༉ འབྲུག་དང་ སའུ་དི་ ཨ་ར་བི་ཡ་གིས་ མཐུན་ལམ་དང་ གོང་འཕེལ་གྱི་དོན་ལུ་ གཅིག་གིས་གཅིག་ལུ་ གུས་ཞབས་དང་ བརྩི་མཐོང་བསྐྱེད་དེ་ རང་སོའི་རྒྱལ་ཁབ་དང་ མི་སེར་ཚུ་ལུ་ ཕན་ཐོགས་འབྱུང་ནིའི་དོན་ལས་ གཞུང་འབྲེལ་དུ་ སྤྱི་ལོ་༢༠༢༤ ཟླ་༩ པའི་ཚེས་༡༨ ལས་ དོན་གཅོད་མཐུན་ལམ་ཚུ་ གཞི་བཙུགས་འབད་ཡོདཔ་ཨིན་པས།
ཁ་ཙ་ ནིའུ་ཡོག་ལུ་ཡོད་པའི་ སའུ་དི་ཨ་ར་བི་ཡ་གི་ གཏན་འཇགས་ལས་ཁང་ནང་སྦེ་ འཛམ་གླིང་སྤྱི་ཚོགས་ནང་ འབྲུག་གི་གཏན་འཇགས་སྐུ་ཚབ་ པདྨ་ལེགས་གྲུབ་རྡོ་རྗེ་དང་ འཛམ་གླིང་སྤྱི་ཚོགས་ནང་ སའུ་དི་ ཨ་ར་བི་ཡ་གི་ གཏན་འཇགས་གཞུང་ཚབ་ ཨབ་ཌུ་ལ་ཛིསི་ ཨཱལ་ཝ་སིལ་༢ ཀྱི་བར་ན་ དོན་གཅོད་མཐུན་ལམ་གཞི་བཙུགས་ཀྱི་ ཆིངས་ཡིག་གུ་ མཚན་རྟགས་བཀོད་ཡོདཔ་ཨིན་པས།
ཆིངས་ཡིག་གུ་ མཚན་རྟགས་བཀོད་པའི་སྐབས་ གཞུང་ཚབ་གཉིས་ཀྱིས་ རྒྱལ་ཁབ་གཉིས་ཀྱི་བར་ན་ མཉམ་འབྲེལ་སྒྲིང་སྒྲི་བཟོ་ནི་གི་ ཁས་བླངས་འབད་ཡོད་པའི་སྐོར་ལས་ བཤད་ཡོདཔ་ད་ ཁོང་༢ ཀྱིས་ མཉམ་འབྲེལ་གནད་དོན་གྱི་ ས་ཁོངས་ཚུ་ནང་ ཧེང་སྐལ་ར་ དབྱེ་ཞིབ་དང་ རྒྱ་སྐྱེད་འབད་ནི་གི་ དང་འདོད་ཡོད་ལུགས་ཚུ་ གསལ་བཤད་འབད་ཡོད་པའི་གནས་ཚུལ།
བཙན་སྐྱོགས་དབང་འདུས།