༉ འབྲུག་གི་ གསོ་བའི་འཕྲོད་བསྟེན་ཕྱགས་སྙིགས་ཚུ་ བསྡུ་ལེན་འབད་ནིའི་ལྷན་ཐབས་ལུ་ ཇ་པཱན་གཞུང་དང་ འཛམ་གླིང་སྤྱི་ཚོགས་གོང་འཕེལ་ལས་རིམ་ ཨུ་ཨེན་ཌི་པི་གིས་ གསོ་བ་ལྷན་ཁག་ལུ་ དམིགས་བསལ་གསོ་བའི་ཕྱགས་སྙིགས་བསྡུ་ལེན་འབད་མི་ སྣུམ་འཁོར་ཊཱག་༥ གྲོགས་རམ་སྦེ་ བྱིན་ཡོདཔ་ཨིན་པས།
སྣུམ་འཁོར་ཚུ་ཡང་ ཐིམ་ཕུག་དང་ དགེ་ལེགས་ཕུག་ དབང་འདུས་ དེ་ལས་ མོང་སྒར་དང་ ཕུན་ཚོགས་གླིང་ལུ་ བགོ་བཀྲམ་འབད་ནི་ཨིན་མི་དེ་ཡང་ ཁྲོམ་སྡེ་ཚུ་ནང་ གསོ་བའི་ཕྱགས་སྙིགས་དང་འབྲེལ་བའི་ སྟབས་མ་བདེཝ་ཡོད་མི་ལུ་བརྟེན་ཨིན་པས།
སྣུམ་འཁོར་རྩིས་སྤྲོད་ལས་རིམ་སྐབས་ གསོ་བ་བློན་པོ་ རྟ་མགྲིན་དབང་ཕྱུག་དང་ རྒྱལ་ཡོངས་གསོ་བའི་ཞབས་ཏོག་ལས་ ཌོག་ཊར་མི་མི་ལྷ་མོ་ ཇ་པཱན་གཞུང་ཚབ་ལས་ ཡ་མ་ཤི་ཏ་ ཧི་རོ་ཡུ་ཀི་དང་ ཤཱུན་ ཧོ་ས་ཀ་ དེ་ལས་ ཨུ་ཨེན་ཌི་པི་གི་ གནས་བཤུགས་ངོ་ཚབ་ མོ་ཧན་མཌི་ ཡུ་ནསི་ཚུ་གིས་ གྲལ་གཏོགས་འབད་ཡོདཔ་ཨིན་པས།
ལས་རིམ་དེ་ འབུ་ཉེན་ཅན་གྱི་ ཕྱགས་སྙིགས་འཛིན་སྐྱོང་གོང་འཕེལ་གྱི་ལས་འགུལ་གྱི་ ཆ་ཤས་ཅིག་ཨིནམ་ད་ དེ་ཡང་ རྒྱལ་ཡོངས་གསོ་བའི་ཞབས་ཏོག་དང་ གསོ་བ་ལྷན་ཁག་ ཨུ་ཨེན་ཌི་པི་ དེ་ལས་ ཇ་པཱན་གཞུང་གིས་ མཉམ་འབྲེལ་འབད་དེ་ ཡོདཔ་ཨིན་པས།
ཡུ་ཨེསི་ཌོ་ལར་ས་ཡ་༢ ཀྱི་ རྒྱབ་སྐྱོར་ཐོག་ལས་ ད་རེས་ནངས་པ་ འབྲུག་དང་ ཇ་པཱན་ དེ་ལས་ ཨུ་ཨེན་ཌི་པི་གི་ མཉམ་འབྲེལ་འབད་བའི་ འཕྲལ་གྱི་ལས་འགུལ་ཅིག་ཨིནམ་བཞིན་དུ་ འབྲུག་གི་གསོ་བའི་ལམ་ལུགས་ཡར་དྲག་གཏང་ཐབས་ལུ་ཨིན་པས།
ཡ་མ་ཤི་ཏ་ ཧི་རོ་ཡུ་ཀི་གིས་ འབྲུག་གོང་འཕེལ་གཏང་ནི་ལུ་ ཁས་ལེན་སྐོར་ལས་ བཤད་ཡོདཔ་ད་ འབྲུག་འདི་ ན་ཧིང་ གོང་འཕེལ་མ་འགྱོ་མི་ལས་ གོང་འཕེལ་འགྱོ་བའི་ རྒྱལ་ཁབ་ཀྱི་ གནས་ཚད་ནང་ མཐར་འཁྱོལ་ཡོད་རུང་ ཇ་པཱན་གཞུང་གིས་ འཕྲོ་མཐུད་དེ་ར་ སྐྱིན་འགྲུལ་དང་ འཕྲུལ་རིག་རྒྱབ་སྐྱོར་ དེ་ལས་ གྲོགས་རམ་ཐོག་ལས་ དཔལ་འབྱོར་མཉམ་འབྲེལ་འབད་ནི་ལུ་ ཁས་ལེན་འབད་དེ་ ཡོད་ཟེར་ཨིན་པས།
ཁོ་གིས་འབད་བ་ཅིན་ ཇ་པཱན་གཞུང་དེ་ འབྲུག་གི་གོང་འཕེལ་མཉམ་འབྲེལ་བར་ གཙོ་ཅན་ཅིག་སྦེ་ སྡོད་ནི་ཨིནམ་ད་ འབྲུག་གཞུང་དང་ ཨུ་ཨེན་ཌི་པི་གིས རྒྱབ་སྐྱོར་གནང་མི་ལུ་ ངལ་རངས་ཡོདཔ་བཞིན་དུ་ མཉམ་འབྲེལ་འཕྲོ་མཐུད་དེ་ར་ འབད་ནི་ལུ་ མདུན་སྐྱོད་འབད་དེ་ ཡོད་ཟེར་ཨིན་པས།
གསོ་བའི་ཕྱགས་སྙིགས་ཚུ་ ལེགས་ཤོམ་སྦེ་ འཛིན་སྐྱོང་མ་འཐབ་པ་ཅིན་ མི་གི་འཕྲོད་བསྟེན་དང་ མཐའ་འཁོར་གནས་སྟངས་ལུ་ ཉེན་ཁ་སྦོམ་ཡོདཔ་ད་ སྤྱི་ལོ་༢༠༢༢ ཟླ་༩ པའི་ནང་ འབུ་ཉེན་ཅན་གྱི་གསོ་བའི་འཕྲོད་བསྟེན་འཛིན་སྐྱོང་གི་ ཉེན་སྲུང་ཡར་དྲག་དང་ འཇོན་ཐངས་ཅན་ཅིག་སྦེ་ ལག་ལེན་འཐབ་ནི་ལུ་ ལས་འགུལ་ཅིག་ཡང་ གསར་བཏོན་འབད་ཡོདཔ་ཨིན་པས།
ལས་འགུལ་ནང་ རྫོང་ཁག་༡༥ ནང་འཁོད་ལུ་ གསོ་བའི་ལྟེ་བ་༡༡༢ དང་ ཁྲོམ་སྡེ་༥ ནང་ ཕྱགས་སྙིགས་འཛིན་སྐྱོང་འཕྲུལ་རིག་༥ ལ་སོགས་པ་ཚུ་ བཙུགས་ཏེ་ཡོདཔ་ཨིན་པས།
ལས་འགུལ་ནང་ གསོ་བའི་ལྟེ་བ་༡༥ ནང་ ཕྱགས་སྙིགས་བཏོག་འཕྲུལ་དང་ ཁྲོམ་སྡེ་༤ ནང་ ཁྲིམས་འགལ་ཐོག་ལས་ ཕྱགས་སྙིགས་བཀོག་མི་ ལྟ་རྟོག་འབད་ནིའི་དོན་ལུ་ པར་ཆས་སི་སི་ཊི་བི་༩༩ བཙུགས་ཡོདཔ་ཨིན་པས།
གསོ་བའི་ལྟེ་བ་དང་ ཁྲོམ་སྡེ་ཚུ་ནང་ ནུབ་དང་ ལྷོ་ཕྱོགས་རྫོང་ཁག་༡༢ ཀྱི་ སྒེར་སྡེ་ཚུ་ལུ་ ཕྱགས་སྙིགས་བཏོག་འཕྲུལ་༣༠༠ བགོ་བཀྲམ་འབད་མི་ལས་འགུལ་ནང་ འབུ་ཉེན་ཅན་གྱི་ ཕྱགས་སྙིགས་འཛིན་སྐྱོང་དང་ ལག་ལེན་གྱི་ སྦྱོང་བརྡར་ཚུ་ བྱིན་ཡོདཔ་ཨིན་པས།
དེ་བཟུམ་སྦེ་ གསོ་བའི་ཕྱགས་སྙིགས་འཛིན་སྐྱོང་ནང་ ཕོ་མོའི་གདོན་ལེན་དང་འབྲེལ་བའི་ དཀའ་ངལ་ཚུ་ཡང་ སེལ་ཐབས་འབད་ཡོདཔ་ད་ དེ་ཡང་ སྨན་ཁང་སྦོམ་དང་ སྨན་ཁང་ཚུ་ནང་ ཕྱགས་སྙིགས་དང་འབྲེལ་བའི་ ལཱ་འབད་མི་བརྒྱ་ཆ་༥༦ ཨམ་སྲུ་ཡོད་མི་གི་ གནད་དོན་ཡང་ སེལ་ཐབས་འབད་ཡོདཔ་ཨིན་པས།
རྒྱལ་སྤྱི་མཉམ་འབྲེལ་ཐོག་ལས་ ལས་འགུལ་གྱིས་ འབྲུག་ལུ་ ཡུན་བརྟན་གསོ་བའི་ཕྱགས་སྙིགས་ལམ་ལུགས་ ལེགས་ཤོམ་བཟོ་ནི་ ཨིན་པའི་གནས་ཚུལ།
ཨོ་རྒྱན་རྡོ་རྗེ།