ང་བཅས་རའི་ འཕྲེད་བསྟེན་གདོང་ལེན་ལུ་ དུས་མཐུན་ལན་གསལ།
༉ ང་བཅས་རའི་ མི་སེར་ཚུ་གི་ འཕྲོད་བསྟེན་དང་བདེ་སྐྱིད་ལུ་ མ་འབུ་བའི་ནད་གཞི་ཚུ་ལུ་བརྟེན་ གདོང་ལེན་སྦོམ་བྱུང་སྟེ་ཡོདཔ་ད་ ད་རེས་ནངས་པར་ རྒྱལ་ཁབ་ནང་ སེམས་ཁམས་ཀྱི་ནད་གཞི་དང་ དོན་ཧིང་གི་ནད་གཞི་ དེ་ལས་ ཁྲག་ཤུགས་ཀྱི་ནད་གཞི་ཚུ་ ཚབས་ཆེན་ཅིག་ལུ་གྱུར་ཡོདཔ་བཞིན་དུ་ སྣང་མེད་སྦེ་བཞག་མ་བཏུབ་པའི་ ཚ་གྱང་ཆེ་ཤོས་ཅིག་ཨིནམ་ད་ འདི་གིས་ ང་བཅས་རའི་ གསོ་བའི་ལས་ཁུངས་ཀྱི་ཐོན་ཁུངས་ཚུ་ འབྱེམ་ཕོག་དོ་ཡོདཔ་མ་ཚད་ རྒྱལ་ཁབ་ཀྱི་ གོང་འཕེལ་དམིགས་གཏད་ཚུ་ཡང་ བར་ཆད་རྐྱབ་ཨིན་མས།
ནད་གཞི་དེ་ཚུ་ གདོང་ལེན་འབད་ཐབས་ལུ་ འབྲུག་གི་གསོ་བའི་ལས་སྡེ་གིས་ གསོ་བ་ལྷན་ཁག་དང་ ཡུ་ནི་སེཕ་དང་གཅིག་ཁར་ མཉམ་འབྲེལ་ཐོག་ལས་ འབྲུག་གི་ གེ་སར་རྒྱལ་པོ་གསོ་རིག་གཙུག་ལག་སློབ་སྡེ་གིས་ ཟས་བཅུད་དོན་ལུ་ ཁྱད་འཕགས་ལྟེ་བ་ཅིག་ འགོ་འབྱེད་འབད་ཡོདཔ་ལས་ བསྟར་སྤྱོད་འབད་ཚུགས་ནི་ཨིན་མས།
སྨན་གཡོག་དང་མི་མང་འཕྲོད་བསྟེན་ནང་ མཐུན་རྐྱེུན་གསརཔ་ གཞི་བཙུགས་འབད་མི་དེ་གིས་ ང་བཅས་རའི་ འཕྲོད་བསྟེན་བདག་འཛིན་ནང་ གྲུབ་འབྲས་ཅན་ཅིག་ཨིནམ་ད་ མ་འབུ་བའི་ནད་གཞི་ཚུ་ སྔོན་འགོག་དང་ འཛིན་སྐྱོང་འཐབ་ནི་གཉིས་ཆ་རའི་ནང་ ཟས་བཅུད་ཀྱིས་ འགན་ཁག་སྦོམ་འབག་དོ་ཡོད་པའི་ ངོས་འཛིན་བྱུང་དོ་ཡོདཔ་ཨིན་མས།
འདི་ལུ་གཞི་བཞག་སྟེ་ བཟའ་འཐུང་སྤྱོད་ལམ་གྱིས་ གསོ་བའི་གྲུབ་འབྲས་ལུ་ བསྒྱུར་བཅོས་འབད་ཚུགསཔ་ལས་ ལྟེ་བ་འདི་ སྔོན་འགོག་ཅན་གྱི་ ཞིབ་འཚོལ་དང་ མི་མང་འཕྲོད་བསྟེན་རྩོལ་སྒྲུབ་ དེ་ལས་ མཁས་མཆོག་ཚུ་གི་མཉམ་འབྲེལ་ཐོག་ལས་ འབུ་ནི་མེད་པའི་ནད་གཞི་ཚུ་གི་ དཀའ་ངལ་སེལ་ཐབས་འབད་སའི་ ལྟེ་བ་ཅིག་སྦེ་ འགྱུར་ནི་ཨིན་མས།
ཟས་བཅུད་དང་མ་ལྡན་མི་དེ་ མ་འབུ་བའི་ནད་གཞི་ཚུ་ ཡར་འཕར་འགྱོ་ནི་ལུ་ ལྷན་ཐབས་སྦོམ་ཤོས་ཅིག་ཨིནམ་ད་ བཟོ་སྒྱུར་བཟའ་འཐུང་དང་ གུ་རམ་ དེ་ལས་ ཚོ་ཏོ་ཚུ་གིས་ དམིགས་བསལ་དུ་ ཁྲོམ་སྡེའི་ས་ཁོངས་ཚུ་ནང་སྡོད་མི་ འབྲུག་གི་ བཞེས་སྒོ་ཚུ་ནང་ ཤུམ་ཚུད་དེ་ཡོདཔ་ཨིན་མས།
འདི་བཟུམ་སྦེ་ གྲོང་གསེབ་མི་སྡེ་ཚུ་ནང་ ཚད་སྙོམས་བཞེས་སྒོ་དང་ བཅུད་ལྡན་བཞེས་སྒོ་ཚུ་ བཟའ་ནིའི་ཐད་ཁར་ ཁྱད་པར་ཞུགས་ཏེ་ཡོདཔ་ད་ དཔེ་འབད་བ་ཅིན་ ཟས་བཅུད་ཤེས་ཡོན་མ་འཐོབ་མི་དང་ བཅུད་ལྡན་བཟའ་འཐུང་ཚུ་ ཉོ་མ་ཚུགས་མི་དེ་གིས་ གྲོང་གསེབ་དང་ ཁྲོམ་སྡེ་གཉིས་ཆ་རའི་ནང་ སྡོད་མི་ཚུ་གི་འཕྲོད་བསྟེན་ལུ་ ཉེན་ཁ་བྱུང་སྟེ་ཡོདཔ་ཨིན་མས།
ལྟེ་བ་དེ་གིས་ ཞིབ་འཚོལ་གྱི་མཐུན་རྐྱེན་རྐྱངམ་གཅིག་མེན་པར་ ཚན་རིག་གི་ཐོབ་ཐངས་དང་ མི་སྡེའི་འཕྲོད་བསྟེན་ལག་ལེན་གྱི་བར་ན་ ཟམ་བཟུམ་ཅིག་སྦེ་ཡང་ ལཱ་འབད་ནི་ཨིནམ་ད་ དེ་བསྒང་ མཁས་མཆོག་ཚུ་གིས་ འབྲུག་གི་བཟའ་སྤྱོད་གདོང་ལེན་ཚུ་ ཧ་གོ་ནི་དང་ རྒྱལ་ཁབ་ཀྱི་ལམ་སྲོལ་དང་ ས་ཆའི་གནས་སྟངས་ལུ་བལྟ་སྟེ་ ཐབས་ལམ་ཚུ་ བཏོན་ནི་ཨིན་མས།
མཐུན་རྐྱེན་དེ་ ཤེས་རིག་གཙུག་སྡེ་ཅིག་ནང་ གཞི་བཙུགས་འབད་ནི་དེ་གིས་ འབྲུག་པའི་སློབ་ཕྲུག་དང་ གསོ་བའི་ལས་བྱེདཔ་ཚུ་གིས་ ད་རེས་ནངས་པར་ རིག་རྩལ་ཅན་གྱི་སྦྱོང་བརྡར་དང་ ཐོན་ཁུངས་ཚུ་འཐོབ་ཚུགས་ནི་ཨིནམ་ད་ དེ་གིས་ ཁོང་རའི་མི་སྡེ་ནང་ ཟས་བཅུད་འཕྲོད་བསྟེན་ལུ་ གཙོ་བོར་བཏོན་ཚུགས་ནི་ཨིན་མས།
ཨིན་རུང་ ལྟེ་བ་ཅིག་རྐྱངམ་གཅིག་ བཟོ་ནི་དེ་ ཕན་ཐོགས་མེདཔ་ད་ དེ་གིས་ ཕན་ཐོགས་ངེས་བདེན་འབྱུང་ནིའི་དོན་ལུ་ ཞིབ་འཚོལ་དང་ གྲོས་འདེབས་ཚུ་ མཐུན་རྐྱེན་ནང་ལས་ འཐོན་འོང་པ་ཅིན་ ཐད་ཀར་དུ་ འོང་ཚུགས་པའི་ འགོ་ཐོག་གི་ལས་སྣ་ཚུ་ འགོ་བཙུགས་ཚུགས་ནི་ཨིནམ་ད་ མི་སྡེའི་འགོ་ཁྲིདཔ་དང་ གསོ་བའི་ཁྱད་རིགཔ་ དེ་ལས་ སྲིད་བྱུས་བཟོ་མི་ཚུ་གིས་ མཉམ་རུབ་ཐོག་ལས་ ལཱ་འབད་དགོཔ་ལས་ ཤེས་ཡོན་དེ་ འབྲུག་གི་བཟའ་ཚང་ག་རའི་ནང་ ལྷོད་ཚུགསཔ་བཟོ་དགོ།
ཟས་བཅུད་ཤེས་ཡོན་དེ་ སློབ་གྲྭའི་ཆོས་ཚན་ནང་ ངེས་པར་དུ་བཙུགས་དགོཔ་ད་ དེ་གིས་ ན་གཞོན་ཚུ་ མི་ཚེ་ཧྲིལ་བུམ་སྦེ་ ཟས་བཅུད་སྤྱོད་ལམ་ལེགས་ཤོམ་བཟོ་ཚུགས་པའི་ གཞི་འགྱམ་བཙུགས་ཚུགས་ནི་ཨིན་མས།
གསོ་བའི་ལས་བྱེདཔ་ཚུ་གིས་ དུས་རྒྱུན་གྱི་ གསོ་བའི་ཞབས་ཏོག་གི་ ཆ་ཤས་ཅིག་སྦེ་ གཟུགས་ཁམས་འཕྲོད་བསྟེན་གྱི་ལམ་སྟོན་ཚུ་ བྱིན་ནིའི་གོ་སྐབས་སྤྲོད་དགོཔ་ད་ དེ་ཡང་ གདོང་ལེན་ཅན་གྱི་སྨན་བཅོས་ལས་ སྔོན་འགོག་འབད་ཐབས་ལུ་ཨིན་མས།
ལྟེ་བ་འདི་ནང་ ང་བཅས་རའི་མི་སེར་ཚུ་ ཉེན་སྲུང་འབད་ནིའི་དང་འདོད་དང་ མ་འོངས་པ་ལུ་ གསོ་བའི་གནས་སྟངས་ཡར་དྲག་གཏང་ནི་གི་ རེ་འདུན་ཡོདཔ་ཨིན་རུང་ ང་བཅས་རའི་ མཐར་འཁྱོལ་དེ་ གསོ་བའི་སྲིད་བྱུས་དང་ མི་སྡེ་ཚུའི་དོན་ལས་ ཟས་བཅུད་གཅིག་སྒྲིལ་འབད་ནིའི་ ཁས་བླངས་ལུ་བརྟེན་དགོཔ་འདུག།