འབྲུག་མཁའ་འགྲུལ་གྱིས་ ལུང་ནག་ན་གི་ སློབ་གྲྭ་ཚུ་ནང་ གླ་འཐུས་སྤྲོད་མ་དགོཔ་སྦེ་ སྒོང་རྡོག་སྐྱེལ་འདྲེན་འབད་ནི།

བཙན་སྐྱོགས་དབང་འདུས།

༉ འབྲུག་མཁའ་འགྲུལ་གྱིས་ ནངས་པ་ ལུང་ནག་ན་གི་ མཐའ་ཟུར་སློབ་གྲྭ་ཚུ་ནང་ གླ་འཐུས་སྤྲོད་མ་དགོཔ་སྦེ་ སྒོང་རྡོག་སྐྱེལ་འདྲེན་འབད་ནི་ཨིནམ་ད་ ས་ཆའི་གནས་སྟངས་ལུ་མ་བལྟ་བར་ ཨ་ལུ་ཕུད་རྡོག་གཅིག་ར་ རྒྱབ་སྐྱུར་མི་བཞག་ནིའི་དོན་ལུ་ཨིན་པས།

དེ་ཡང་ གཞུང་གི་ "ཨ་ལོ་གཅིག་ལུ་ སྒོང་རྡོག་གཅིག་ཟེར་མི་" ལས་རིམ་གྱི་ ཆ་ཤས་ཅིག་ཨིནམ་བཞིན་དུ་ སློབ་གྲྭ་ནང་ ལྟོ་བྱིན་ནིའི་ལས་རིམ་ཐོག་ལས་ ཉིན་བསྟར་བཞིན་དུ་ ཨ་ལོ་རེ་ལུ་ སྒོང་རྡོག་རེ་ བྱིན་ནི་ཨིན་པས།

ལས་རིམ་དེ་གིས་ སྤྱི་ཟླ་༤ པའི་ཚེས་༡ ལས་ སློབ་སྟོན་འགོ་བཙུགས་མི་ ལུང་ནག་ན་གི་ སློབ་གྲྭ་༤ ནང་ སློབ་ཕྲུག་༧༠ ལུ་ ཕན་ཐོགས་འབྱུང་ནི་ཨིནམ་ད་ དེ་ཡང་ ལུང་ནག་ན་སློབ་གྲྭ་ཆུང་བའི་ནང་ སློབ་ཕྲུག་༡༨ དང་ མནྜལ་སྒང་རྒྱ་སྐྱེད་སློབ་ཁང་ནང་ སློབ་ཕྲུག་༡༠ དེ་ལས་ ལུང་མགོ་རྒྱ་སྐྱེད་སློབ་ཁང་ནང་ སློབ་ཕྲུག་༡༨ དེ་ལས་ ཐཱན་ཛ་རྒྱ་སྐྱེད་སློབ་ཁང་ནང་ སློབ་ཕྲུག་༢༤ ཡོདཔ་ཨིན་པས།

འབྲུག་མཁའ་འགྲུལ་གྱིས་ གླ་འཐུས་སྤྲོད་མ་དགོཔ་སྦེ་ སྒོང་རྡོག་སྐྱེལ་འདྲེན་འབད་ནིའི་དོན་ལུ་ འབྲུག་སྒོ་ནོར་གོང་འཕེལ་ལས་འཛིན་དང་གཅིག་ཁར་ ཆིངས་ཡིག་ཅིག་གུ་ མཚན་རྟགས་བཀོད་ནུག།

རྒྱབ་སྐྱོར་འདི་མེད་པ་ཅིན་ ལུང་ནག་ན་ལུ་ སྒོང་རྡོག་ཚུ་ དངུལ་ཀྲམ་༦༠ དེ་ཅིག་ གནས་ནི་ཨིནམ་ད་ འབྲུག་སྒོ་ནོར་གོང་འཕེལ་ལས་འཛིན་གྱིས་ སོ་ནམ་པ་ཚུ་ལུ་ སྐྱེལ་འདྲེན་བརྩིས་ཏེ་ དངུལ་ཀྲམ་༨ ལས་༡༢ ཚུན་ སྤྲོད་དོ་ཡོདཔ་ད་ ལུང་ནག་ན་ལུ་ སྒོང་རྡོག་ཊེ་༡ ལུ་ དངུལ་ཀྲམ་༡༤༠༠ ལས་༡༦༠༠ གི་བར་ན་ གནས་དོ་ཡོདཔ་ད་ དེ་ཡང་ ས་གནས་ཀྱི་མི་ཚུ་གིས་ གནམ་གྲུ་ཧེ་ལི་ཀོབ་ཊར་ཐོག་ལས་ ཅ་ཆས་སྐྱེལ་འདྲེན་འབད་མི་ ཚོང་པ་ཚུ་ལས་ ཉོ་དོ་ཡོདཔ་ཨིན་པས།

སློབ་སྟོན་གྱི་ དུས་ཚོད་འདི་ལས་འགོ་བཙུགས་ཏེ་ ཨ་ལོ་གཅིག་ལུ་ སྒོང་རྡོག་གཅིག་ཟེར་མི་ ལས་རིམ་གྱི་འོག་ལུ་ ངོས་འཛིན་འབད་མི་ སློབ་གྲྭ་ཚུ་ནང་ ཨ་ལུ་ཚུ་ལུ་ ཟས་བཅུད་ཀྱི་ དཀའ་ངལ་སེལ་ཐབས་ལུ་ སྒོང་རྡོག་ཚུ་ བྱིན་དོ་ཡོདཔ་ཨིན་པས།

འགོ་ཐོག་ལུ་ མོ་བཏབ་སློབ་གྲྭ་༣༠༠ ནང་ སློབ་ཕྲུག་༣༢,༠༠༠ དེ་ཅིག་ ལས་རིམ་གྱི་ ཆ་ཤས་ཅིག་ཨིནམ་ད་ ད་རེས་ ལུང་ནག་ན་དེ་ ལས་རིམ་ནང་ཚུད་ཡོདཔ་བཞིན་དུ་ དུས་མཐུན་བཟོ་ཡོད་པའི་ཐོ་ནང་ སློབ་གྲྭ་༣༤༥ ཡོདཔ་ད་ དེ་ནང་ སློབ་གྲྭ་ཆུང་བ་༢༩༠ དང་ དམིགས་བསལ་ཤེས་ཡོན་སྤེལ་ཁང་༥ དེ་ལས་ རྒྱ་སྐྱེད་སློབ་ཁང་༥༠ ཡོདཔ་ལས་ སློབ་ཕྲུག་བསྡོམས་༣༡,༥༧༩ ལུ་ ཕན་ཐོགས་བྱུང་ཡོདཔ་ཨིན་པས།

འབྲུག་ལུ་ ཟས་བཅུད་མ་ལང་པའི་དཀའ་ངལ་དེ་ གསོ་བའི་ཚ་གྱང་སྦོམ་ཤོས་ཅིག་ཨིནམ་ད་ དེ་ཡང་ སྐྱེས་ལོ་༥ མན་ཆད་འབད་མི་ ཨ་ལུ་བརྒྱ་ཆ་༡༧.༩ དང་ ལྗིད་ཚད་མ་ལང་མི་ བརྒྱ་ཆ་༨.༧ དེ་ལས་ བུམོ་ན་ལོན་བརྒྱ་ཆ་༣༦.༥ ཁྲག་ཉུང་མི་ཨིན་པས།

སྒོང་རྡོག་དེ་ སྤུས་ཚད་ཅན་གྱི་ཟས་བཅུད་དང་ བི་ཊ་མིན་ དེ་ལས་ བི་ཊ་མིན་ཌི་དང་ བི་༡༢ དེ་ལས་ ལྕགས་བཟུམ་གྱི་ ཟས་བཅུད་ཚུ་མངམ་སྦེ་ཡོདཔ་ལས་ ཨ་ལུ་ཚུ་ཕོཝ་རྒྱགས་ནི་དང་ གོང་འཕེལ་ དེ་ལས་ ཤེས་རྟོགས་ཀྱི་ལཱ་འགན་ཚུ་ལུ་ ཁག་ཆེ་ཤོས་ཅིག་ཨིན་མས།

འཛམ་གླིང་སྤྱི་ཚོགས་ཀྱི་ ཟ་སྤྱོད་དང་སོ་ནམ་ལས་ཚོགས་ཀྱིས་ འགོ་ཐོག་ལོ་༢ ཀྱི་དོན་ལུ་ མ་དངུལ་ཡུ་ཨེསི་དྲོ་ལར་ས་ཡ་༢ ཁས་བླངས་འབད་དེ་ ལས་རིམ་འདི་ མོ་བཏབ་ཀྱི་དོན་ལུ་ རྒྱབ་སྐྱོར་འབད་དོ་ཡོདཔ་ཨིན་པས།

ལས་རིམ་འདི་གི་དོན་ལུ་ རྒྱལ་ཁབ་ནང་འཁོད་ཀྱི་ སོ་ནམ་པ་༡༦༩ དེ་ཅིག་གིས་ སྒོང་རྡོག་ཚུ་ བཀྲམ་སྤེལ་འབད་དོ་ཡོདཔ་ད་ སོ་ནམ་པ་ཚུ་གིས་ མཁོ་འདོད་ཚུ་ གྲུབ་མ་ཚུགས་པའི་ས་ཁོངས་ཚུ་ནང་ བི་ཨེལ་ཌི་སི་ཨེལ་གྱིས་ སྒོང་རྡོག་ཚུ་ འཚོལ་སྒྲུབ་འབད་དེ་ སྐྱེལ་འདྲེན་དང་ བཅའ་སྒྲིག་ཚུ་ལུ་ རྒྱབ་སྐྱོར་འབདཝ་ཨིན་པས།

ལོ་དང་པའི་ནང་ ལས་རིམ་དེ་གིས་ སྒོང་རྡོག་ས་ཡ་༨.༤ དེ་ཅིག་ བཀྲམ་སྤེལ་འབད་ཚུགས་པའི་ རེ་བ་ཡོདཔ་ད་ དེ་ལུ་ ཟད་འགྲོ་དངུལ་ཀྲམ་ས་ཡ་༡༠༡ དེ་ཅིག་ གནས་ནི་ཨིན་པས།

སྤྱི་ཟླ་༢ པའི་ནང་ ལས་རིམ་འདི་ འགོ་བཙུགས་ཞིནམ་ལས་ཚུར་ རྒྱལ་ཁབ་ཀྱི་ མཐའ་ཟུར་སློབ་གྲྭ་ཚུ་ནང་ སྣུམ་འཁོར་ལམ་མེད་སར་ཡང་ སྒོང་རྡོག་ཚུ་ བཀྲམ་སྤེལ་འབད་ཡོདཔ་ཨིན་པས།

བཀྲིས་གཡང་རྩེ་ ཡ་ལང་རྒེད་འོག་ནང་ཡོད་མི་ དུག་ཏི་སློབ་གྲྭ་ཆུང་བ་ནང་ སློབ་ཕྲུག་༦ ལས་བརྒལ་མེདཔ་ད་ སློབ་གྲྭ་དེ་ནང་ སྒོང་རྡོག་བསྐྱལ་ནིའི་དོན་ལུ་ ཉིནམ་གཅིག་ ལམ་འགྱོ་དགོཔ་ཨིན་པས།

དུག་ཏི་ལས་ཨིན་མི་ ཨུ་རྒྱན་ཆོས་འཕེལ་དང་ ཁོ་གི་ཆ་རོགས་དེ་གིས་ ཟླཝ་རེ་ནང་ ཚར་༢ ལཱ་ཁག་རྐྱབ་སྟེ་ དུག་ཏི་དང་ སློབ་ཕྲུག་༣༢ ཡོད་མི་ མེ་ལོང་མཁར་སློབ་གྲྭ་ཆུང་བ་༢ ཆ་ར་ལུ་ སྒོང་རྡོག་སྐྱེལ་དོ་ཡོདཔ་ཨིན་པས།

ལས་རིམ་འདི་གི་ ཆ་ཤས་ཅིག་སྦེ་ ད་རེས་ འབྲུག་སྒོ་ནོར་གོང་འཕེལ་ལས་འཛིན་གྱིས་ ཟླཝ་རེ་ནང་ སློབ་གྲྭ་ཚུ་ནང་ སྒོང་རྡོག་ཚར་༢ རེ་ བཀྲམ་སྤེལ་འབད་དོ་ཡོདཔ་ཨིན་པའི་གནས་ཚུལ།