སྤུ་ན་གཙང་ཆུ་གློག་མེ་ལས་དང་པའི་ ཆུ་བཀག་ར་ཌེམ་དེ་ ཐབས་རིག་བསྐྱར་ཞིབ་ལུ་ རག་ལས་ནི།

༉ འབྲུག་རྒྱལ་ཁབ་ནང་ གློག་མེ་ལས་འགུལ་སྦོམ་ཤོས་ཅིག་དང་ མེ་ག་ཝཱཊ་༡,༢༠༠ འབད་མི་ སྤུ་ན་གཙང་ཆུ་གློག་མེ་ལས་འགུལ་དང་པའི་ མ་འོངས་པའི་གནས་སྟངས་དེ་ ཆུ་བཀག་ར་ཌེམ་ རྒྱུན་བརྟན་དབྱེ་ཞིབ་འབད་མི་ འཕྲུལ་རིག་བསྐྱར་ཞིབ་ཀྱི་ གྲུབ་འབྲས་ལུ་ རག་ལས་ནི་ཨིན་པས།

འཕྲལ་ཁམས་ཀྱི་ ཆུ་བཀག་ར་གི་ ཉེན་སྲུང་བསྐྱར་ཞིབ་དང་འཁྲིལ་ཏེ་ རྒྱ་གར་གྱི་ ཆུའི་ལྷན་ཚོགས་ལྟེ་བ་གིས་ སྤྱི་ཟླ་༦ པའི་ཚེས་༢ ལུ་ གཙང་ཆུ་གཡས་ཁ་ཐུག་གི་ རྒྱུན་བརྟན་སྙན་ཞུ་ཆ་ཚང་ཅིག་ འབྲུག་གཞུང་ལུ་ ཕུལ་ཡོདཔ་ཨིན་པས།

འབྲུག་པའི་མཁས་མཆོག་ཚུ་གིས་ སྙན་ཞུ་དེ་ བསྐྱར་ཞིབ་དང་ དབྱེ་དཔྱད་འབད་བའི་བསྒང་ཡོདཔ་བཞིན་དུ་ དེ་ནང་ འདས་པའི་ཐབས་རིག་མཉམ་འབྲེལ་ཚོགས་ཆུང་གི་ ཞལ་འཛོམས་ནང་ གྲོས་འདེབ་བཀོད་མི་ གནས་ཚད་དང་ རྒྱུན་བརྟན་ལག་ལེན་ཐབས་ལམ་༢ ཆ་ མཉམ་སྡེ་འབད་ཡོདཔ་ཨིན་པས།

གནད་དོན་དེ་ཡང་ འཕྲལ་ཁམས་ཅིག་ཁར་ གནས་ཚུལ་ཞལ་འཛོམས་ཅིག་ འཚོགས་པའི་སྐབས་ བཟོ་གྲྭ་ཚོང་འབྲེལ་དང་ལཱ་གཡོག་བློན་པོ་ རྣམ་རྒྱལ་རྡོ་རྗེ་གིས་ བཤདཔ་ཨིན་པས།

བློན་པོ་གིས་འབད་བ་ཅིན་ ཆུ་བཀག་ར་མ་གཏོགས་ ལས་འགུལ་གྱི་ ཤ་ཆས་སྦོམ་ གློག་མེ་བཅོས་ཆས་དང་ རྒྱུན་སྤེལ་བརྩིས་ཏེ་ ཧེ་ཌིརིས་ས་འོག་ལམ་དང་ གློག་མེ་ཁང་གི་ ལཱ་ཚུ་ མཇུག་བསྡུ་ནི་གུ་ ལྷོད་དེ་ཡོདཔ་ཨིན་པས།

སྤྱི་ལོ་༢༠༡༣ དང་༢༠༡༦ དེ་ལས་ སྤྱི་ལོ་༢༠༡༩ ལུ་ ས་རུད་ཆད་མི་དེ་གིས་ ཆུ་བཀག་རའི་ ས་ཁོངས་རྒྱུན་བརྟན་མེདཔ་བཟོ་ཡོདཔ་ད་ ཨ་ཅཱིལ་ལིསི་ ཨིལ་ལས་འགུལ་གིས་ ལས་འགུལ་རྐྱབ་ནི་ལས་ བཀག་ཆག་འབད་བའི་ཁར་ གདམ་ཁ་ཅན་གྱི་ བཟོ་བཀོད་ཐོག་ལུ་ འཕྲུལ་རིག་དང་ དོན་གཅོད་གསུང་གྲོས་ཚུ་ གནང་ཡོདཔ་ཨིན་པས།

ཆུ་བཀག་རའི་ གཡས་ཁ་ཐུག་ལས་ ས་རུད་ཚུ་ ཡང་བསྐྱར་དུ་ ཆད་འོང་མི་ལུ་བརྟེན་ འབྲུག་གིས་ ཆུ་བཀག་ར་གི་ཚབ་སྦེ་ གཙང་ཆུ་སྟོད་ ཀི་ལོ་མི་ཊར་༢.༦ དེ་ཅིག་ས་གནས་ཁར་ ཆུ་བསྒོར་རྐྱབ་ནི་གི་ འོས་འབབ་ཚུ་ཡང་ ལྟ་ཡོདཔ་ཨིན་པས།

སུ་ཡིཛ་བཟོ་རིག་ལས་སྡེ་ ཨིསི་ཊཱ་ཀེ་གིས་ ཟད་འགྲོ་དངུལ་ཀྲམ་ས་ཡ་༡༥༠ བཏང་ཐོག་ལས་ ལས་འགུལ་གྱི་ ཁ་གསལ་བརྟག་ཞིབ་སྙན་ཞུ་འབད་བའི་སྐབས་ ཆུ་བཀག་ར་གི་ཚབ་སྦེ་ ཆུ་བསྒོར་དེ་ འོས་འབབ་མཐོང་ཡོདཔ་ཨིན་པས།

ཨིན་རུང་ རྒྱ་གར་གྱི་ ལས་སྡེ་གིས་ ཉེན་སྲུང་གི་ ཚ་གྱང་ཡོད་ལུགས་ཚུ་ བཤད་ཐོག་ལས་ གནད་དོན་དེ་ལུ་ མོས་མཐུན་འབྱུང་མ་ཚུགསཔ་ཨིན་པས།

ན་ཧིང་ འབྲུག་དང་ རྒྱ་གར་གྱིས་ ཆུ་བཀག་ར་རྐྱབ་ནི་སྦེ་ གྲོས་འཆམ་བྱུང་ཡོདཔ་བཞིན་དུ་ ད་རེས་ གཙང་ཆུ་གཡས་ཁ་ཐུག་ལུ་ མཐར་འཁྱོལ་ཅན་སྦེ་ རྒྱུན་བརྟན་འབད་ཐབས་ལུ་ སྔོན་འགྲོའི་གནས་སྟངས་ཚུ་ དབྱེ་ཞིབ་འབད་བའི་བསྒང་ཡོདཔ་ཨིན་པས།

སྤྱི་ལོ་༢༠༡༤ གི་ ལོ་ཕྱེད་ཚུན་ ལས་འགུལ་དེ་ལུ་ ཟད་འགྲོ་དངུལ་ཐེར་འབུམ་༨༦ བཏང་ཡོདཔ་བཞིན་དུ་ ཟད་འགྲོ་དེ་ཡང་ སྔོན་རྩིས་ཟད་འགྲོ་ དངུལ་ཀྲམ་ཐེར་འབུམ་༣༥ ལས་ དངུལ་ཀྲམ་ཐེར་འབུམ་༡༠༠ ཡར་སེང་སོང་ཡོདཔ་ཨིན་པས།

ལས་འགུལ་དེ་ སྤྱི་ལོ་༢༠༠༨ ལུ་ རྒྱུ་འབྲུག་༢ ཟུང་ཕྱོགས་མོས་མཐུན་ཐོག་ལུ་ གཞི་བཙུགས་འབད་ཡོདཔ་བཞིན་དུ་ ལས་འགུལ་དེ་ ཆུ་བཀག་རའི་ས་ཁོངས་ནང་ ས་དང་འབྲེལ་བའི་ དཀའ་ངལ་ཐོན་མི་ལུ་བརྟེན་ དུས་ཚོད་དེ་ ལེ་ཤ་ཅིག་ཁར་ ཡུན་འགྱངས་ལུས་ཡོདཔ་ཨིན་པས།

བློན་པོ་རྣམ་རྒྱལ་རྡོ་རྗེ་གིས་ སླབ་མིའི་ནང་ སྤུ་ན་གཙང་ཆུ་གློག་མེ་ལས་འགུལ་དང་པ་ལས་ ཉམས་མྱོང་ལེ་ཤ་ཐོབ་མ་དང་བསྟུན་ དེ་གིས་ རྒྱལ་ཁབ་ཀྱི་ གློག་མེ་ལས་འགུལ་གཞན་ཚུ་གི་ ལམ་སྟོན་འབདཝ་ཨིན་མས་ཟེར་ཨིན་པས།

ཁོ་གིས་འབད་བ་ཅིན་ ས་ཁོངས་ག་ར་ མ་འདྲཝ་སྦེ་ཡོདཔ་ལས་ མཐར་འཁྱོལ་འབྱུང་ནིའི་དོན་ལུ་ དམིགས་བསལ་ས་ཁོངས་ཞིབ་དཔྱད་ དམ་དམ་འབད་དགོ་ཟེར་ཨིན་པས།

དེ་བཟུམ་མའི་ དཀའ་ངལ་མི་འབྱུང་ནིའི་དོན་ལས་ གཞུང་གིས་ ལས་འགུལ་ཁ་གསལ་བརྟག་ཞིབ་སྙན་ཞུ་ལུ་ གཙོ་རིམ་བཟུང་དོ་ཡོདཔ་བཞིན་དུ་ དེ་ཡང་ ལས་འགུལ་རེ་གི་ འཆར་གཞི་ཨམ་ཅིག་སྦེ་ ལག་ལེན་འཐབ་དགོཔ་ཟེར་ཨིན་པས།

དེ་ནང་ འོས་འབབ་དབྱེ་ཞིབ་དང་ རང་བཞིན་གནས་སྟངས་དང་མི་སྡེ་གནོད་པ་ བཟོ་རིག་བཟོ་བཀོད་ དེ་ལས་ དངུལ་འབྲེལ་ཐོབ་སྤྱོད་ཚུ་ བལྟ་དོ་ཟེར་ བློན་པོ་གིས་ བཤདཔ་ཨིན་པས།

ནུས་ཤུགས་དང་རང་བཞིན་ཐོན་སྐྱེད་བློན་པོ་ མགོནམ་ཚེ་རིང་གིས་ ཡིག་ཐོག་ལུ་ ལན་གསལ་འབད་མི་དང་འཁྲིལ་བ་ཅིན་ ཧེ་མ་བཟུམ་སྦེ་མེན་པར་ ལས་འགུལ་གྱི་ས་ཁོངས་དེ་ ལེགས་བཅོས་འབད་དེ་ཡོད་ཟེར་ཨིན་པས།

ཨིན་རུང་ ད་རེས་ གདོང་ལེན་གཙོ་བོ་ བརྩོན་ཤུགས་ཅན་གྱི་བྱ་རིམ་དང་ མཐའ་འཁོར་དང་ མི་སྡེ་ལུ་ ཕན་གནོད་ཀྱི་ དབྱེ་ཞིབ་ཚུ་ དུས་ཚོད་འགོར་མི་ལུ་བརྟེན་ཨིན་པས།

ལྷན་ཁག་དང་འཁྲིལ་བ་ཅིན་ གློག་མེ་ལས་འགུལ་གསརཔ་ཚུ་གི་དོན་ལུ་ འོས་འབབ་བརྟག་ཞིབ་ ལེ་ཤ་འགོ་འདྲེན་འཐབ་པའི་བསྒང་ཡོད་མི་ཚུ་ཡང་ འབྲུག་གི་གློག་མེ་གོང་འཕེལ་ལམ་སྟོན་དང་འཁྲིལ་ཏེ་ཨིན་པས།

ད་རེས་ནངས་པའི་ འཕྲུལ་རིག་དང་ ཉམས་མྱོང་ཅན་གྱི་མཁས་མཆོག་ཚུ་ ལག་ལེན་འཐབ་སྟེ་ མ་རྩ་གཞི་བཙུགས་འབད་མི་ གློག་མེ་ལས་འགུལ་ཚུ་ མཐར་འཁྱོལ་ཅན་སྦེ་ འགྱོ་དོ་ཡོད་ལུགས་ཚུ་ ལྷན་ཁག་གིས་བཀོད་ཡོད་པའི་གནས་ཚུལ།

ཨོ་རྒྱན་རྡོ་རྗེ།