བིམསི་ཊེག་ མཚོ་འགྲམ་སྐྱེལ་འདྲེན་མཉམ་འབྲེལ་གན་ཡིག་ ཚོགས་འདུ་གིས་ ཆ་འཇོག་འབད་ཡོདཔ།

༉ སྤྱི་ལོ་༢༠༢༥ ཟླ་༦ པའི་ཚེས་༩ ལུ་ རྒྱལ་ཡོངས་ཚོགས་འདུ་གིས་ སྤྱི་ཚོགས་༤ པའི་ ཚོགས་ཐེངས་༣ པའི་སྐབས་ལུ་ ང་གལ་མཚོ་ཁུག་སྣ་མང་ལས་སྡེ་ འཕྲུལ་རིག་དཔལ་འབྱོར་མཉམ་འལ་ཐབས་ག་(བིམསི་ཊེག་)གི་ མཚོ་འགྲམ་སྐྱེལ་འདྲེན་གན་ཡིག་གུ་ རྒྱབ་སྣོན་ཆ་འཇོག་འབད་ཡོདཔ་ཨིན་པས།

རྒྱལ་ཡོངས་ཚོགས་འདུ་གིས་ བིམསི་ཊེག་ མཚོ་འགྲུལ་སྐྱེལ་འདྲེན་མཉམ་འབྲེལ་གྱི་ གན་རྒྱ་གུ་ལུ་ ཚོགས་རྒྱན་སྐྱུར་ཐོག་ལས་ ཆ་འཇོག་གནང་པའི་སྐབས་ རྒྱན་སྐྱུར་ཚོགས་གྲལ་འཐུས་མི་ ཡོངས་བསྡོམས་༤༣ ཡོད་མི་ཆ་མཉམ་གྱིས་ རྒྱབ་སྐྱོར་གནང་སྟེ་ ཆ་འཇོག་གྲུབ་ཡོདཔ་ཨིན་པས།

ཚོགས་ཁང་གི་ སྒྲིག་གཞི་བྱ་བའི་གནད་སྤྱོད་དང་འཁྲིལ་ ཚོགས་དཔོན་ལུང་བསྟན་རྡོ་རྗེ་གིས་ ཚོགས་ཁང་ཡིག་ཚང་ལུ་ གན་ཡིག་དེ་ བསྐྱར་ཞིབ་ཀྱི་དོན་ལུ་ རྒྱལ་ཡོངས་ཚོགས་སྡེ་ལུ་ ཕུལ་དགོཔ་སྦེ་བཀའ་གནང་ཡོདཔ་ཨིན་པས།

ཚོགས་ཁང་ནང་ གན་ཡིག་གི་དོན་ཚན་༡༥ ཡོད་མི་ག་ར་ གསལ་སྟོན་ཕུལ་བའི་སྐབས་སུ་ དོན་ཚན་དག་པ་རེ་གུ་ གྲོས་བསྡུར་ཚུ་འབད་ཡོདཔ་ད་ འདི་ཚུ་ལུ་གཙོ་རིམ་སྒྲིག་སྟེ་ ཕྱི་འབྲེལ་དང་ འགྲོ་བ་མིའི་དབང་ཆའི་ཚོགས་ཆུང་གིས་ འབྲེལ་བ་ཅན་གྱི་ལས་སྡེ་ལེ་ཤ་ཅིག་དང་གཅིག་ཁར་ གྲོས་བསྟུན་ཚུ་ ལེགས་ཤོམ་སྦེ་ར་ འབད་ཡོདཔ་སྦེ་ཨིན་པས།

གན་ཡིག་དེ་གིས་ བིམསི་ཊེག་གི་ འཐུས་མི་རྒྱལ་ཁབ་༧ ཡོད་མི་ཚུ་ སྒྲིང་སྒྲི་བཟོ་ནིའི་རེ་བ་ཡོད་མི་རྒྱལ་ཁབ་ཚུ་ཡང་ འབྲུག་དང་ རྒྱ་གར་ བང་ལ་དེཤ་ ཐའེ་ལེནཌ་ མེ་ཡཱན་མར་ ནེ་པཱལ་ དེ་ལས་ ཤྲིལངྐ་ཚུ་ཡོདཔ་ཨིན་པས།

གཞི་རྟེན་མཁོ་ཆས་དང་ སྐྱེལ་འདྲེན་ལྷན་ཁག་གིས་ གན་ཡིག་འདི་གི་ཐོག་ལས་ གཙོ་རིམ་ཅན་གྱི་ཞབས་ཏོག་ཞུ་ཡོདཔ་ད་ བཟོ་གྲྭ་དང་སྐྱེལ་འདྲེན་བློན་པོ་ ཅན་ད་ར་བྷ་དུར་ གུ་རུང་གིས་ ཕྱི་འབྲེལ་དང་ འགྲོ་བ་མིའི་དབང་ཆའི་ཚོགས་ཆུང་འཐུས་མི་དང་ ཚོགས་ཁང་ལུ་ རྒྱལ་སྐྱོར་གནང་མི་ལུ་ གུས་ཞབས་ཡོད་ལུགས་ཚུ་ ཞུ་བ་འབད་ཡོདཔ་ཨིན་པས།

གན་ཡིག་གི་དམིགས་ཡུལ་དེ་ ཕན་ཚུན་ལུང་ཕྱོགས་མཐུད་སྦྲེལ་དང་ ཚོང་འབྲེལ་ཚུ་མཉམ་འབྲེལ་ཐོག་ལས་གོང་འཕེལ་བཏང་ནི་ མཚོ་གྲུའི་གནད་དོན་ནང་ རྒྱལ་ཡོངས་ཀྱི་ཆ་རོགས་འབད་ནི་ བདག་སྐྱོང་གྱི་བྱ་རིམ་སྟབས་བདེ་ཏོག་ཏོ་བཟོ་ནི་ གཞི་རྟེན་མཁོ་ཆས་ཚུ་ནང་ མ་རྩ་གཞི་བཙུགས་འབད་ནི་ ལུང་ཕྱོགས་དཔལ་འབྱོར་འཕེལ་ཚད་ཡར་དྲག་དང་ རྩ་བརྟན་བཟོ་ནི་ཨིནམ་མ་ཚད་ ས་མཚམས་མཐུད་སྦྲེལ་ནང་ ཚོང་འབྲེལ་ཚུ་ ལེགས་ཤོམ་འགྱོ་ཚུགས་ནི་དང་ མཚོ་གྲུ་གཞི་རྟེན་མཁོ་ཆས་ནང་མ་རྩ་བཙུགས་ཏེ་ འབྲེལ་གནད་ཅན་དང་ ཚུལ་མཐུན་ཅན་སྦེ་ བཟོ་ནི་ཚུ་ཡོདཔ་ཨིན་པས།

འབྲུག་གིས་ རྒྱལ་ཡོངས་དགའ་སྐྱིད་དཔལ་འཛོམས་ཀྱི་ལྟ་བ་ལུ་ གཞི་བཟུང་ཐོག་ལས་ འོང་འབབ་ཅན་བཟོ་ནི་ཨིནམ་བཞིན་དུ་ མང་ཤོས་ཅིག་གིས་འབད་བ་ཅིན་ གན་ཡིག་དེ་གིས་ རྒྱལ་ཁབ་ཚུ་གི་བར་ན་ མཚོ་གྲུའི་མཐུན་རྐྱེན་གྱི་ གོ་སྐབས་སྦོམ་འོང་ནི་ཨིན་པའི་ཁར་ དམིགས་བསལ་གྱི་ རྒྱ་གར་དང་ བང་ལ་དེཤ་ཚུ་ནང་ གོ་སྐབས་ཚུ་འཐོབ་འོང་ཟེར་ཨིན་པས།

དེ་གིས་ ང་བཅས་འབྲུག་པའི་ ཚོང་འབྲེལ་འཐབ་མི་ཚུ་ལུ་ཡང་ བིམསི་ཊེག་གི་རྒྱལ་གཞན་ཚུ་དང་གཅིག་ཁར་ མཚོ་གྲུའི་ཞབས་ཏོག་སྤྱོད་ཚུགས་ནི་དང་ རྒྱལ་ཁབ་འཐུས་མི་བདུན་ཡོད་པའི་གྲས་ལས་ འབྲུག་དང་ ནེ་པཱལ་ དེ་ལས་ ཤྲིལངྐ་རྒྱལ་ཁབ་གསུམ་དེ་ ད་ལྟོ་ ཆ་འཇོག་འབད་དགོཔ་ཡོདཔ་སྦེ་ཨིན་པས།

གན་ཡིག་དེ་གི་ གལ་གནད་ཅན་ཅིག་དེ་ རྩ་ཚན་༡༠ པ་ལྟར་དུ་སྦེ་ བྱ་སྒོའི་གནས་ཚད་ལམ་ལུགས་ གོང་འཕེལ་བཏང་ནི་ཨིནམ་བཞིན་དུ་ རྩ་ཚན་གྱིས་ གསལ་སྟོན་འབད་དོ་བཟུམ་ འབད་བ་ཅིན་ བྱ་སྒོའི་གནས་ཚད་ལམ་ལུགས་ལུ་བརྟེན་ འབྲེལ་གནད་ཅན་གྱི་སྡེ་ཚན་ཚུ་གི་བར་ན་ མཚོ་གྲུའི་ཚོང་འབྲེལ་ལེགས་ལྡན་ཅན་སྦེ་ གཞི་བཙུགས་འབད་ཐོག་ལས་ གན་ཡིག་དེ་གིས་ ནུས་ལྡན་ཅན་དང་ ལག་ལེན་ དེ་ལས་ མཐུན་རྐྱེན་ཚུ་ལེགས་ལྡན་འབྱུང་ཚུགས་ནི་ཨིན་པས།

གཞུང་འབྲེལ་གྱི་དོན་ལུ་ བཟོ་གྲྭ་དང་ སྐྱེལ་འདྲེན་ལྷན་ཁག་གིས་ བྱ་སྒོའི་གནས་ཚད་ལམ་ལུགས་བཟོ་སྟེ་ ཕྱི་འབྲེལ་ལྷན་ཁག་ལུ་ ཕུལ་ནི་ཨིན་པས།

ལྷན་ཁག་གིས་ བྱ་སྒོའི་གནས་ཚད་ལམ་ལུགས་ཚུ་ ཕྱི་འབྲེལ་ལྷན་ཁག་ལུ་ ལམ་ལུགས་གཞི་བཙུགས་འབད་དོན་ལུ་ ཕུལ་ཡོདཔ་ད་ ཕྱི་འབྲེལ་ལྷན་ཁག་གིས་འབད་རུང་ བྱ་སྒོའི་གནས་ཚད་ལམ་ལུགས་དེ་ ང་གལ་མཚོ་ཁུག་སྣ་མང་ལས་སྡེ་ འཕྲུལ་རིག་དཔལ་འབྱོར་མཉམ་འལ་ཐབས་ག་(བིམསི་ཊེག་) ཡིག་ཚང་ནང་ཕུལ་ཡོདཔ་བཞིན་དུ་ ད་ལྟོ་ལན་གསལ་ལུ་ བསྒུག་སྟེ་ཡོད་ཟེར་ཨིན་པས།

ཚོགས་ཁང་གིས་ གསལ་བཤད་འབད་དོ་བཟུམ་འབད་བ་ཅིན་ ལྷན་འཛོམས་ཀྱི་ཁ་ཐུག་ལས་འབད་རུང་ འབྲུག་ལུ་རྒྱབ་སྐྱོར་མེདཔ་མི་འོང་ཟེར་ཨིནམ་ད་ གན་ཡིག་ཟིན་བྲིས་དེ་ བདེ་སྒྲིག་འབད་ཐོག་ལས་ སྤྱི་ལོ་༢༠༢༣ ཟླ་༣ པའི་ཚེས་༩ ལུ་ བེང་ཀོག་ཐའེ་ལེནཌ་ལུ་ ང་གལ་མཚོ་ཁུག་སྣ་མང་ལས་སྡེ་ འཕྲུལ་རིག་དཔལ་འབྱོར་མཉམ་འལ་ཐབས་ག་(བིམསི་ཊེག་) བློན་པོ་ལྷན་རྒྱས་ཀྱི་ཞལ་འཛོམས་ཐེངས་༡༩ པ་འཚོགས་པའི་སྐབས་ལུ་ མཐའ་བཅད་འབད་མི་ལུ་བརྟེན་ དུས་ཅི་ སྤྱི་ཟླ་༤ པའི་ཚོས་༤ ལུ་ ཐའེ་ལེནཌ་ལུ་སྦེ་ (བིམསི་ཊེག་) གྲོས་འཛོམས་ཐེངས་༦ པ་ འཚོགས་པའི་སྐབས་ལུ་ མཚན་རྟགས་ཚུ་ བཀོད་ཡོདཔ་ཨིན་པའི་གནས་ཚུལ།

ཚེ་རིང་དབང་འདུས།