བཀྲིས་ཕུན་ཚོགས།
༉ དུས་ཅི་ སྤྱི་ཟླ་༦ ལས་འགོ་བཙུགས་ སྐྱིན་འགྲུལ་བཏབ་ནིའི་ དུས་ཡུན་ཕར་འགྱངས་མི་འབད་ནི་དང་ དངུལ་འབྲེལ་གཙུག་སྡེ་ཚུ་གིས་ སྐྱིན་འགྲུལ་ཕར་འགྱངས་འབད་མི་ཚུ་ བརྟག་ཞིབ་འབད་ནི་ཨིན་ཟེར་ དངུལ་རྩིས་བློན་པོ་ ལས་སྐྱིད་རྡོ་རྗེ་གིས་ བློན་པོའི་ལྷན་རྒྱས་དང་ བརྡ་བརྒྱུདཔ་ཚུ་གི་ ཞལ་འཛོམས་ཐེངས་༣ པ་ འཚོགས་པའི་སྐབས་ བཤད་ཡོདཔ་ཨིན་པས།
དངུལ་ཁང་ཚུ་གིས་ ཁོང་རའི་ཚོང་མགྲོན་པ་ཚུ་ ལེགས་ཤོམ་སྦེ་ ཧ་གོ་བའི་ཁར་ རྒྱལ་གཞུང་དངུལ་ལས་དབང་འཛིན་དང་ གཞུང་གིས་ ཐད་ཀར་དུ་ བར་འཛུལ་འབད་ནི་མེད་རུང་ དགོས་མཁོ་དང་འཁྲིལ་དོ་ཟེར་ བློན་པོ་གིས་ བཤད་ཡོདཔ་ཨིན་པས།
བློན་པོ་གིས་ སླབ་མིའི་ནང་ དངུལ་ཁང་དང་ ཚོང་མགྲོན་པའི་གནས་སྟངས་ཚུ་ བརྟག་དཔྱད་འབད་ནི་དང་ རྩིས་ཁྲ་ཚུ་ ག་དེ་སྦེ་འབད་ནི་ཨིན་ནའི་ གྲོས་ཐག་གཅད་འོང་ཟེར་ཨིན་པས།
སྐྱིན་འགྲུལ་བཏབ་ནིའི་ དུས་ཡུན་ཕར་འགྱངས་འབད་མི་དེ་ དངུལ་འབྲེལ་ཐབས་ཤེས་གོ་རིམ་༤ པ་དང་འཁྲིལཝ་ད་ དུས་ཅི་ སྤྱི་ཟླ་༦ པའི་ཚེས་༣༠ ལུ་ མཇུག་བསྡུཝ་ཨིན་ཟེར་ཨིན་པས།
ནད་ཡམས་ཀོ་བིཌ་༡༩ གིས་ ཚོང་རྐྱབ་མི་ཚུ་ལུ་ ཐོ་ཕོག་མི་ལུ་བརྟེན་ སྤྱི་ལོ་༢༠༢༠ གི་ཟླཝ་༤ པ་ལས་འགོ་བཙུགས་ ལོ་༤ འི་རིང་ སྐྱིན་འགྲུལ་བཏབ་ནིའི་དུས་ཡུན་ ཕར་འགྱངས་འབད་ཡོདཔ་ཨིན་པས།
དངུལ་འབྲེལ་གཙུག་སྡེ་གིས་ ཁྱབ་བསྒྲགས་འབད་མིའི་ནང་ དུས་ཡུན་འཕར་འགྱངས་འབད་མི་ ཚོང་པ་ཚུ་གིས་ དངུལ་ཁང་གི་འཛིན་སྐྱོང་པ་ཚུ་དང་ འཕྱད་ཞིནམ་ལས་ དུས་ཅི་ སྤྱི་ཟླ་༦ པ་ལས་ ག་དེ་སྦེ་ སྐྱིན་ཚབ་བཏབ་ནི་ཨིན་ནའི་སྐོར་ལས་ ཐབས་ཤེས་བཏོན་དགོཔ་སྦེ་ཨིན་པས།
སྒེར་སྡེ་ལས་སྡེའི་ངོ་ཚབ་ འབྲུག་ཚོང་དང་བཟོ་གྲྭ་ཚོགས་སྡེ་གིས་ གཞུང་ལུ་ གྲོས་འཆར་བཀོད་མིའི་ནང་ ད་རུང་ གཞུང་གིས་ སྐྱིན་ཚབ་བཏབ་ནི་དེ་ ལོ་༢ དང་༣ གྱི་རིང་ ཕར་བཤུད་རྐྱབ་གནང་ནི་དང་ དུས་ཡུན་ཕར་བཤུད་རྐྱབ་དགོ་མ་མནོ་མི་ཚུ་ལུ་ སྤྲོ་འཐུས་གནང་དགོཔ་སྦེ་ཨིན་པས།
འབྲུག་དངུལ་འབྲེལ་གཙུག་སྡེ་ཚོགས་སྡེ་གིས་ དངུལ་འབྲེལ་ལས་སྡེ་ག་ར་ གཅིག་སྒྲིལ་གནས་ཚད་བརྟག་དཔྱད་ཚད་གཞི་དང་བསྟུན་ ལཱ་འབད་ཐབས་ལུ་ ལཱ་འབད་དོ་ཟེར་ བློན་པོ་གིས་ སླབ་ཨིན་པས།
དངུལ་འབྲེལ་གཙུག་སྡེ་ཁོང་ར་གིས་ དུས་ཡུན་ཕར་འགྱངས་འབད་མི་ཚུ་ བརྟག་ཞིབ་འབད་ཐབས་ཀྱི་ཚད་གཞི་ཚུ་ བཟོ་དགོ་ཟེར་ཨིནམ་ད་ དེ་ཡང་ དུས་ཡུན་ཕར་འགྱངས་འབད་མི་ རེ་རེ་བཞིན་དུ་ ལྟ་རྟོག་འབད་ནི་དང་ ཁ་གསལ་བྱ་སྒོའི་ལས་དོན་ དེ་ལས་ གཞུང་ལུ་ ཉེན་ཁ་དང་ ལཱ་འགན་སྡེ་ཁོངས་ཞིབ་འཚོལ་འབད་ནི་ཚུ་ཨིན་པས།
བློན་པོ་གིས་ སླབ་མི་དང་འཁྲིལཝ་ད་ དངུལ་ཁང་ཚུ་གིས་ སྐྱིན་འགྲུལ་བཏབ་ནིའི་ གཞི་བསྒྱུར་འབད་ནི་དང་ ལོག་སྟེ་ར་ ལས་འཆར་བཟོ་ནི་ འཕྲོ་རིམ་སྤྲོད་ཐབས་ཀྱི་མཐུན་རྐྱེན་བརྟན་ཏོག་ཏོ་དགོཔ་ དེ་ལས་ རིག་གསར་དངུལ་འབྲེལ་ཞབས་ཏོག་ཚུ་དགོ་ཟེར་ཨིན་རུང་ ད་ལྟོ་ཚུན་ སྐྱེད་ཡར་སེང་འབད་མི་དེ་ མ་རྩ་ལུ་ མི་བསྒྱུར་ཟེར་ཨིན་པས།
དངུལ་ཁང་ལྟེ་བ་དང་ གཞུང་གི་དམིགས་ཡུལ་དེ་ར་ མི་ག་ར་ ཉེན་སྲུང་སྦེ་བཞག་ནི་དང་ རྒྱལ་ཁབ་ཀྱི་དཔལ་འབྱོར་ལུ་ ཐོ་མ་ཕོགཔ་ ཡང་ཅིན་ དངུལ་དང་འབྲེལ་བའི་དཀའ་ངལ་ཚུ་ འཐོན་མ་བཅུག་པར་བཞག་ནི་དེ་ཨིན་ཟེར་ བློན་པོ་གིས་ བཤདཔ་ཨིན་པས།
སྐྱིན་ཚབ་ཕར་འགྱངས་འབད་མི་དེ་ གནས་སྐབས་ཅིག་གི་དོན་ལུ་ཨིན་རུང་ རྒྱལ་སྤྱི་མ་དངུལ་གྱི་ གྲོགས་རམ་བྱིན་མི་དང་ འཛམ་གླིང་དངུལ་ཁང་ ཨེ་ཤི་ཡཱན་གོང་འཕེལ་མ་དངུལ་ དེ་ལས་ ནང་འཁོད་དཔལ་འབྱོར་མཁས་མཆོག་ཚུ་གིས་ སྐྱིན་འགྲུལ་ཕར་འགྱངས་འབད་མི་ཚུ་ལུ་ རྒྱབ་འགལ་འབདཝ་མས་ཟེར་ བློན་པོ་གིས་ བཤདཔ་ཨིན་པས།
ནད་ཡམས་ཀོ་བིཌ་༡༩ དེ་གིས་ རྒྱལ་ཁབ་ཀྱི་དཔལ་འབྱོར་ལུ་ འབྱེམ་ཕོག་པའི་ཁར་ སྐྱིན་ཚབ་ཕར་འགྱངས་འབད་ཞིནམ་ལས་ ཚོང་པ་དང་ མི་སེར་ཚུ་གིས་ ག་དེ་སྦེ་ ལོག་བཏབ་ཚུགས་ག་ཟེར་བའི་ཚ་གྱང་དེ་ གཞུང་གིས་ བཞེས་དེ་ཡོད་ཟེར་ བློན་པོ་གིས་ སླབ་ཡོདཔ་མ་ཚད་ དངུལ་རྩིས་ལྷན་ཁག་གིས་ དངུལ་ཁང་ལྟེ་བ་དང་ བློན་ཆེན་དང་གཅིག་ཁར་ མཉམ་འབྲེལ་སྦེ་ལཱ་འབད་བའི་ཁར་ ལམ་སྟོན་དང་འཁྲིལ་དོ་ཟེར་ཨིན་པས།
དཔལ་འབྱོར་ཆེ་རིམ་འགོ་འདྲེན་དང་ འཕྲུལ་རིག་ཚོགས་ཆུང་གིས་ རྒྱལ་གཞུང་དངུལ་ལས་དབང་འཛིན་གྱི་མཁས་པ་དང་ ལྷན་ཁག་གིས་ སྐྱིན་ཚབ་ཕར་འགྱངས་འབད་བའི་སྐོར་ ཞིབ་འཚོལ་འབད་ཡོདཔ་ཨིན་པས།
ཞིབ་འཚོལ་འབད་མི་ལས་ དཀའ་ངལ་གྱི་གནད་དོན་༢ འཐོན་སྲིད་ནི་ཨིན་མི་ཡང་ དང་པ་ དངུལ་ལག་ལེན་ངོ་མ་འཐབ་ནི་ལུ་ ཐོ་ཕོག་ནི་དང་ དེ་གིས་སྦེ་ ག་ར་ཚངམ་སྦེ་སྤྲོད་ནི་ལུ་ ཉེན་ཁ་དང་ སྐྱེད་འདིའི་འཕྲོ་མཐུད་དེ་ར་ ཡར་སེང་འགྱོ་ནི་ཨིནམ་ལས་ དེ་གིས་སྦེ་ སྐྱིན་ཚབ་ཕར་འགྱངས་འབད་བའི་དུས་ཚོད་ནང་ཡང་ ད་རུང་ བཏབ་བ་ཚུགས་པའི་དཀའ་ངལ་ཚུ་ འཐོན་སྲིད་པའི་ཤུལ་ སྐྱིན་ཚབ་བཏབ་མ་ཚུགས་པའི་གྲངས་སུ་ བརྩི་འཇོག་གི་གནས་སྟངས་ནང་ ལྷོད་ནི་ཚུ་ ངོས་འཛིན་འབད་དེ་ཡོདཔ་ཨིན་པས།
ཚོགས་ཆུང་གིས་ ཞིབ་རྟོགས་དང་འཁྲིལཝ་ད་ རྩིས་ལོ་ཆེ་རིམ་འགོ་འདྲེན་ཚོགས་ཆུང་གིས་ ཤེས་རྟོགས་བྱུང་མི་དང་འཁྲིལ་བ་ཅིན་ དུས་ཅི་ སྤྱི་ཟླ་༦ པའི་ཤུལ་ལས་ སྐྱིན་ཚབ་ཕར་འགྱངས་འབད་དགོཔ་མེད་རུང་ ལས་སྡེ་ལ་ལོ་ཅིག་ལུ་ དུས་ཅི་ སྤྱི་ཟླ་༡༢ པ་ཚུན་ སྐྱིན་ཚབ་བཏབ་ནིའི་དུས་ཚོད་ ཕར་འཕུལ་རྐྱབ་དགོཔ་བཟུམ་ཅིག་འདུག་ཟེར་ཨིན་པས།
གལ་སྲིད་ སྤྱི་ལོ་༢༠༢༤ ལས་བརྒལ་ སྐྱིན་ཚབ་བཏབ་ནིའི་དུས་ཡུན་ ཕར་འགྱངས་འབད་བ་ཅིན་ རྒྱལ་ཁབ་ཀྱི་དཔལ་འབྱོར་ལུ་ ཐོ་ཕོག་ནི་མས་ཟེར་ བློན་པོ་གིས་ སླབ་ཨིན་པས།
མི་༡༤༩ ལས་ རྩིས་ཁྲ་འཆང་མི་༦༥ ལུ་ སྐྱིན་འགྲུལ་ཡོངས་བསྡོམས་དངུལ་ཀྲམ་ཐེར་འབུམ་༢༡༥.༨༨ དེ་ དངུལ་འབྲེལ་གཙུག་སྡེ་ཚུ་དང་ཡོདཔ་ད་ རྩིས་ཁྲ་འཆང་མི་༩༤༡ ལུ་ དུས་ཅི་ སྤྱི་ཟླ་༦ པ་ཚུན་ སྐྱིན་འགྲུལ་དངུལ་ཀྲམ་ཐེར་འབུམ་༥༦.༥ ཕར་འགྱངས་འབད་བཞག་ནུག་ཟེར་ཨིན་པས།
དེ་ལུ་རྩིས་རྐྱབ་པ་ཅིན་ སྐྱིན་འགྲུལ་རྩིས་ཁྲ་འཆང་མི་དེ་ བརྒྱ་ཆ་༨.༧༥ ཡོདཔ་བཞིན་དུ་ བརྒྱ་ཆ་༢༦.༢ དེ་ཅིག་ སྐྱིན་འགྲུལ་ཕར་འགྱངས་འབད་ཡོདཔ་ཨིན་པས།
དཔལ་འབྱོར་ལྷན་ཐབས་ལས་རིམ།
བློན་པོ་ལས་སྐྱིད་རྡོ་རྗེ་གིས་ སླབ་མིའི་ནང་ ལྷན་རྒྱས་གཞུང་ཚོགས་ལས་ ཡན་ལག་ཚོགས་ཆུང་ གཞི་བཙུགས་འབད་མི་དེ་ དཔལ་འབྱོར་ལྷན་ཐབས་ལས་རིམ་ གཞི་བཙུགས་ཀྱི་དོན་ལུ་ མ་རྩ་བཙུགས་སའི་ས་གོ་ཚུ་ བརྟག་ཞིབ་འབད་ཐབས་སྦེ་ཨིན་རུང་ ད་ལྟོ་ཚུན་ མ་རྩ་ག་ཏེ་ལུ་ གཞི་བཙུགས་འབད་ནི་ཨིན་ན་ གཏན་འཁེལ་མ་འབད་ཟེར་ཨིན་པས།
དཔལ་འབྱོར་ལྷན་ཐབས་ལས་རིམ་ལུ་ རྒྱ་གར་གཞུང་གིས་ འབྲུག་ལུ་ རྒྱབ་སྐྱོར་མ་དངུལ་ཐེར་འབུམ་༡༥ བྱིན་ནི་ཨིན་པས།
བློན་པོ་གིས་ སླབ་མིའི་ནང་ གཞུང་གིས་ དམིགས་གཏད་དེ་ ལས་སྡེའི་ཐོན་སྐྱེད་རྒྱ་སྐྱེད་འབད་ནི་དང་ ནང་འདྲེན་མར་ཕབ་འབད་ནི་ དེ་ལས་ རྒྱལ་ཁབ་ཀྱི་ཚོང་འབྲེལ་དང་ ད་ལྟོ་ཡོད་མི་རྩིས་ཁྲ་ལྷག་ལུས་ཚུ་ ཡར་དྲགས་གཏང་ནི་དེ་ཨིན་ཟེར་ཨིན་པས།
ང་བཅས་ཀྱིས་ ལས་སྣ་ལེ་ཤ་ཡོད་པའི་གྲས་ལས་ སོ་ནམ་དང་ སྒོ་ནོར་ ལྟ་བཤལ་ བཟོ་གྲྭ་འཕྲུལ་ཁང་ཆུང་བ་ཚུ་ ཡར་དྲག་གཏང་ནི་ཟེར་ ཨིན་པའི་གནས་ཚུལ།