༉ སོ་ནམ་མི་སྡེའི་ འཚོ་བའི་གནས་སྟངས་ལུ་ ལྷན་ཐབས་འབད་ནིའི་དོན་ལས་ གཙང་སྦྲ་འཕྲོད་བསྟེན་ལས་འགོ་བཙུགས་ཏེ་ སོ་ནམ་ལག་ལེན་ཡར་དྲག་གཏང་ནི་ལུ་ རོ་ཊ་རི་ཀ་ལབ་ཐིམ་ཕུག་(ཨར་སི་ཊི་)ལུ་ ཕན་ནུས་ཅན་གྱི་ ལས་འགུལ་ལེ་ཤ་ཡོདཔ་ཨིན་པས།
གནད་དོན་དེའི་སྐོར་ལས་ ཉིན་གྲངས་༣ གྱི་རིང་ རྒྱལ་སྤྱི་རོ་ཊ་རི་ཀ་ལབ་ཀྱི་ ཞལ་འཛོམས་འཚོགས་པའི་སྐབས་ མངོན་གསལ་བྱུང་ཡོདཔ་ད་ ལས་རིམ་ནང་ ཨཱསི་ཊེ་ལི་ཡ་དང་ བེལ་ཇེ་ཡམ་ ཡུ་ཀེ་ ནེ་པཱལ་ དེ་ལས་ འབྲུག་ལས་ མི་ངོམ་༤༥ གིས་ བཅའ་མར་གཏོགས་ཡོདཔ་ཨིན་པས།
ལས་རིམ་ནང་ ཨར་སི་ཊི་ལས་འགུལ་གྱི་ གྲུབ་འབྲས་དང་ མ་འོངས་འཆར་གཞི་སྐོར་ལས་ གྲོས་བསྟུན་འབད་ཡོདཔ་ཨིན་པས།
ཞལ་འཛོམས་ནང་ གསོ་བ་དང་ འཐུང་ཆུ་ གཙང་སྦྲ་འཕྲོད་བསྟེན་(ཝཤི) ཤེས་རིག་ ཕྱགས་སྙིགས་འཛིན་སྐྱོང་ དེ་ལས་ གནམ་གཤིས་ཨིསི་མརཊི་སོ་ནམ་ཚུ་ གྲོས་བསྟུན་གྱི་ གནད་དོན་གཙོ་ཅན་ཅིག་ཨིན་པས།
ཨར་སི་ཊི་གི་གཙོ་འཛིན་ ཚེ་དབང་རིག་འཛིན་གྱིས་ སླབ་མིའི་ནང་ རྒྱལ་སྤྱི་རོ་ཊ་རི་ཀ་ལབ་ཀྱི་ འཐུས་མི་ཅིག་འབདཝ་ལས་ འབྲུག་གིས་ འཛམ་གླིང་ནང་ ཀ་ལམ་སྦོམ་དང་ འཛམ་གླིང་གྲོགས་རམ་ལས་ མ་དངུལ་གྱི་ རྒྱབ་སྐྱོར་ཚུ་ ཐོབ་ཅི་ཟེར་ཨིན་པས།
ཁོ་གིས་འབད་བ་ཅིན་ ཕན་ནུས་ཅན་གྱི་འབྲེལ་འཛིན་དེ་ སློབ་གྲྭ་ཚུ་ནང་ ཆུའི་ཧའི་ཌི་བཙུགས་ནི་དང་ གསོ་བ་ལྷན་ཁག་དང་ གྲོས་བསྟུན་འབད་ཐོག་ལས་ ད་ལྟོ་ཚུན་ཚོད་ སློབ་གྲྭ་༡༣༦ ལུ་ ཆུ་བཙག་འཕྲུལ་ཆས་ བཀྲམ་སྤེལ་འབད་ཡོདཔ་བཞིན་དུ་ ཀ་ལབ་ཀྱིས་ དགོས་མཁོ་དང་འཁྲིལ་ཏེ་ ད་རུང་ བཀྲམ་སྤེལ་འབད་ནི་ འཆར་གཞི་ཡོད་ཟེར་ཨིན་པས།
འབྲུག་གསང་སྤྱོད་ཚོགས་སྡེའི་ བཀོད་ཁྱབ་མདོ་ཆེན་ ཆབ་སློབ་པ་སངས་ཚེ་རིང་གིས་ སླབ་མིའི་ནང་ ཨར་སི་ཊི་གིས་ འབྲུག་གསང་སྤྱོད་ཚོགས་སྡེ་ལུ་ དབང་པོ་སྐྱོན་ཅན་དང་ རྒན་ཤོས་ཚུ་གི་དོན་ལས་ གསང་སྤྱོད་ཆབ་ཏོ་དེ་ བཟོ་བཀོད་འབད་བཅུག་ཅི་ཟེར་ཨིནམ་བཞིན་དུ་ སྤྱི་ལོ་༢༠༡༩ ལུ་ གསོ་བ་ལྷན་ཁག་གིས་ འགོ་འབྱེད་འབད་ཡོདཔ་ཨིན་པས།
ཁོ་གིས་འབད་བ་ཅིན་ ཨར་སི་ཊི་གི་ རྒྱབ་སྐྱོར་འབད་བའི་ ལས་འགུལ་གྱི་ ཆ་ཤས་ཅིག་སྦེ་ ཁྲིམས་སྲུང་འགག་པའི་ བཙོན་ཁང་ལྟེ་བ་༣༨ ལུ་ ཆབ་ཏོ་༣༨ བཀྲམ་སྤེལ་འབད་ཡོདཔ་ད་ ཕན་ནུས་ཅན་གྱི་ ལག་ལེན་རྒྱབ་སྐྱོར་དང་ ཁ་སྐོང་ཆབ་ཏོ་གི་ལཱ་ཚུ་ འབད་བའི་བསྒང་ཡོདཔ་ཨིན་པས།
འབྲུག་གསང་སྤྱོད་ཚོགས་སྡེ་གིས་ ཆབ་ཏོ་ཉོ་ཚུགས་མི་ཚུ་ལུ་ ཏི་རུ་ཚུ་ལེན་དོ་ཡོད་རུང་ ཆབ་ཏོ་ཉོ་ མ་ཚུགས་མི་ཚུ་གི་དོ་ནལས་ མི་མང་ལས་ཏི་རུ་ བསྡུ་ལེན་འབད་ཐོག་ལས་ ཉོ་བྱིན་དོ་ཡོདཔ་ཨིན་པས།
ཨ་ཐང་དེ་ དབང་འདུས་ཕོ་བྲང་གི་ མཐའ་ཟུར་ཅིག་ཨིནམ་བཞིན་དུ་ ཨར་སི་ཊི་ལས་ རྒྱབ་སྐྱོར་ཐོབ་མི་ རྒེད་འོག་ཅིག་ཨིནམ་ད་ད ཨ་ཐང་རྒཔོ་ ཟླ་བ་རྒྱལ་མཚན་གྱིས་ སླབ་མིའི་ནང་ ཨར་སི་ཊི་གིས་ ལྕགས་སྐུད་ར་བ་དང་ འཕྲུལ་གླང་པ་ཝར་ཊི་ལར་ དེ་ལས་ སྔོ་ཚལ་ཆུ་ཤོག་ཁྱིམ་ཚུ་ བཀྲམ་སྤེལ་འབད་དེ་ སོ་ནམ་ལས་སྡེ་གོང་འཕེལ་གཏང་ནི་ལུ་ རྒྱབ་སྐྱོར་ཐོབ་སྟེ་ ཡོད་ཟེར་ཨིན་པས།
རྒཔོ་གིས་ བཀོད་མིའི་ནང་ ཧེ་མ་འབད་བ་ཅིན་ རི་དྭགས་སེམས་ཅན་ཚུ་གིས་ ལོ་ཐོག་གནོདཔ་བཀོལ་མི་ལུ་བརྟེན་ ས་གནས་ཀྱི་ མི་སེར་ཚུ་གིས་ ལོ་༡ ནང་ ལྕང་ལཱ་ཚར་གཅིག་ལས་བརྒལ་ མ་འབད་བར་ ས་ཆ་སྟོངམ་སྦེ་ བཞག་ནི་ཡོད་ཟེར་ཨིན་པས།
ཨིན་རུང་ ད་རེས་ ས་ཞིང་ཚུ་ ལྕགས་སྐུད་ར་བའི་ མཐུན་རྐྱེན་ཐོབ་མི་ལུ་བརྟེན་ སོ་ནམ་པ་ཚུ་གིས་ དུས་ཚོད་མ་འདྲཝ་ཚུ་ནང་ འབྲུ་སྣ་དགུའི་རིགས་ཚུ་ བཙུགས་ཞིནམ་ལས་ འོང་འབབ་ལུ་ ལྷན་ཐབས་བྱུང་སྟེ་ ཡོད་ཟེར་ཨིན་པས།
ཨ་ཐང་གི་ སོ་ནམ་པ་༣ ལུ་ ལྕགས་སྐུད་ར་བའི་ རྒྱབ་སྐྱོར་ཐོབ་སྟེ་ཡོདཔ་ད་ ཀེ་ལོ་མི་ཊར་༡ འབད་མི་ ལྕགས་སྐུད་ར་བ་དེ་ སོ་ནམ་གྱི་ཞིང་ ཨེ་ཀར་༢༨༠ དེ་ཅིག་ ཁྱབ་སྟེ་ཡོདཔ་ཨིན་པས།
དེ་བཟུམ་སྦེ་ གཡུས་ཁའི་མི་ཚུ་གིས་ སྔོ་ཚལ་ཆུ་ཤོག་ཁྱིམ་དང་ པ་ཝར་ཊི་ལར་ཆུང་ཀུ་ཚུ་ ཐོབ་སྟེ་ཡོདཔ་ད་ གལ་སྲིད་ རྒེད་འོག་གིས་ དེ་བཟུམ་མའི་ རྒྱབ་སྐྱོར་ཐོབ་པ་ཅིན་ སོ་ནམ་པ་ཚུ་གིས་ ཁོང་རའི་ཐོན་སྐྱེད་ཚུ་ ལྷན་ཐབས་འབད་ཚུགས་ནི་མས་ཟེར་ རྒཔོ་གིས་ བཤདཔ་ཨིན་པས།
ཆུ་ཁ་རྫོང་ཁག་གི་ དཔལ་འབྱོར་གོང་འཕེལ་དང་ཚོང་བསྒྲགས་འགོ་དཔོན་ སངས་རྒྱས་འཕྲིན་ལས་ཀྱིས་ སླབ་མིའི་ནང་ ཨར་སི་ཊི་ལས་ བོང་སྒོར་གཡུས་ཚན་ནང་ གསང་སྤྱོད་ལེགས་ཤོམ་ བཟོ་སྐྲུན་འབད་ནི་གི་ རྒྱབ་སྐྱོར་ཚུ་ ཐོབ་ཅི་ཟེར་ཨིན་པས།
ཁོ་གིས་འབད་བ་ཅིན་ སྦོང་སྒོ་དེ་ ཆུ་ཁ་རྫོང་ཁག་ནང་ གསང་སྤྱོད་བརྒྱ་ཆ་༡༠༠ གྲུབ་ཚུགས་པའི་ གཡུས་ཚན་དང་པ་ཅིག་ཨིན་ཟེར་ཨིན་པས།
དེ་བཟུམ་སྦེ་ གཙང་སྦྲ་འཕྲོད་བསྟེན་ཡར་དྲག་སོང་སྟེ་ གཡུས་སྒོ་ནང་ རྒན་ཤོས་དང་ ཨ་ལོ་ཚུ་ལུ་ ཆུ་དང་འབྲེལ་བའི་ ནད་གཞི་བཤལ་ནད་དང་ ཁྲག་བཤལ་ཚུ་ མར་ཕབ་འབད་ཚུགས་ཏེ་ཡོད་ཟེར་ སངས་རྒྱས་འཕྲིན་ལས་ཀྱིས་ བཤདཔ་ཨིན་པས།
སྤྱི་ལོ་༢༠༡༧ ལུ་ གསང་སྤྱོད་ཀྱི་དཔེ་ཅིག་ རྐྱབ་པའི་ཤུལ་ལས་ གཡུས་སྒོ་ནང་ གསང་སྤྱོད་༣༥ རྐྱབ་ཡོདཔ་མ་ཚད་ ཨར་སི་ཊི་ལས་ རྒྱབ་སྐྱོར་ཐོག་ལས་ སྤྱི་ལོ་༢༠༡༨ ཟླ་༩ པའི་ནང་ སོ་ནམ་ལས་འགུལ་དེ་ འགོ་བཙུགས་མི་གིས་ སོ་ནམ་པ་ཚུ་ལུ་ སོ་ནམ་ཐོན་སྐྱེད་ལུ་ ལྷན་ཐབས་འབད་ཡོདཔ་ཨིན་པས།
སངས་རྒྱས་འཕྲིན་ལས་ཀྱིས་ ད་རེས་ སོ་ནམ་པ་ཚུ་གིས་ ལོ་བསྟར་ སྤྱིར་སྙོམས་ནང་ འོང་འབབ་དངུལ་ཀྲམ་༥,༧༤,༠༥༠ དེ་རེ་ བཟོ་ཚུགས་ཏེ་ཡོད་ཟེར་ཨིན་པས།
གཙང་སྦྲ་ལྡན་པའི་ འཐུས་ཆུ་ལེགས་བཅོས་འབད་ནི་ལུ་ སྦོང་སྒོ་སློབ་གྲྭ་ཆུང་བའི་ནང་ ཨིསི་ཀའི་ཧའི་ཌི་ཆུ་བཙག་འཕྲུལ་ཆས་ གཞི་བཙུགས་འབད་མི་གིས་ སློབ་ཕྲུག་༡༢༠ ལུ་ ཕན་ཐོགས་བྱུང་སྟེ་ ཡོདཔ་ཨིན་པས།
སངས་རྒྱས་འཕྲིན་ལས་ཀྱིས་ སླབ་མིའི་ནང་ སྐྱེ་ལྡན་ལྟ་བཤལ་དང་ སོ་ནམ་ལྟ་བཤལ་གྱི་ ལཱ་འབད་ནིའི་དོན་ལུ་ རྫོག་ཁག་གིས་ བཞེས་སྒོ་འགྲེམ་སྟོན་ལས་རིམ་ཅིག་ འགོ་བཙུགས་ཡོདཔ་བཞིན་དུ་ མི་སྡེ་ཚུ་ འཚོ་བའི་གནས་སྟངས་ཡར་དྲད་གཏང་ནི་ལུ་ ལྷན་ཐབས་འབྱུང་ཚུགས་ཟེར་ཨིན་པས།
ཨར་སི་ཊི་གིས་ རྒྱལ་ཁབ་ནང་ མཐའ་འཁོར་དང་ སོ་ནམ་ གསོ་བ་ དེ་ལས་ ཤེས་རིག་དང་འབྲེལ་བའི་ ལས་འགུལ་ཚུ་ འགོ་འདྲེན་འཐབ་ཡོདཔ་ཨིན་པས།
ཨར་སི་ཊི་དེ་ གཞུང་གི་གྲོགས་འོག་ལུ་ སྤྱི་ལོ་༢༠༡༢ ཟླ་༤ པའི་ཚེས་༢༤ ལུ་ གཞི་བཙུགས་འབད་ཡོདཔ་ད་ འཛམ་གླིང་ནང་ རྒྱལ་སྤྱི་རོ་ཊ་རི་ལུ་ འཐུས་མི་ས་ཡ་༡.༥ དང་ རྒྱལ་ཁབ་༢༢༠ ལུ་ ཀ་ལབ་༤,༠༠༠ ཡོད་པའི་གནས་ཚུལ།
ཨོ་རྒྱན་རྡོ་རྗེ།