༉ དམ་ཆུ་དང་ ཆུ་ཁ་བར་ནའི་གཞུང་ལམ་ཁར་ ཆརཔ་ཤུགས་སྦེ་རྐྱབ་མི་ལུ་བརྟེན་ འཁོར་ལམ་བདའ་སྟེ་ འདམ་ཐོན་པའི་ཁར་ རྡོ་རྦོབ་རིལ་འོང་སྟེ་ འཁོར་ལམ་བསུབས་ཡོད་མི་དེ་ བསལ་ཚར་ཡོདཔ་བཞིན་དུ་ འཁོར་ལམ་བསལ་ནིའི་དོན་ལུ་ ས་བཅད་འཕྲུལ་ཆས་དང་ ལས་མི་༦༠ ལྷགཔ་ཅིག་གིས་ དུས་ཡུན་ཉིནམ་༢ ཀྱི་རིང་ བསལ་ཚར་ཡོདཔ་ཨིན་པས=
ད་ལྟོ་ གཞུང་ལམ་བདའ་སྟེ་ སྣུམ་འཁོར་ཚུ་ འགྲོ་འགྲུལ་འབད་བཅུག་རུང་ ལཱ་ཚུ་ཟླཝ་དག་པ་ཅིག་གི་རིང་ འཕྲོ་མཐུད་དེ་ར་འབད་ཞིནམ་ལས་ ཤུལ་ལས་རྩི་ནག་གཏང་ནི་ཨིན་ཟེར་ཨིན་པས།
རྩི་མ་གཤམ་གྱི་ ལམ་རྒྱ་གྲམ་ཁར་ མི་ཊར་༤༥༠ དེ་ཅིག་ ས་འདམ་དང་ རྡོ་རྦོབ་རིལ་འོང་མི་ དེ་ལས་ ས་རུ་རྡོ་རུ་ཚུ་ལུ་བརྟེན་ སྣུམ་འཁོར་འགྲོ་འགྲུལ་འབད་ནི་ལུ་ ལཱ་ཁག་བཏང་དོ་ཡོདཔ་ཨིན་པས།
ས་མཚམས་གཞུང་ལམ་གྱི་ལཱ་འབད་མི་ དམག་སྲིད་ཨ་ཤིཤ་དུ་བེ་གིས་ བཤད་མིའི་ནང་ འཁོར་ལམ་རྩི་ནག་བཏང་མིའི་གུ་ལས་ ས་རུ་རྡོ་རུ་སེན་ཊི་མི་ཊར་༤༥ དེ་ཅིག་ ཆགས་ཡོད་མི་གིས་ སྣུམ་འཁོར་ཚུ་ འགྲོ་འགྲུལ་འབད་ནི་ལུ་ ལཱ་ཁག་ཡོདཔ་མ་ཚད་ དམིགས་བསལ་དུ་ སྣུམ་འཁོར་ཆུང་བ་ཚུ་ལུ་ ལཱ་ཁག་འདུག་ཟེར་ཨིན་པས།
དཀའ་ངལ་དེ་ དུས་རྒྱུན་དུ་ཐོན་དོ་ཡོདཔ་ལས་ དེ་ཚུ་ འཕྲལ་མགྱོགས་ར་ བསལ་དགོཔ་ཡོད་ཟེར་ ཁོ་གིས་བཤད་པའི་ཁར་ ས་ཁོངས་ནང་ ཇེ་སི་བི་༦ དང་ རོ་ལར་ ས་བཅད་འཕྲུལ་ཆས་ དེ་ལས་ སྣུམ་འཁོར་ཊག་ཚུ་གིས་ འཁོར་ལམ་ཚུ་ སེལ་དོ་ཡོདཔ་སྦེ་ཨིན་པས།
ས་ཁོངས་ནང་ གདོང་ལེན་བྱུང་མི་དེ་ གཙོ་བོ་ར་ གནམ་བྱཱར་གྱི་སྐབས་ལུ་ སའི་ཆགས་ཚུལ་སྒྲིང་སྒྲི་མེད་མི་དང་ ཆརཔ་རྐྱབ་མི་ ཆུ་མཛོད་ཁང་དེ་ འཁོར་ལམ་འོག་ལུ་ཡོད་ནི་དེ་གིས་ འཁོར་ལམ་བདའ་སྟེ་ གག་འགྲམ་ཞུགས་དོ་ཡོདཔ་ལས་ དཀའ་ངལ་ཚུ་རྒྱུན་ཆད་མེད་པར་ ཐོནམ་མས་ཟེར་ཨིན་པས།
དམག་སྲིད་ཨ་ཤིཤ་ནུ་བེ་གིས་འབད་བ་ཅིན་ ས་གྱེད་པ་འབད་མི་དེ་གིས་ གདོང་ལེན་ཚུ་བྱུང་དོ་ཡོདཔ་ལས་ དཱན་ཊག་བཟོ་རིག་ལས་མི་ཚུ་གིས་ འཆར་གཞི་༡༣ པའི་ནང་ དམིགས་ཡུལ་སྦོམ་ར་བསྐྱེད་དེ་ ལཱ་ཚུ་འབད་ནི་ཨིན་ཟེར་ཨིན་པས།
དཱན་ཊག་ལུ་ ལོ་བསྟར་བཞིན་དུ་ རྒྱུན་སྐྱོང་གི་དོན་ལུ་ དངུལ་ཀྲམ་ས་ཡ་༡༦ རེ་བཞག་མི་གིས་ ལང་མི་ཚུགས་དོ་ཡོདཔ་ད་ དཱན་ཊག་གིས་ འཆར་གཞི་༡༣ པའི་ནང་ རྒྱུན་སྐྱོང་གི་འཆར་དངུལ་ དངུལ་ཀྲམ་ས་ཡ་༣༢༠ དགོ་པའི་གྲོས་གཞི་ཚུ་ བཙུགས་ཡོདཔ་ཨིན་པས།
སྤྱིར་བཏང་གྲོས་གཞི་དེ་ ཧ་ལམ་ གནང་བ་གྲུབ་སྟེ་འབད་རུང་ ད་ལྟོ་ རྒྱ་གར་གཞུང་གིས་ གནང་བ་གནང་ནི་ལུ་ བསྒུག་སྟེ་ཡོདཔ་ཨིན་པས།
སྤྱི་ལོ་༢༠༡༨ ཟླ་༧ པའི་ཚེས་༡༨ ལུ་ སྒོ་ཕྱེས་མི་ འཁོར་ལམ་ཀི་ལོ་མི་ཊར་༢༩.༢ འབད་མི་དེ་ ས་ཁོངས་༡༠ དེ་ཅིག་ནང་ ས་རུད་དང་འདམ་གྱིས་ ལམ་བསུབས་ཡོདཔ་ཨིན་པས།
དམ་ཆུ་དང་ ཆུ་ཁ་བར་ནའི་གཞུང་ལམ་དེ་ སྤྱི་ལོ་༢༠༡༠ ཟླ་༣ པའི་ནང་ འཆར་དངུལ་ དངུལ་ཀྲམ་ཐེར་འབུམ་༢.༨༧༠ གི་ཐོག་ལས་ བཟོ་སྐྲུན་འབད་ཡོད་པའི་གནས་ཚུལ།
ཚེ་རིང་དབང་འདུས།
