༉ ཁ་ཙ་ མི་དབང་མངའ་བདག་རིན་པོ་ཆེ་མཆོག་གིས་ ཐིམ་ཕུག་བཀྲིས་ཆོས་རྫོང་ནང་སྦེ་ འགོ་ཐོག་ཨིན་མི་ འབྲུག་རྒྱལ་ཡོངས་དགའ་སྐྱིད་དཔལ་འཛོམས་རྟགས་མ་དེ་ ལའུ་རེནསི་ པོ་ཝེལ་ ཇོབསི་ལུ་ གནང་ཡོདཔ་བཞིན་དུ་ ཁྱད་འཕགས་ཅན་གྱི་ གཟེངས་བསྟོད་རྟགས་མ་དེ་ འགོ་དང་པ་ མོ་གིས་ཐོབ་ཡོདཔ་ད་ དེ་ཡང་ མོ་གིས་ མི་སྡེ་ཡར་དྲག་གཏང་ནི་ལུ་ དམིགས་བསལ་གྱི་ ཕན་འདེབས་འབད་བའི་ ངོས་འཛིན་ལུ་ཨིན་པས།
མོ་གིས་ ལས་དོན་ཁག་ཚུ་ནང་ གཞི་སྒྱུར་གྱི་ལཱ་འབད་མི་ཚུ་ འབྲུག་གི་ རྒྱལ་ཡོངས་དགའ་སྐྱིད་དཔལ་འཛོམས་ཀྱི་ལྟ་བ་ ཡུན་བརྟན་གོང་འཕེལ་དང་ ལམ་སྲོལ་ཉམས་སྲུང་ མཐའ་འཁོར་ཉམས་སྲུང་ དེ་ལས་ གཞུང་སྐྱོང་ལེགས་ལྡན་ཚུ་དང་རྟགས་མཐུནམ་སྦེ་ཡོདཔ་ཨིན་པས།
གཟེངས་བསྟོད་རྟགས་མ་དེ་ འབྲུག་གི་ཁ་ཐུག་ལས་ འཛམ་གླིང་ནང་ འགྲོ་བ་མིའི་ཕན་བདེ་དང་གོང་འཕེལ་གྱི་དོན་ལུ་ བརྩོན་ཤུགས་སྦོམ་བསྐྱེད་དེ་ ལཱ་འབད་མི་ཚུ་ལུ་ དགའ་ཚོར་བསམ་ནི་དང་ རྒྱབ་སྐྱོར་འབད་བའི་བརྡ་མཚོན་ཅིག་ཡང་ཨིན་པས།
ལའུ་རེནསི་ པོ་ཝེལ་ ཇོབསི་གིས་ འགྲོ་བ་མི་ལུ་བྱུང་མི་ སྟབས་མ་བདེཝ་སྦོམ་ཤོས་ཚུ་ བསལ་ནིའི་ཐབས་ལམ་འགྲིག་ཚུགས་དོ་ཡོདཔ་ད་ མོ་གི་ལཱ་ཚུ་ལུ་བརྟེན་ ཤེས་རིག་ནང་ ལམ་ཕྱོགས་གསརཔ་ཚུ་ སྟོན་ཡོདཔ་མ་ཚད་ གནམ་གཤིས་དང་འབྲེལ་བའི་དཀའ་ངལ་ཚུ་ སེལ་ཐབས་འབད་ནི་ལུ་ རྒྱབ་སྐྱོར་འབད་ཡོདཔ་ཨིན་པས།
མོ་གི་ལཱ་ཤུལ་ཚུ་ ངོས་འཛིན་འབད་དེ་ སྤྱི་ལོ་༢༠༢༣ གྱི་ ཊ་ཡེམ་གྱི་ ཧཱན་ཌེཌ་མཱོསི་ ཨིན་ཕུ་ལུ་ཡེན་ཤེལ་ པི་པཱོལ་ཟེར་ སྐུལ་ཤུགས་ཅན་གྱི་མི་༡༠༠ འི་གྲས་ལས་༡ ཨིནམ་སྦེ་ མིང་གཏམ་ཐོབ་ཡོདཔ་ཨིན་པས།
མོ་གིས་ འབྲུག་ལུ་ འགོ་དང་པ་འོངམ་དང་འབྲེལ་ དགེ་ལེགས་ཕུག་དྲན་ཤེས་ཁྲོམ་ནང་ ལྟ་སྐོར་འབད་ནི་ཨིན་པའི་གནས་ཚུལ།
བཙན་སྐྱོགས་དབང་འདུས།