང་ ཁྲིམས་བཟོའི་འབྲེལ་འཛིན་གོང་འཕེལ་ དེ་ལས་ འབྲུག་གི་འཆར་གཞི་༡༣ པ་ རྒྱབ་སྐྱོར་འབད་ནི་ལུ་ བཟོ་ཡོདཔ་བཞིན་དུ་ དཔལ་འབྱོར་དེ་ གལ་ཅན་ཅིག་སྦེ་ ངོས་འཛིན་འབད་དེ་ སྒེར་སྡེ་ཡར་དྲག་མ་འགྱོ་བའི་མཐའ་མར་ ཐབས་བྱུས་དེ་ དུས་ཚོད་ཁར་ཨིན་པས།
སྤྱི་ལོ་༢༠༢༢ ལུ་ འབྲུག་གི་ ནང་འཁོད་འོང་འབབ་ དངུལ་ཀྲམ་ཐེར་འབུམ་༣༥.༨༥༥ ལུ་ ལྷོད་ཡོདཔ་བཞིན་དུ་ དེ་ལུ་ གཞུང་དབང་ལས་འཛིན་གྱིས་ བརྒྱ་ཆ་༥༥ དེ་ཅིག་ ལྷན་ཐབས་འབད་ཡོདཔ་ཨིན་པས།
སྒེར་སྡེ་གིས་འབད་བ་ཅིན་ བརྒྱ་ཆ་༤༥ ལྷན་ཐབས་འབད་ཡོདཔ་ཨིན་པས།
སྒེར་སྡེ་ལུ་ གཞུང་དང་གཅིག་ཁར་ མཉམ་འབྲེལ་ལེགས་ཤོམ་མེད་མི་དང་ དཔལ་འབྱོར་འཆར་གཞི་ནང་ གྲལ་གཏོགས་མེད་མི་ དེ་ལས་ ལྕོགས་གྲུབ་ཅན་ཚུ་ བཞག་མ་ཚུགས་པའི་ གདོང་ལེན་སྣ་ཚོང་ཡོད་པའི་ཁར་ དངུལ་འབྲེལ་ཐོབ་སྤྱོད་དང་ བཅའ་ཡིག་དང་འབྲེལ་བའི་ དཀའ་ངལ་ཚུ་ཡང་ ཡོདཔ་ཨིན་པས།
ཚོང་ལམ་གྱི་དོན་ལུ་ འཕྲལ་འཕྲལ་ར་ བར་འཛུལ་འབད་ཡོད་རུང་ ལྕོགས་གྲུབ་དང་ མཉམ་འབྲེལ་མེད་མི་ དེ་ལས་ གཞི་སྒྱུར་དང་འབྲེལ་བའི་ དཀའ་ངལ་བྱུང་དོ་ཡོདཔ་ཨིན་པས།
འཆར་གཞི་༡༣ པའི་ནང་ སྤྱི་ལོ་༢༠༣༤ ནང་འཁོད་ལུ་ ནང་འཁོད་ཐོན་སྐྱེད་ཡོངས་འབོར་ ཡུ་ཨེསི་ཌོ་ལར་ཐེར་འབུམ་༡༠ བཟོ་ནི་གི་ དམིགས་གཏད་ཡོདཔ་ད་ དེ་ཡང་ གཞུང་དང་ སྒེར་སྡེ་བར་ན་ མཉམ་འབྲེལ་དང་ ད་ལྟོའི་ གདོང་ལེན་ཚུ་ ཐབས་ལམ་བཏོན་ཐོག་ལས་ འཆར་གཞི་༡༣ པའི་ དམིགས་གཏད་འགྲུབ་ཚུགས་ནི་ཨིན་པས།
ཐབས་བྱུས་གསརཔ་ནང་ ཁྲིམས་བཟོའི་གྲོས་བསྟུན་ འགོ་འདྲེན་འཐབ་ནི་དང་ སྲིད་བྱུས་ལུ་ རྒྱབ་སྐྱོར་གཞི་བཀོད་ཀྱི་དོནལས་ འབྲེལ་ཡོད་དང་ ཕན་གནོད་དབྱེ་ཞིབ་ སྒེར་སྡེ་གོང་འཕེལ་གནད་དོན་སེལ་ཐབས་ དྭངས་གསལ་དང་འགན་ཁྲི་གོང་འཕེལ་ དེ་ལས་ རྫོང་ཁག་ཚུ་ནང་ ནང་འཁོད་མི་སྡེ་ཚོང་འབྲེལ་འབྲེལ་འཛིན་ གོང་འཕེལ་བརྩིས་ཏེ་ མ་མཉམ་འབྲེལ་གྱི་ ས་གོ་༤ ཡོདཔ་ཨིན་པས།
དེ་མ་ཚད་ བརྡ་སྤྲོད་གོང་འཕེལ་དང་ སྦྱོང་བརྡར་དང་ ཉམས་མྱོང་འཐོབ་ནི་ཐོག་ལས་ ལོ་བསྟར་ སྤྱི་ཚོགས་-སྒེར་སྡེའི་བར་ན་ ཞལ་འཛོམས་འཚོགས་ནི་གི་ འཆར་གཞི་ཡང་ ཚུད་དེ་ཡོདཔ་ཨིན་པས།
རྒྱལ་ཡོངས་ཚོགས་འདུའི་ཚོགས་དཔོན་ ལུང་བསྟན་རྡོ་རྗེ་གིས་ སླབ་མིའི་ནང་ ལས་རིམ་གྱིས་ ལས་སྡེ་ནང་འཁོད་ལུ་ ད་ལྟོའི་ གདོང་ལེན་རྐྱངམ་གཅིག་མེན་པར་ སྒེར་སྡེ་ཚུ་ལུ་ དབང་ཆ་བྱིན་ཚུགས་ཟེར་ཨིན་པས།
རྒྱལ་ཡོངས་ཚོགས་སྡེའི་ཁྲི་འཛིན་ སངས་རྒྱས་རྡོ་རྗེ་གིས་ ཐབས་བྱུས་དེ་ སྤྱི་ཚོགས་དང་ སྒེར་སྡེ་ཚུ་གི་བར་ན་ མཉམ་འབྲེལ་ཐོག་ལས་ འགོ་འབྱེད་འབད་མི་དེ་ དྲན་རྟགས་ཅན་ཅིག་ཨིནམ་ད་ སྒེར་སྡེའི་འགན་འཁྲི་ཚུ་ ངོས་འཛིན་འབད་ནི་ལུ་ བརྗེ་སོར་ཅན་ཅིག་ཨིན་ཟེར་ཨིན་པས།
འབྲུག་ཚོང་དང་བཟོ་གྲྭ་ཚོགས་སྡེའི་གཙོ་འཛིན་ རྟ་མགྲིན་དབང་ཕྱུག་གིས་ སླབ་མིའི་ནང་ ཐབས་བྱུས་དེ་ སྤྱི་ཚོགས་ཀྱི་འཐུས་མི་བགྲེསཔ་དང་ ཕྱག་ཞུ་བའི་བསྒང་ཡོད་མི་ འཐུས་མི་ཚུ་དང་ གྲོས་བསྟུན་འབད་ཐོག་ལས་ བཟོ་ཡོདཔ་ད་ ལས་རིམ་ལུ་བརྟེན་ སྒེར་སྡེ་ཚུ་གིས་ སྤྱི་ཚོགས་དང་ བཅའ་ཁྲིམས་དང་ སྒྲིག་གཞི་ཚུ་ནང་ འབྲེལ་འཛིན་འབད་ནི་ལུ་ གོ་སྐབས་ཐོབ་ཚུགས་ཟེར་ཨིན་པས།
འབྲུག་ལག་བཟོ་ཚོགས་སྡེའི་ བཀོད་ཁྱབ་མདོ་ཆེན་ མཆོད་རྟེན་རྡོ་རྗེ་གིས་ སླབ་མིའི་ནང་ ཐབས་བྱུས་ཀྱིས་ གཞུང་དང་ སྒེར་སྡེ་བར་ན་ སྲིད་བྱུས་དང་ བཅའ་ཡིག་ཚུ་ ལེགས་ཤོམ་བཟོ་ནི་ལུ་ ལྷན་ཐབས་འབད་ཚུགས་ནི་ཨིན་པས།
ལས་འགུལ་དེ་ སྔོ་ལྗང་བསྒྱུར་བཅོས་མཉམ་འབྲེལ་གྱི་ ཆ་ཤས་ལས་རིམ་ཅིག་ཨིནམ་བཞིན་དུ་ འབྲུག་གི་སྤྱི་ཚོགས་ རྒྱབ་སྐྱོར་ཐོག་ལས་ འབྲུག་ལག་བཟོ་ཚོགས་སྡེ་གིས་ འགོ་ཁྲིདཔ་འབད་དེ་ འབྲུག་ཚོང་དང་བཟོ་གྲྭ་ཚོང་འབྲེལ་དང་ སྒེར་སྡེ་ཚོགས་སྡེ་དང་ མཉམ་འབྲེལ་ཐོག་ལས་ བཟོ་ཡོད་ཡོད་པའི་གནས་ཚུལ།
ཨོ་རྒྱན་རྡོ་རྗེ།