༉ གནམ་དགུན་ཐོན་ཏེ་ གཙང་ཆུའི་གནས་སྟངས་ ལེགས་ཤོམ་འགྱོ་དོ་ཡོད་མི་དང་བསྟུན་ ནུབ་མོ་ཟླཝ་ཤརཝ་དང་འབྲེལ་ ལྟ་བཤལཔ་ཚུ་གིས་ ཕྱི་རུ་ཁམས་དང་ གནམ་ནུབ་མོར་ གཙང་ཆུ་བདའ་སྟེ་ གྲུ་གཏང་འགྱོ་ནི་ལུ་ གཞན་དང་མ་འདྲ་བའི་ ཉམས་མྱོང་ཅིག་ འཐོབ་དོ་ཡོདཔ་བཞིན་དུ་ འདི་བཟུམ་གྱི་ སྤྲོ་སྣང་ལུ་བརྟེན་ ནུབ་མོའི་སྐབས་ལུ་ མཛེས་ཆ་ཅན་གྱི་ སྤུ་ན་ཁའི་མཐོང་སྣང་ཚུ་ མཐོང་ཚུགས་དོ་ཡོདཔ་ཨིན་པས།
ད་ལྟོ་ ལྟ་བཤལ་ངོ་ཚབ་ མའེ་བྷུ་ཊཱན་ཟེར་མི་ལུ་ ནུབ་མོའི་གྲུ་ཆུང་ ལག་ལེན་འཐབ་ཆོག་པའི་ གནང་བ་བྱིན་ཏེ་ཡོདཔ་ད་ སྤུ་ན་ཁ་རྫོང་ཁག་བདག་སྐྱོང་དང་ མའེ་བྷུ་ཊཱན་ཟེར་མི་ ལྟ་བཤལ་ལས་ཚབ་༢ ཀྱིས་ མཉམ་འབྲེལ་ཐོག་ལས་ སྤྱི་ལོ་༢༠༢༤ ལུ་ ནུབ་མོ་ གྲུ་གཏང་ནིའི་དོན་ལུ་ ལས་རིམ་འགོ་འབྱེད་འབད་ཡོདཔ་ཨིན་པས།
སྤྱི་ཟླ་༨ པའི་ནང་ ལག་ལེན་འགོ་འབྱེད་འབད་ཞིནམ་ལས་ ལས་རིམ་དེ་ ཁག་གཉིས་སྦེ་ ཕྱི་རུ་གནམ་བསྲོ་ཁམས་ལུ་དང་ ནུབ་མོའི་དོན་ལུ་སྦེ་ བཟོ་ཡོདཔ་ཨིན་པས།
ལྟ་བཤལཔ་ཚུ་གིས་ ལས་དོན་གསར་པའི་སྒོ་ལས་ སྤུ་ན་ཁ་ལུང་གཤོང་གི་ ནུབ་མོའི་མཛེས་ཆ་ཚུ་ བལྟ་ཚུགས་ནི་དང་ དེ་ཡང་ ནུབ་མོ་དང་ ཕྱི་རུ་ཁམས་ཀྱི་ གྲུ་ཆུང་ལག་ལེན་འཐབ་ནི་ཚུ་ཨིན་པས།
ལས་རིམ་དེ་གིས་ ལྟ་བཤལཔ་ཚུ་ སེམས་ཁར་སྤྲོ་སྣང་མ་འདྲཝ་ བྱུང་ཚུགས་པའི་ཁར་ ལུང་གཤོང་གི་ མཛེས་ལྡན་རྒྱན་ཆ་ཚུ་ལུ་ སྤྲོ་བ་འབྱུང་ཚུགས་པའི་ འོས་འབབ་ཡང་ཡོདཔ་ཨིན་པས།
དཔལ་འབྱོར་གོང་འཕེལ་དང་ ཚོང་འབྲེལ་འགོ་དཔོན་ལས་རོགསཔ་ ཡེ་ཤེས་རྡོ་རྗེ་གིས་ བཤད་མིའི་ནང་ ནུབ་མོའི་གྲུ་ཆུང་གི་ ལས་རིམ་འགོ་བཙུགས་མི་དེ་ གཙོ་བོ་ར་ སྤུ་ན་ཁ་ལུ་ ལྟ་བཤལཔ་ཚུ་འོང་བཅུག་ནི་གིས་མ་ཚད་ རྒྱལ་ཁབ་ནང་ ལྟ་བཤལཔ་མངམ་འོང་ནིའི་ ཐབས་ལམ་ཨིན་ཟེར་ཨིན་པས།
ནུབ་མོའི་ གྲུ་ཆུང་ལག་ལེན་འཐབ་པའི་སྐབས་སུ་ དེ་ཁར་གལ་གནད་ཆེ་ཤོས་དེ་ ཉེན་སྲུང་དང་ལྡནམ་སྦེ་ ལག་ལེན་འཐབ་ནི་དེ་ཨིནམ་མ་ཚད་ གཙང་ཆུའི་སྐྱེ་ལྡན་གནས་སྟངས་ཚུ་ལུ་ཡང་ དྲན་ཤེས་བཏོན་དགོ་ཟེར་ཨིན་པས།
ནུབ་མོ་གྲུ་ཆུང་ལག་ལེན་འཐབ་མི་ཚུ་ནང་ མཐོང་གསལ་བྱུང་ཐབས་ལུ་ གློག་མེ་ཚུ་དགོ་པའི་ཁར་ ཉེན་སྲུང་གི་ གློ་སྐྱོར་ཚུ་ཡང་ ཚུལ་དང་ལྡནམ་སྦེ་ བཟོ་དགོ་ཟེར་ཨིན་པས།
གྲུ་ཆུང་བཏང་མི་རེ་གིས་ རྒྱུན་འབྲེལ་གྱི་ མཁོ་ཆས་རེ་འབག་དགོ་ནི་དང་ ལྟ་བཤལཔ་ཚུ་འབད་བ་ཅིན་ ཉེན་སྲུང་གི་ མཁོ་ཆས་ཚུ་ གྱོན་དགོཔ་མ་ཚད་ མཁོ་ཆས་དེ་ གལ་སྲིད་ གཙང་ཆུའི་ནང་འཐིམ་ད་ མཁོ་ཆས་ཆུ་གིས་སྦངམ་ད་ དེ་ནང་ལས་ གློག་མེ་འབར་བཏུབ་པའི་ མཐུན་རྐྱེན་ཡོད་མི་ཚུ་ དགོ་ཟེར་ཨིན་པས།
དེ་ལས་ གཞན་ཡང་ ལྟ་བཤལཔ་ཚུ་ཉེན་སྲུང་དང་ལྡནམ་སྦེ་ ལག་ལེན་འཐབ་དོན་ལུ་ ཧེ་མ་ གྲུ་ཆུང་ཅིག་འགྱོ་དགོཔ་ད་ གྲུ་ཆུང་བཏང་མི་ཚུ་ཡང་ ཉུང་ཤོས་ར་ ལོ་གཅིག་གི་ཉམས་མྱོང་ཡོད་པའི་གུ་ ངོས་འཛིན་ཅན་གྱི་ལག་ཁྱེར་འཆང་མི་ ནུབ་མོ་དང་ ཕྱི་རུ་ཁམས་ གྲུ་བཏང་བའི་ཉམས་མྱོང་ཅན་ཚུ་ གྲུ་ཆུང་བཏང་མི་སྦེ་ བཙུགསཔ་ཨིན་ཟེར་ ཡེ་ཤེས་རྡོ་རྗེ་གིས་ བཤདཔ་ཨིན་པས།
ཉེན་སྲུང་གི་དོན་ལུ་ ནུབ་མོ་གཏང་མིའི་ གྲུ་ཆུ་ཚུ་ ཤིང་གི་ཨེན་ཏ་གིས་ མཐའ་སྐོར་ཏེ་ གློ་སྐྱོར་རྐྱབ་དགོཔ་ཨིན་པས།
ནུབ་མོའི་གྲུ་ཆུང་བཏང་ནི་དེ་ཡང་ གནམ་དགུན་གཙང་ཆུའི་ཚད་གཞི་ སྙོམས་ཏོག་ཏོ་ཐལ་ཏེ་ ཉེན་ཁ་མེད་པའི་སྐབས་སུ་ ལག་ལེན་འཐབ་ནི་མ་གཏོགས་ གལ་སྲིད་ གནམ་བྱཱར་གྱི་གཙང་ཆུ་ བྲེས་པའི་བསྒང་འབད་བ་ཅིན་ ལག་ལེན་འཐབ་མ་ཆོགཔ་སྦེ་ཨིན་པས།
ཡེ་ཤེས་རྡོ་རྗེ་གིས་ བཤད་མིའི་ནང་ སྤྱིར་བཏང་འབད་བ་ཅིན་ ལྟ་བཤལཔ་ཚུ་གིས་ སྤུ་ན་ཁ་ལུ་ གནམ་ཉིན་མ་ལྟ་བཤལ་ལུ་འོང་དོ་ཡོད་རུང་ ད་རེས་ཀྱི་ ཐབས་བྱུས་གསརཔ་ལུ་བརྟེན་ ཞག་གྲངས་མང་སུ་དང་ ནུབ་མོ་ཡང་ ས་གནས་ནང་སྡོད་ནི་ལུ་ གདམ་ཁ་རྐྱབ་ནི་ཨིནམ་ལས་ དེ་གིས་ས་གནས་ཀྱི་ འབྱོར་གོང་འཕེལ་ལུ་ ཕན་ཐོགས་སྦོམ་འབྱུང་འོང་ཟེར་ཨིན་པས།
སྤུ་ན་ཁ་རྫོང་ཁག་བདག་སྐྱོང་དང་ མའེ་བྷུ་ཊཱན་གྱི་བར་ནང་ མོས་མཐུན་གྱི་གན་ཡིག་གུ་ མཚན་རྟགས་བཀོད་ཡོདཔ་ད་ དེ་ཡང་ བདག་སྐྱོང་གིས་ ཕན་ཚུན་གྱི་ རྒྱ་སྐྱེད་དང་ ལེགས་བཅོས་འབད་དགོཔ་ཡོད་མི་ཚུ་ ལེགས་ཤོམ་བཟོ་ཚུགས་ནི་ཨིན་པས།
ལོ་༥ གི་རྒྱབ་ལས་འབད་བ་ཅིན་ ལྟ་བཤལ་ལས་ཚབ་གཞན་མི་ཚུ་གིས་ཡང་ ལས་དོན་དེ་ ལག་ལེན་འཐབ་ཆོག་ནི་ཨིན་རུང་ དགོས་མཁོ་ཅན་གྱི་ མཐུན་རྐྱེན་ཚུ་ ཚང་དགོཔ་མ་ཚད་ ནུབ་མོ་ལག་ལེན་འཐབ་ཆོག་པའི་ ཆོག་ཐམ་ཚུ་ཡང་ དགོ་ཟེར་ཨིན་པས།
ད་ལྟོ་ གོང་འཕེལ་བཏང་པའི་བསྒང་གི་ གནས་སྟངས་དང་བསྟུན་ འབྲུག་གི་ ས་གནས་གཞན་མི་ཚུ་ནང་ཡང་ ནུབ་མོའི་གྲུ་ཆུང་གི་ ལས་རིམ་འགོ་བཙུགས་ཚུགས་ནི་དང་ མ་གཞི་ ལྟ་བཤལ་པའི་གནས་སྟངས་དང་བསྟུན་པའི་ མཐའ་འཁོར་ཉམས་སྲུང་ལུ་ བར་ཆད་མེད་པའི་ ལས་རིམ་ཚུ་དགོ་མི་དེ་ཡང་ གནམ་ཉིན་མ་ གྲུ་ཆུང་གཏང་ནི་དང་ཕྱདཔ་ད་ ནུབ་མོ་བཏང་མི་གིས་ མཐའ་འཁོར་སྐྱེ་ལྡན་གནས་སྟངས་ལུ་ གནོད་པ་མང་སུ་ཡོདཔ་སྦེ་ཨིན་པས།
ནུབ་མོའི་གྲུ་ཆུང་ལག་ལེན་འཐབ་ནི་དེ་ ཟད་འགྲོ་མང་སུ་ གནས་དོ་ཡོད་མི་དེ་ཡང་ དེ་ཁར་ ཉེན་སྲུང་གི་མཁོ་ཆས་ འཐེབ་ལེ་ཤ་ཅིག་ བཙུགས་དགོཔ་ཡོད་ནི་དེ་གིས་ཨིནམ་ད་ ང་བཅས་ཀྱིས་ སྐྱེ་ལྡན་གནས་སྟངས་ལུ་ ག་དེ་གནོད་པ་ཉུང་སུ་སྦེ་ མར་ཕབ་འབད་ནི་ལུ་ རྩ་འགེངས་ནི་ཨིན་ཟེར་ ཡེ་ཤེས་རྡོ་རྗེ་གིས་ བཤདཔ་ཨིན་པས།
སྤུ་ན་ཁའི་ ལས་དོན་དང་པ་དེ་གིས་ ལྟ་བཤལཔ་ཚུ་ལུ་ གཞན་དང་མ་འདྲ་བའི་ སྤྲོ་སྣང་འཐེབ་ཅིག་ར་ བྱིན་ཚུགས་ནི་ཨིན་པས།
ཕོ་ཆུ་དང་ མོ་ཆུ་བདའ་སྟེ་ ཉིན་མའི་གྲུ་ཆུང་བཏང་ནི་དེ་ ཕྱིའི་ལྟ་བཤལཔ་དང་ ནང་གི་ངོ་རྐྱང་ག་ར་གིས་ ལག་ལེན་འཐབ་ཆོག་ནི་ཨིན་པས།
དེ་ལས་ གྲུ་ཆུང་བཏང་ས་ཚུ་ཡང་ ཕོ་ཆུ་དང་ མོ་ཆུ་གུ་ལུ་ གཞན་ཡང་ ཆུ་ཁ་ལུ་ ཨ་མོ་ཆུ་དང་ སྤ་རོ་ལུ་ སྤ་ཆུ་ གཞལམ་སྒང་ལུ་ གྲང་མེད་ཆུ་ཚུ་ཡོདཔ་ཨིན་པས།
ད་ལྟོ་ སྤུ་ན་ཁ་ལུ་ གྲུ་ཆུང་བཏང་མི་༦ ཡོདཔ་ད་ སྤ་རོ་ གཞལམ་སྒང་ ཆུ་ཁ་ལུ་འབད་བ་ཅིན་ རེ་རེ་ཡོདཔ་ཨིན་པས།
མོ་ཆུ་ནང་འབད་བ་ཅིན་ འོད་སྦི་ས་ལས་ ལྕང་ཡུལ་ཟམ་ཚུན་ བཏང་དོ་ཡོད་མི་དེ་ཡང་ སྤུ་ན་ཁ་རྫོང་ལས་ སྐར་མ་དག་པ་ཅིག་གི་ ས་གནས་ཁར་ཨིནམ་བཞིན་དུ་ སྤྱི་ལོ་༢༠༡༨ ཚུན་ལུ་འབད་བ་ཅིན་ ཕོ་ཆུ་དང་ མོ་ཆུ་འཛོམས་ས་ཚུན་ བཏང་ཆོག་དོ་ཡོདཔ་ཨིན་པས།
གྲུ་ཆུང་གི་དོན་ལུ་ ཕྱིའི་ལྟ་བཤལཔ་དང་ ལུང་ཕྱོགས་ཚུ་ ག་ར་འབད་རུང་ གྲུ་ཆུང་རེ་ལུ་ དངུལ་ཀྲམ་༡༠,༠༠༠ རེ་ འཐུས་སྤྲོད་དགོ་དོ་ ཡོདཔ་ཨིན་པའི་གནས་ཚུལ།
ཚེ་རིང་དབང་འདུས།